Cubadak Kantang

Penyair Anjiang!

“Ee, pantek ang ma njiang! Alah lo ma kecek den! Gali den mambaco tulisan ang ko! Ntah a nan ang tulih kini ko?! Rancaknyo ndak usah ang pai ka rumah Pak Haji tu lai! Puisi ko nan ‘kan ang agiah ka si Kuciang Persia punyo nak gadih nyo nan surang tu? Ndeh, jan lai kecek den!”

Berang-berang se karajo Jon Ladiang pagi-pagi buto ko ma, padahal matoari alun tabik dari sabalik bukik, baituo pulo mato Jon Ladiang, baru kan lalok kaba nyo. Tapi, inyo alah klarifikasi ka den (penulis carito ko) keceknyo mode ko:

“Den sabananyo indak pamberang do, Rul, den tu sabana sayang ka anjiang den tu, cinto sabana-bana cinto. Nampak dek ang nyo kan rul? Ang nan manulih ma, tahu lah ang ba a sayangnyo den ka inyo kan? Anjiang ko nan sabananyo ba ulah, Rul, jadi yo tapaso lah den mode tu.”

Den sebagai penulis agak ba a yo, mandanga keceknyo tadi tu ha. Sebagai penulis, untuak bia ado gimik atau apo baso Minang e tu? Beko salah lo den kalau sembarang ngecek. Asli, ampia tatampa dek den lai si Jon Ladiang ko. Pantek nyo ma!

Lah, lah, wak lanjuik lai nak?

Anjiang Jon Ladiang nan saikua ko memang terkenal dengan kareh kapalonyo. Ndak ‘kan ado kato penghalang baginyo,  inyo tetap se nio maagiah an puisinyo ko babantuak zine sekitar 20 halaman (anjeeeng ngeri ko lo ha si anjiang ko lah mode kerja-kerja anarko a). Itulah nan kan diagiaah an nyo ka kucing persia si Cinta anak  Pak Haji nan salamo ko alah diincarnyo untuak dijadikan bini.

“Terserah lah! Kok ‘kan dilarang juo den, den ‘kan pai juo nyo. Indak paduli den do. Pantek!”

Nampaknyo lah pandai malawan Anjiang Jon Ladiang ko, indak biasonyo nyo mode ko do. Dek karano cinto, sagalonyo barubah.

“Yo, yo, yo! Pai lah ang! Pai lah! Den kecek-an se dari kini yo! Pak Haji tu pernah kuliah sastra, tapi ndak salasai do, lai tahu dek ang?! (Ntah iyo, ntah ndak, ntah dari ma lah gaek ko dapek info) Saketek-banyaknyo inyo tahu tentang sastra ko, bisa-bisa puisi ang dikritik pakai dasar iko lah itulah nan den indak mangarati!!” Jon Ladiang modenyo alah pasrah menghadapi anjiang nan saikuanyo ko.

“Yolah, den pai! Kok dapek cinto Kuciang Persia punyo anak Pak Haji tu beko, tolong restui den jo inyo! Siapkan sadolahnyo alek den, kok paralu buek alek den tu tujuah hari tujuah malam!”

Lah ndak tantu apo ‘kan dikecek an dek Jon Ladiang ka anjiangnyo ko, nyo padiaan se pai anjiangnyo tu ka rumah Pak Haji. Tapi sebagai tuan, nyo tetap se waswas, takuik hal nan indak-indak tajadi ka anjiang nyo. Nyo ikuti lah dari belakang anjiang pantek tu.

“Ondeh, manyusahkan se paja ko ma, buruang kalau lah gata memang payah untuak manahannyo,”  jawek Jon Ladiang.

***

Indak tasapo urang dek Anjiang Jon Ladiang ko lai, nyo lah ndak saba untuak maagiah an  manuskrip puisinyo kaKuciang Persia si Cinta.

“Demi cinto! Demi cinto!”

Rumah Jon Ladiang ndak taralu jauah dari rumah Pak Haji. Jadi,  jam bara lah tu, lupo den, intinyo tibolah Anjiang Jon Ladiang ko di muko rumah Pak Haji.

“Oh Kucing Persia, kan kubacakan puisi-puisi yang telah kutuliskan untukmu.”

Ondeh, lai ndak patah lidah Anjiang Jon Ladiang ko mangecek bahaso Indonesia ruponyo.

Tibo-tibo…

“Manga angku di muko rumah ko, baco-baco puisi lo?! Jan baco lu dulu, baok siko manuskrip tu! Manuskrip tu kan?! Kito baco dulu.”

Diagiah lah dek Anjiang Jon Ladiang ko manuskripnyo tu ka Pak Haji, dibacolah dek Pak Haji manuskrip tu.

“Ah, apalah ini?” Katonyo dengan kerut keningnya yang khas.

“Ba a, Pak Haji?” Tanyo Anjiang Jon Ladiang sagan-sagan dan penasaran.

“Mode ko se lah, ambo nio pai…”

“Jadi?” Makin penasaran lah Anjiang Jon Ladiang ko

***

Ah, ba a ko yo? Lai kan dapek Kuciang Persia ko dek Anjiang Jon Ladiang ko yo Wan? Ndeh, den sebagai penulis cameh lo dek nyo a. A nan kan tajadi yo? Ndeh ba a dek kalian tu? Nio sad ending atau ba a?

“Yo angku ikuik jo ambo, lai nio?”

“Lai, Pak, lai! Demi cinto! Demi cinto!”

“Ndeh, alah lo ma yo.”

Lameh sabananyo Pak Haji mandanga kecek Anjiang Jon Ladiang ko, tapi ba a lai. Nampak dek nyo kuek hati Anjiang Jon Ladiang ko ka Kuciang Persia si Cinta anaknyo tu. Tapi nyo ndak lo bisa sumbarang manarimo ba itu sajo.

Bajalanlah Pak Haji jo Anjiang Jon Ladiang.

“Pak, ba a, Pak?” Sasak Anjiang Jon Ladiang malu-malu.

“A yang ba a?”

“Yo, kama kito kini ko? Tu ba a wak kini ko? Wak yo cinto bana jo Kuciang Persia si Cinta. Tolonglah Pak Haji,restui wak. Apopun itu akan wak lakukan untuk mandapekan nyo. Wak turuti apo nan Pak Haji nio.”

Pak Haji masih acuh. Nyo tetap se mambaok Anjiang Jon Ladiang ko pai ntah kama.

Tibo-tibo…

“Pak… Wak maraso dipermainkan kini ko! Jaweklah capek! Kama wak ka pai?! Jujur, Pak, yo, banyak karajo wk lai Pak ha, tacirik pun alun wak lai tapi dek cinto Pak ha, demi cinto! Demi cinto! Awak tingga an sadonyo tu, tulus bana awakko, Pak, oi.”

“Njiang…” Kecek Pak Haji tibo-tibo, mode ka manjawek tanyo Anjiang Jon Ladiang.

Arok mungkin ka sampai, Anjiang Jon Ladiang  langsuang elok suasana hatinyo, nyo maraso Pak Haji ko kan manjawek tanyo nyo, sudah tu nyo restui jo Kuciang Persia si Cinta tu.

“A, Pak?! Alah, Pak? Lah berubah pangana, Pak? Lah Pak restui ambo jo inyo? Alah kan, Pak? Ondeh bahagia bana wak,Pak.”  (Ndak elok sabananyo terlalu percaya diri ko do kawan! Ingek tu kawan sadonyo, den ko sebagai penulis ha, ndak lo pede dengan tulisan ko do).

“Ah, manga angku?! Saba lu, angku caliak tu ha? Ba a lah banyak bana baliho-baliho ko, hilang rancak kampuang kito dek nyo ha. Ondeh! Jujur yo Njiang, ntah bara urang yang ambo kenal nyo. Salabiahnyo ntah sia-sia, baru kali ko lo ambomancaliaknyo. Raso ambo yo, pas maso-maso pemilihan-pemilihan ko nyo baru baliak ka kampuang kito ko.”

“Ondeh, iyo juo yo, Pak, manyamak se ndak? Pede lo gaya nyo tu, mode paliang mantap lo nampak dek awak, janji ka janji! Pak caliak lah tu, apo bacaan nyo tu? Ba a kok ndak ado janji nyo untuak mensejahterakan anjiang-anjiang?! Kini ko iyo, pulang sadonyo ka kampuang, bisuak kok lah jadi, ndak kan ado pulang lai do, lupo ka kampuang, lupo ka janji-janji dahulu. ”

“Ah, itulah Njiang. Lameh ambo dek nyo… Eh, masuak ota wak mah. Jadi, ba a? Masih nio juo jo Kuciang Persia punyo Cinta tu?”

Iko bana yang ditunggu dek Anjiang Jon Ladiang ko ma. Lai ‘kan bisa yo? Sumpah makin cameh den menuliskan nyo ko ha, apo ancaknyo den lanjuik an carito ko yo? Tapi yo, prinsip den  mo de ko a: “YAKIN WAK, USAHO WAK, INSHAALLAH LANCAR!” Tapi itulah, lupo lo den memotivasi anjiang tu tadi.

“Eh, pantek! Banyak na kecek penulis ko ma!” (Ee anjiang, lah  dipacaruti lo penulis dek Anjiang Jon Ladiang ko).

“Lah, lah, den urang nyo sabar nyo! Demi ang ma Njiang lai tahu dek ang ko?! Rela den revisi-revisi taruih ma!”

Oke lanjut.. (Maaf yo pembaco, masuak lo den ka dialog jadinyo).

Dengan lantang, Anjiang Jon Ladiang ko manjawek tanyo Pak Haji tadi

“LAI PAK, DEMI KUCIANG PERSIA NAN AMBO CINTOI, APAPUN AKAN AMBO LAKUKAN! DEMI CINTO! DEMI CINTO!” (Ondeh capslock. Jebol keyboard den).

“Oke, iyo lah. Mode ko se lah, ambo mancaliak angku pandai manulih puisi, walaupun puisi angku tu… ndeh ntahlah.Tapi, itulah usaho angku untuak mandapek an inyo, ambo harogoi usaho angku. Tadi lah angku caliak kan banyak bana baliho-baliho kampanye ko ha, kritis lo ambo caliak angku ko,” kecek Pak Haji.

“Jadi bisa ndak, angku buek lah resensi buku puisinyo Subagio Sastrowardoyo nan judul buku nyo dan kematian makin akrab tu a? Kalau oke ma, angku ambiak lah kuciang tu, angku baoklah kama angku nio,” Sambuang Pak Haji.

“Eh, sangko awak kan disuruah manulih esai kritik baliho-baliho tu tadi pak, bisa aja Pak Haji ni ya. Kalau itu, sabananyo ba a yo, Pak, a tadi resensi? Resensi ko mode a kini ko, Pak? Alun pernah wak manulih nyo lai do. Tapi, tenang se lah Pak Haji nan bijak bertutur dan bersikap ko, wak akan lakukan apo yang apak suruah tadi, demi cinto! Demi cinto!”

“Mode ko nan ambo suko, yo angku cari tahu lah surang, bisuak anta an ka rumah resensi tu, bisuak paliang lambek!” Pak Haji mengecek tegas.

“Jadih, aman Pak! Tenang, tenang.”

Matoari lah di tibo di ateh ubun-ubun urang ko, sabanta lai urang kan sumbayang Luhua lo, jadi pamit lah Pak Haji ko ka musajik, ditingga nyo lah Anjiang Jon Ladiang ko surang (ntah a tujuan Pak Haji ko maajak Anjiang Jon Ladiang ko bajalan tadi).

Anjiang Jon Ladiang bajalan se taruih, sampai ka ujung nagari, tu baliak lo liak, sambia mamikia an tentang resensi tu, ba a caro mambueknyo, kama lah kan nyo batanyo.

“Ondeh, memang mandapek an sabuah permata ko payahnyo minta ampun, den harus berjuang! Demi cinto! Demi cinto!”

Bakumandanglah adzan Luhua dari musajik, bataduah nyo di bawah batang rambutan nan sedang babuah, merah-merah. Sambia menggonggong-gonggong, manyapo urang nan lalu, nyo bapikia taruih, a resensi ko yo, dicocok-cocok an nyo lah jo pengertian nan pernah nyo dapek an. Lah sakik kapalonyo dek mamikian ko, nio pulang ka rumah Jon Ladiang beko, banyak lo tanyo gaek surang tu, makin sakik kapalonyo. Kok ndak pulang, paruik lah lapa lo. Ondeh! Menyiksa bana cinto ko ma yo!

“Tuhan, tolong lah ambo, bia pun ambo ko haram, tapi ambo punyo hati, ambo punyo hasrat mancintoi nan tulus.” (yo sabana tulus Anjiang Jon Ladiang ko ma)

Dengan khusyuk Anjiang Jon Ladiang ko badoa di bawah batang rambutan ko sambia mamikia an apo resensi tadi. Tapi apolah dayo, kalau dipikia an taruih ndak kan tahu juo do, harus ado tampek batanyo.

***

Singkat carito ma, panek lo den manulih a, intinyo ma, takalok lah Anjiang ko. Sampai malam Anjiang Jon Ladiang tu di bawah batang rambutan tu, malam minggu lo tu. Ondeh, sapatuiknyo pai bacewek lah Anjiang jo Kuciang Persia si Cinta tu ma. Sayang beribu kali sayang, angan alun sampai lai do.

Begitu syahdu malam ko, angin barambuih perlahan, makin lamak lalok Anjiang Jon Ladiang ko dibueknyo. Tibo-tibo, jatuah rantiang rambutan tadi ka kapalonyo,

“Pantek! Ee kalera ma, lah lamak lalok den tadi! Den mimpi Kuciang Persia nan sadang den perjuangkan ko berhasil den dapek an.” Sampai tabaok mimpi dek saking cinto nyo.

Pailah Anjiang Jon Ladiang ko lai dari batang rambutan tu, baliak nyo ka rumah Jon Ladiang. Pas di jalan… Ondeh ko lah ending nyo ma, panteklah ndak tega den do, ibo bana den caliak Anjiang Jon Ladiang ko, lai sanggup nyo yo manarimo sadonyo yg tajadi yo?

“Eh Kucing, kama kamu tu?” Ahai, basarobok nyo jo Kuciang Persia si Cinta.

“Eh Anjing, ko pai ha, nio sobok jo urang, dari ma kamu? Ma Pak Haji? Tadi jo kamu kan?

“Hehe, iya cinto ku, eh, Cing. Alun pulang Pak Haji lai? Sobok jo sia tu? Jo aku kan? Hehe, iyo kan? Pasti kamu nio sobok jo aku.” Ndak talok den lai do, kepedean bana anjiang ko.

“Lawak lo kamu ma. Tapi maaf yo Njing, sabananyo giko…”

“Ah, apo tu?! Kamu nio tarimo cinto aku kan? Oh Kucing Persia yang sangat menawan, indah bulumu getarkan hatiku. Sungguh, marilah bersamaku, merajut kasih, menjalin cinta.”

“Hmm, sabananyo aku nio sobok jo kucing kampuang sabalah.”

“Ah, kuciang buruak tu? Nan acok mancilok ikan di pasa? Apo hubungan kalian?”

“Hehehe, iyo, inyo ma. Gentle man banget nggak sih? Jadi, hubungan kami spesial. Tapi masih ado wakatu untuak kamu jiko nio jo aku.”

“Ba a ndak kamu kecek an dari awal, kalau tahu den ma ndak kan mode ko bana den ka kamu do, hampia gilo den tahu dek mu. Demi cinto! Demi cinto! Ah, sungguh teganya dirimu Cing…”

“Njing, maaf.”

“Sudah lah Cing, ndak ba a do, asalkan mu tahu cinto aku ndak kan abih untuak mu do. Tibo se lah kepadaku jika mu alah ndak jo inyo, aku menunggu.”

Ondeh, sadiah nyo lai, yo salut den jo Anjiang Jon Ladiang ko ma, kuek bana cinto nyo jo Kuciang Persia tu, ah jadi terharu. Lah, sudah lah carito CBDK KTNG kali ko a kawan. Segitu dulu yo, bisuak bilo-bilo den sambuang lai. Lah lah.

Assalamu’alaikum. (*)

 

 

 

 

 

 

 

 

Related posts
Cubadak Kantang

Anjiang Jon Ladiang Ditahan Rentenir

Cubadak Kantang

MATI ANJIANG!

Cubadak Kantang

Ota Ndak Sampai

Cubadak Kantang

Jan Bacaruik Juo, Pantek!

Tinggalkan Balasan

Alamat email Anda tidak akan dipublikasikan. Ruas yang wajib ditandai *