Cubadak Kantang

Pamenan Mato

“Mambana den, Mak Datuak, siap ko ndak ka den ulang-ulang parangai den lai, mambana den, ndak takao dek badan den lai doh,” tangih Cimporong ka Datuak Cubadak Kantang.

“Tiok den maafan, ndak lamo sudah tu ang ulang lo baliak, kanciang!” Jawek Mak Datuak sambia malacuik Cimporong jo rotan sakali lai labiah kareh.

Antah la bara kali Cimporong kedapatan mancigok urang mandi dan antah bara kali pulo Mak Datuak ma agiah hukuman ka inyo. Tiok kedapatan dek urang lain atau tatangkok langsuang dek Mak Datuak, Cimporong langsuang dicakau dan dikabek an di batang pinang. Siap tu dilacuik jo rotan bakali-kali sampai habih suaro e dek mintak ampun.
Memang, panyakik suko mancigok urang mandi tu lah lamo ndak bangkik baliak. Banyak urang manyangko kalau Cimporong lah tobaik. Tapi, dek karano sanjo kapatang kedapatan baliak inyo mancigok bini ka-duo Mak Datuak mandi, langsuang kanai pasamoannyo sakali lai tanpa ampun.

Dek karano sakujua badan Cimporong lah biru sansai kanai lakak jo rotan, mangko tabik pulo ibo urang-urang mancaliaknyo. “Lapehan selah nyo lai, Mak  Datuak. Kito sidang selah nyo lai, atau kito mintak dando se lai, ndak tacaliak pulo dek kito Cimporong ko kanai rotan bantuak iko doh,” kecek salah surang urang di sinan.

Mak Datuak sabana e ibo pulo mancaliak Cimporong lah tabujua ndak talok mangecek lai. “Jadihlah kalau baitu kecek kito nan basamo. Lapehanlah lai kabek e tu, baok nyo ka kadai den sakali, kito etong-etong bana ka dipangaan paja ko lai,” kecek Mak Datuak.

Setelah badan Cimporong dikompres babarapo jam dan inyo mulai sadar, langsuang diagiah lontong jo teh angek dek mak Datuak, siap tu barulah urang-urang mulai mambukak kecek. “Jadi, ba a dek bangkik pulo panyakik lamo ang nan suko mancigok urang mandi ko, Cimp?”

“Kok panyakik? Iko kan sabana e hanyo pamenan mato.” Jawek Cimporong sabana santai seakan-akan inyo indak salah samo sakali. Cimporong ko memang bantuak itu, kalau sadang tasuduik nyo basijadi mambana-mambana, tapi kalau lah raso-raso bisa tagak nyo baliak, bantuak ndak ado salah samo sakali se gaya e.

Mak Datuak naiak spaning e mandanga jawek Cimporong. Jon Ladiang langsuang mangode Mak Datuak supayo tanang se dulu. “Pamenan mato ba a pulo ko?” Pinteh Jon Ladiang.

“Jadi, di Minangkabau ko, ado konsep pamenan mato dan ado konsep pamenan kato. Kalau urang-urang kan alah banyak mamakai pamenan kato, mancari apo nan rancak disabuik, sedangkan aden mamakai pamenan mato, mancari apo nan rancak dicaliak.”

“Apo mukasuik ang tu, kanciang?” Semba Mak Datuak manggaritih. Jon Ladiang langsuang mahambek Mak Datuak supayo manahan diri sabanta.

“Di antaro urang di siko, yo Da Cimp nan paliang tinggi skolah e, tapi jan lah kami pulo nan Da Cimp ota bantuak itu lai. Sajak bilo pulo konsep pamenan mato tu bisa dipakai sabagai alasan untuak mancigok urang mandi?” Baleh Jon Ladiang.

“Ba a dek hanok se ang? Jaweklah, kanciang!” Solo Mak Datuak.

“Ba a Da Cimp? Lah gagok se sakali?” Lanjuik Jon Ladiang.

“Sabana minta maaf den, ndak den ulang-ulang lai, bajanji bana den,” jawek Cimporong maibo-ibo. Bantuak biaso, kalau lah tasuduik, langsuang kalua jurus maibo-ibo Cimporong sakali lai.

“Den maafkan. Tapi tolong ang jawek, apo hubungan konsep pamenan mato jo mancigok urang mandi?” Hariak Mak Datuak.

“Mambana den. Jan sasak an den ha. Den sangko dek dihubuangkan jo konsep di Minangkabau ko, kok lai ka bisa pulo ditarimo alasan den mancigok urang mandi.” Jawek Cimporong mambana-bana ma angkek kaduo tangan.

“Lai subana skolah ang, kanciang? Sia guru ang?” Hariak Mak Datuak.

“Lai lah. Ado ijazah den disimpan di rumah. Paralu den baok ka siko kini? Kalau soal guru, sagalo urang hebat, pernah den baguru ka inyo. Hehe.” Jawek Cimporong manyarengeh bantuak ndak basalah samo sakali.

“Jan den pulo ang patelean lai kanciang,” kecek Mak Datuak sambia malompek ka ateh meja dan kaki e langsuang mahantam muncuang Cimporong sampai tabaliak Cimporong tu dari tampek duduak. Mak Datuak yo bana alah habih saba. Dari ateh meja, nyo malompek ka badan Cimporong nan masih tatilantang di lantai. Dipijaknyo paruik Cimporong jo kaki suok sedangkan kaki kida Mak Datuak taruih mambae muncuang paja kanciang tu.

Dek mancaliak Cimporong lah hampia habih angok, mangko dipacik an lah Mak Datuak dek urang basamo. “Alah tu Mak Datuak, bia kami se nan maurus paja ko lai,” kecek Jon Ladiang.

“Indak bisa!” hariak Mak Datuak. “Paja kanciang ko mantang-mantang skolahnyo paliang tinggi di nagari ko, kito pulo nan ka diota-ota e lai. Sakalamak ati e se mamakai-makai konsep Minangkabau untuak manutuik parangai buruak e. Aden ko yo cuma Datuak Cubadak Kantang nyo, tapi ndak pulo bantuak itu bana den maota-ota urang lain jo konsep-konsep Minangkabau ko doh.”

“Kan iko cuma kebebasan individu nyo?” Jawek Cimporong nan tanyato masih talok mangecek dek nyo.

“Kebebasan individu pulo kecek ang kini lai, kanciang! Ang sangko pandia se urang sado e di nagari ko!” Hariak Jon Ladiang sato pulo mamijak-mijak an muncuang Cimporong. (*)

Related posts
Cubadak Kantang

Ma Tau Den, Den Anjiang!

Cubadak Kantang

Sijon Kanai Tolak dek Sarah

Cubadak Kantang

Pandai-pandai Pak Anjiang Sajalah Lagi

Cubadak Kantang

Pengumuman

Tinggalkan Balasan

Alamat email Anda tidak akan dipublikasikan. Ruas yang wajib ditandai *