Cubadak Kantang

Samanjak Kuciang Pandai Sumbayang

Datuak Cubadak Kantang jatuah takangkang di rumah e sasudah manyantuang sate kudo jo gulai tunjang nan ditambah pulo jo itiak lado ijau. Taduduak dan ndak talok tagak saketek pun, akhirnyo Mak Datuak hanyo bisa manyanda ka dindiang rumah e. Mato e bakunang-kunang, kuduak taraso barek, kapalo badanyuik-danyuik, dan kaki saraso tagang. “Toloong, oi rang kampuang, tolooong lah den ciek ko ha, di meja masih banyak pabukoan nan ka den habihan. Goreng baluik masih ado, gulai cancang alun den makan, teh talua alah tapasan duo bungkuih, kapalo kambiang alun ba angek an lai. Oi rang kampuang, tolooong angkek den ka meja tu ciek ha!” Ratok Mak Datuak minta tolong bakali-kali. Lah ciek-ciek taraso angok e.

“Dek a paja kanciang tu?” Tanyo Mancik ka Kuciang orens nan acok baputa-puta di rumah Mak Datuak.

“Ndak tau wak do, kawan. Pas wak tibo lah nampak se paja tu taduduak.”

“Tanyoanlah.”

“Ba a dek harus awak pulo, kawan?”

“Kan ang lai acok kanai gusuak dek nyo mah.” Jawek Mancik tu.

“Maleh wak nyo, kawan. Untuak difoto dan diupload ka fesbuk se tu nyo. Patang se wak ndak manga-manga, disipak an e sakali.” Jawek Kuciang.

“Ba a dek bisa bitu?”

“Ntah. Mungkin disangkonyo awak ka manyantuang pabukoan e.”

“Bukannyo memang iyo itu nan ang nio?”

“He-he. Manyantuang pabukoan e tantu lai nio wak, kawan. Kan kawan iyo lo mah. Tapi, kanai sipak ko nan ndak tahan.”

“Eh, takana lo diden, katiko paja sadang taduduak bantuak tu, wak tandehan pabukoan nan tasiso tu lah? Wak bagi duo se. Ba a?” Kecek Mancik tu menawarkan rencana ka Kuciang.

“Taruih lah, kawan. Wak ndak sato-sato do.”

“Ha ba a tu?”

“Maleh se wak nyo, kawan.”

“Dek a ang? Lah batuka se salero ang kini? Biaso ang nan ma ajak den.” Kecek Mancik agak heran.

“Jadihlah kok bitu kecek kawan. Baa kalau wak pagarahan se paja tu dulu?”

“Pagarahan baa?”

“Bia awak ambiak ikan di meja tu, tu awak baok lewat di muko e sambia bajoget-joget, nah siap tu langsuang kawan tibo. Tu wak opor-opor ikan tu sambia salto-salto bantuak urang main sirkus. Wak buek paneh ati e. Ba a manuruik kawan tu?”

“Lah kali!”

Setelah pareman baduo tu basupakaik, Mancik minta ijin untuak pai kajamban sabanta dan Kuciang manunggu di bawah meja makan. Lah lamo ditunggu, ndak tibo-tibo juo Mancik tu, hampia takalok Kuciang dibueknyo.

“Kama kawan pai kajamban? Wak sangko kok ndak jadi se rencana tadi.” Kecek Kuciang katiko Mancik tu akhirnyo mancogok bantuak ndak ado masalah samo sakali.

“Pantek, saba lah ang, ado lo urusan den tadi sabanta. Pek lah, kito mainkan lai!” Kecek Mancik tu ndak saba.

“Kawan…” Kecek Kuciang tu tibo-tibo bantuak ndak semangat.

“Apo?”

“Ndak usah selah ndak. Kito tunggu selah Mak Datuak tu manyampak an siso makanan e ka tampek sarok bantuak biaso. Siap tu baru kito sungkahan apo nan ado.”

“Ha? Ba a dek lah lamah se tembak ang sakali?” Ckckckck!” Kecek Mancik tu yo bana ndak manyangko.

“Ntah.” Kecek Kuciang singkek.

“E kanciang yo, mangambok lo ang lai”

“Ndak ado wak mangambok doh, kawan.” Jawek Kuciang.

“Tu dek a barubah se pangana ang tibo-tibo?”

“Sabana e awak nio tobat bulan puaso ko lai, kawan. Ndak nio wak taruih-taruih bantuak iko doh. Sajak wak lahia sampai kini, karajo wak cuma mancilok samba urang jo mausai tampek sarok se nyo kawan. Kanai sumpahan se wak taruih, kawan. Raso-raso ndak ka salamaik iduik dek nyo. Kalau wak tobat, kaba-kaba e manusia akan sayang ka awak, diagiah e wak makan tigo kali sahari, tanpa wak harus mausai-usai lai. Bitu kaba-kabua nan tadanga dek wak, kawan.”

“Ndeh, dek a lah paja ko ha. Bukannyo salut, malah lawak ang nampak diden.” Kecek Mancik tu saparoh tagalak.

“Jan bagarah juo, kawan.” Kecek Kuciang tu sambia mancaliak an tampang serius.

“Tu apo rencana ang lai? Ba a caro e supayo Mak Datuak tahu kalau wa ang lah tobat? Soal e percuma se ang tobat, kalau Mak Datuak ndak tau. Ba a ka ba a, wa ang kan baharok ka diagiah makan dek Mak Datuak.” Kecek Mancik tu.

“Kalau soal itu lai tapikia juo dek wak, kawan. Mumpung inyo kini masih madok taruih ka meja makan. Rencananyo wak bae sumbayang tarawiah di ateh meja makan tu. Bia nampak dek nyo.”

Setelah menganalisa strategi Kuciang tu, Mancik pun menyetujui. Ndak lamo sudah tu, malompeklah Kuciang orens tu ka ateh meja. Dicaliaknyo Mak Datuak masih tasanda buruak. Disangajo bana dek Kuciang tu mangeong agak kareh dan sumbayang di ateh kaleng karupuak jariang, bia tampak jaleh dek Mak Datuak. Dan si Mancik mamparatian Kuciang tu sumbayang dari bawah meja. “Lai serius paja ko ka tobat dek pakaro bia dapek makan perai ko,” kecek Mancik dalam ati.

“Plaaak!” Katiko baru ka mulai rakaat ka duo, tibo-tibo malayang se helem dan hinggok di badan Kuciang tu sakali. Kuciang tu langsuang tapalantiang, tahampeh kareh ka lamari, dan langsuang mahambua ka lua rumah.

“Kuciang hanjiang! Sabanta se den tinggaan meja ko nyo, lah naiak se sakali!” Hariak Mak Datuak sambia bajalan tapere-pere ka meja makan dan ma ambiak tangkai sapu mangaja Kuciang tu ka lua rumah.

Katiko Mak Datuak masih manyumpah-nyumpah di laman rumah, Kuciang tu lah manyuruak di loteng. “Yolah sabana kanciang. Padahal ndak ado bagai den kaca samba di meja tu doh, ba a dek kanai juo den baru!” Kecek Kuciang tu sabana taibo ati e. “Kawan? Dima kawan? Ka siko lah kawan, ba a dek bisa paja tu sehat se tibo-tibo dan mahampok an helm tuh?”

Ndak lamo siap tu Mancik langsuang manamui Kuciang di loteng.

“Aden ndak lo manyangko doh. Den fokus se mancaliak ang sumbayang. Tibo-tibo lah malayang se helm. Tu sato lo den kabur.” Pengakuan Mancik tu.

“Yolah sabana kanciang paja mah. Padahal awak lah baniaik bana ka barubah bulan puaso ko!”

“Ang iyo lo. Sajaleh tu tobat tu untuak manusia, binatang ndak butuh tobat do!”

“Kok bitu pulo kecek kawan?”

“Memang bantuak tu dari sono e. Manusia dilahiakan sapaket jo kesadaran. Binatang ndak ado bantuak itu do.”

“Yo ndak supakaik wak jo kawan kini do. Manuruik wak, binatang punyo kesadaran nan samo jo kesadaran nan dipunyoi manusia!” Baleh Kuciang.

“Ma pulo dek ang! Kalaupun binatang punyo kesadaran, maka itu akan beda jo kesadaran yang dipunyoi manusia!”

“Samo, kawan! Ko buktinyo kito kini, kito bisa mangecek baso Minang, bisa lo tau jo sumbayang, dan bisa lo memperdebatkan isu kesadaran ko, saroman bana jo nan bisa dilakukan dek manusia. Itu sebab e tadi wak kecek an kalau binatang jo manusia punyo kesadaran nan samo.” Kecek Kuciang.

“Ndeh! Itu kan cuma dalam carito Cubadak Kantang. Ba a lo ang ko.”

“He-he-he. Iyo juo ndak!” Kecek Kuciang tagalak-galak. (*)

 

Ilusitrasi oleh: Amalia Putri

Related posts
Cubadak Kantang

Ma Tau Den, Den Anjiang!

Cubadak Kantang

Sijon Kanai Tolak dek Sarah

Cubadak Kantang

Pandai-pandai Pak Anjiang Sajalah Lagi

Cubadak Kantang

Pengumuman

Tinggalkan Balasan

Alamat email Anda tidak akan dipublikasikan. Ruas yang wajib ditandai *