Cubadak Kantang

SQUATIDENT

“Sabana buek malu!”

“Apo tu, Mak?” Sapo Jon Ladiang. Sijon baru tibo di kadai Mak Datuak dan langsuang mandanga Mak Datuak marabo surang.

“Dicaliak an dek urang ka den video Puteri Indonesia dari Sumbar. Kalau diden ndak masalah inyo ndak apa Pancasila tu doh. Tapi, den raso paja tu mandaftar untuak mambuek malu Minangkabau mah. Disangajo bana dek Jokowi mamasuak an paja tu ka acara tu mah. Bahkan paja tu ndak asli Minang bagai doh. Antah rang gaek padusi, antah nan laki-laki, pokok e urang Barat. Bakasam bana Jokowi ka urang awak nampak e mah. Minta tolong nyo ka CIA untuak marusak Minangkabau ko!”

“Inyo tu mewakili Sumbar atau Minangkabau?” Baleh Jon Ladiang.

“Apo lo bedanyo? Kan samo se tu nyoh.” Jawek Mak Datuak.

“Beda lah, Mak. Sumbar ko kan wilayah Provinsi, ado urang Minang di dalam e, ado pulo urang dari suku lain. Ipa den urang Sumbar tapi Bugih.” Solo Cimporong nan dari tadi hanok-haniang se dan kini lah sato pulo.

“Ba a lo kalian ko! Minang tu Sumbar! Sumbar tu Minang! Minang tu Islam! Islam tu Minang!”

“Ha? Kan iyo sabana niniak-ngangak Mak Datuak tu ha.” Jawek Jon Ladiang.

“Sumbar ko wilayah administratif. Minangkabau ko salah satu etnis di dalam wilayah administratif Sumbar. Dan kalau Mak mangecek an Minang tu Islam bukan berarti sagalo urang Islam tu Minang.

“Kacau kalian mah. Dima kalian skolah dulu? Lai ndak kanai susupi dek Jokowi skolah kalian?!” Baleh Mak Datuak. “Dulu ado urang Minang pai marantau ka Arab, manjua randang unto jo kaktus balado di sinan. Lah babini-baranak jo urang situ. Nyo pernah nampak Nabi Muhammad dari jauah. Makonyo katiko Nabi Muhammad iduik, Minangkabau lah labiah dulu Islam daripado daerah lain di dunia ko! Bahkan kalau den kecek an bana, Minangkabau ko lah Islam samanjak Nabi Adam. Tapi ndak usah lah iko nan kito kaji dulu, tabaliak utak kalian surang-surang beko. Ibo den.”

“Handeh. Jan batele-tele se lai Mak. Binguang den mah. Alun pernah den mandanga sejarah nan bantuak itu lai.” Jawek Jon Ladiang paniang.

“Tu mako kalian jan mudah se dikicuah dek Jokowi. Diubah e sejarah ko sado e. Lai tau kalian kalau Jokowi tu dulu intel Soekarno? Lai tau kalian kalau Soekarno tu intel John F Kenedy? Dan lai tau kalian kalau John Kenedy tu rang gaek e urang Syiah? Ndak tau do kan? Untuang diden masih ado catatan nan asli e, kalau ndak mungkin lah kanai kicuah kito sado e mah. Jan picayo pulo kalian ka sejarah nan dibuek dek urang Barat tu lai.”

“Kalau iyo ado sumber asli e, cubo caliak kami.” Pintak Cimporong.

“Ndak bisa! Sumber asli e disimpan di dalam goa di dalam gunuang Marapi. Ado ula babiso nan manjago goa tu. Ndak sumbarang urang bisa masuak ka dalam e do.” Kecek Mak Datuak.

“Ko yo sabana paniang den dek curito Mak Datuak mah. Islam, Jhon Kenedy, Minangkabau, Sumbar, Jokowi, Pancasila, Unto, Putri Indonesia, Arab, Soekarno, Muhammad, apo lai ko, basilang-pintang se sado e. Lah bacampua lamak jo galeme. Ndak tabedakan sadah jo tapuang lai.”

Datuak samakin heran mancaliak pola pikir anak-anak mudo nan baduo tuh. “Tu mako kalian skolah tu nan bana. Jan mudah tamakan hoaks. Kini justru urang-urang bantuak kalian nan tamakan hoaks!”

“Handeh. Alah tu, Mak Datuak. Babaliak ka pangka selah. Jadi kini ba a, apo beda Sumatra Barat jo Minangkabau?” Solo Jon Ladiang.

“Samo, kecek den, jan batuka-tuka jo lai!” Hariak Mak Datuak.

“Kini den nan mananyo lai, apo beda niniak mamak jo niniak ngangak?” Kecek Cimporong.

“Bedalah!”

“Yo apo beda e, Mak?”

“Cari tau selah dek kalian. Ndak kasado pulo ka den sampaikan ka kalian doh. Tadi lah den sampaikan sejarah penting mah. Alah tu saketek itu se dulu.”

“Yo sabuik an lah beda e, Mak.” Sasak Jon Ladiang.

“Ndak ado beda doh. Samo se nyo.” Jawek Mak Datuak barubah pikiran.

“Tadi beda, tu kini samo. Ba a pulo tu? Jadi beda atau samo sabana e?”

“Ma tau den, kanciang!” Jawek Mak Datuak emosi.

“Woi Langkitang! Santai lah. Ba a dek dari tadi simbarang se muncuang ang mangecek?” Jawek Cimporong ikuik emosi.

“Squatident. Kan muncuang den nan mangecek mah. Ndak muncuang wa ang bagai nan den sewa do!” Jawek Mak Datuak mangareh.

“Alah tu. Kito stop selah lai. Cari ota lain lai. Kalau ujuang-ujuang e squatident, ndak ado guno batuka pikiran doh.” Pinteh Jon Ladiang. (*)

Related posts
Cubadak Kantang

Ma Tau Den, Den Anjiang!

Cubadak Kantang

Sijon Kanai Tolak dek Sarah

Cubadak Kantang

Pandai-pandai Pak Anjiang Sajalah Lagi

Cubadak Kantang

Pengumuman

Tinggalkan Balasan

Alamat email Anda tidak akan dipublikasikan. Ruas yang wajib ditandai *