Cubadak Kantang

MATI ANJIANG!

Ma Tau Den, Den Anjiang!

“Ndak ka jadi urang waang doh, anjiang gadang!,” kecek Jon Ladiang ka anjiang nyo.

Antah apo ko lah sabab Jon Ladiang mararah ka anjiang nyo. Padahal, pagi lah nyo lantuang sapiriang gadang katan ndak bakarambia jo goreang pisang angek Ni Mar. Kopi lah sacerek mungkin nyo lapiah, antah auih antah memang sadang berang bana Jon Ladiang ko, yo ndak lo obas di saya.

Awak baru ka manulih, ma tau wak, wa urang baru. Nan jaleh, yo tea Jon Ladiang ko mah.

“Aaa, nan anjiang ko bitu pulo, lah tau inyo anjiang meredeng-redeng juo ka Jon Ladiang yang sadang berang. Kan iyo indak ka jadi urang juo paja tu,”  Ni Mar ikuik mambela Jon Ladiang. “Untuang bana anjiang gadang tu, sabana baruntuang. Sabab Jon Ladiang sadang indak mambaok ladiang. Kok lah tasalek ladiang Da Jon tu, antah lah jadi dendeang anjiang paja tu”.

“Manga wak? Apo salah wak, lah batahun-tahun wak ikuik jo Si Jon ko, baa kok kini co itu bana berangnyo ka wak. Sapanjang iduang di tampuang angok, yo baru kini nyo berang ka wak. Nan agak surprais awak yo soal kato:  ‘Inda ka jadi urang waang doh, anjiang gadang!’” kecek Anjiang Jon Ladiang.

***

Eh baa kok lah agak bamoral lo den kini, lah ba awak awak lo den bacarito, yo kanai mental den dek basabuik indakka jadi urang ko. Yo paralu bana den batanyo ka HJP ko, aden ko urang atau anjiang? Agak kurang tangguang jawab HJP ko den caliak. Alah nyo jadikan den tokoh caritonyo, indak pulo nyo agiah namo. Nan sakik ati den, lai acok di jadikan tokoh tapi aden tetap se anjiang.

Tu, nan tasabuik tetap se Jon Ladiang ko. Yo sabana kalera HJP ko. Tapi bialah, walau pun baitu inyo lai lo fair, manyarahkan bulek-bulek nasib den ka umaik nan ado di siko.

Oh yo, baliak ka soal Jon Ladiang ko. Baa kok nyo anggap remeh se den, kini den baru tahu salamo ko inyo ado manyimpan rasio sabananyo. Paralu den selidiki, walaupun aden anjiang tapi aden masih ado raso kemanusiaan, keurangan. Ranji den ko antah anjiang antah urang, bialah den investigasi biko. Kini anggap se den tetap sebagai anjiang.

Mbek cah, kok den baco-baco lo di internet eh, aden ko lah lumayan lamo jo si Jon ko, ado lah sakitar limo tahun. Kok den kana bana, umua den di ambiak sangkek bayi, kikiro lah 5 tahun umua den kini. Co lah baco, manuruik nan den baco di internet 1 tahun usia anjiang setara jo 15 tahun usia manusia, tahun kaduonyo tambah 9 tahun. Misal, kok umua den kini, anggaplah duo tahun berarti umua den kini 15 + 9 samo jo duo puluah ampek tahun. Nah, samantaro den raso umua den alah agaknyo 5 tahun, nan sajalan jo Jon Ladiang ko se lah 3 tahun, alun tamasuak saat den maindok di kapalo HJP.

Ondeh, yo mamantek bana parangai Jon Ladiang ko ka wakden. Terusik keanjiangan den dek paja kalera ko. Lah den sudu, lah den turuikan kama nyo pai. Den jago bana harago dirinyo sebagai tuan den salamo ko. Kini apo balasannyo ka den, nyo berangan tagak den, tanpa den tahu apo kasalahan den. Jan jan, itu pulo sababnyo HJP manyarah maurus den. Sakali anjiang tetap anjiang mungkin itu konsep di kapalo HJP salamo ko.

Eh, tapi ancit lu, kini den baru sadar, baa kok tasabuik dek Jon Ladiang aden indak ka manjadi urang? Jan jan dulu aden ko urang.

“Oi HJP, sebagai pertanggungjawaban angku ka ambo, tolong kecek an ka Jon Ladiang hanjiang tu sia sabana e aden ko. Ntek mah…lah baa ambo pulo den…dima latak immoralitas den sajak dipertanyakan ke anjiangan den. Bia nyo tau, tolong kecean mode iko ka inyo: asal waang tau Jon, seharusnyo waang ba Uda ka anjiang ang tu, tu lahdisabuik an nyo rumus ilmiahnyo, jadi jan ka gadang-gadangan ang ka anjiang ang tu, anjiang gadang,” pasanAnjiang Jon Ladiang ka HJP.

“Aden kini lah tahu sia sabananyo diri den. Walau banyak juo urang manyabuik ka anaknyo, ‘indak ka jadi urang waang doh yuang, ka jadi sia ang yuang,’ dan sagalo macam sabutan lainnyo. Kini, den sadar urang-urang kini ko antah tau inyo urang antah indak”.

“Mati anjiang se kalian lah lai!”

 

 

 

About author

Antropolog Pemerhati Anjiang.
Related posts
Cubadak Kantang

Penyair Anjiang!

Cubadak Kantang

Anjiang Jon Ladiang Ditahan Rentenir

Cubadak Kantang

Ota Ndak Sampai

Cubadak Kantang

Jan Bacaruik Juo, Pantek!

Tinggalkan Balasan

Alamat email Anda tidak akan dipublikasikan. Ruas yang wajib ditandai *