Takajuik gadang Mak Datuak Cubadak Kantang katiko tibo-tibo Baruak Jon Ladiang mandongkak pintu lapaunyo. Ampia taserak kopi Mak Datuak dibueknyo.
“Angkek an huruf A tu!” Rabo Baruak Jon Ladiang. Nyo parok pintu lapau kareh-kareh sakali lai.
Tangan kidanyo mangapa tenju tinggi-tinggi, tangan suoknyo manunjuak-nunjuak poster Nike Ardilla di dindiang lapau Mak Datuak.
Urang di lapau haniang sajo sabalik, ndak ado nan basuaro, bantuak katakuik an.
“Lai tau kalian arti huruf A di poster tu? Itu inisial Anjiang tu mah!” Sorak Baruak makin manjadi-jadi dari lua lapau.
Langau nan biasonyo maintai-intai godok dingin di ateh piriang pun jadi takuik dibueknyo.
“Taruih, Ruak, bae taruih,” kecek duo anggotanyo, tukang soraknyo. Ciek Cigak, sa ikua lai Siamang. Duo ikua tu manyorak an dari ateh batang paraweh di dalam parak sampiang lapau.
Memang belakangan ko Baruak Jon Ladiang sadang ikuik gerakan anti-anjiang.
Konon kabanyo gerakan tu muncul gara-gara tawuran baruak jo anjiang di India. Sabamulo tawuran tu ndak jaleh, nan jaleh dunia kini sadang goncang. Sekalian anjiang kini jadi buruan para baruak.
“Kalian angkek an ndak!? Jan sampai aden nan masuak ka situ, den cabiak-cabiak poster tu!” Ancam Baruak.
“Agiah, Ruak”
“Mantap, Ruak”
Cigak jo Siamang basijadi pulo mangompori, batapuak tangan dari ateh batang paraweh tadi.
Mak Datuak, Cimporong Angek, dan urang lapau lainnyo masih haniang.
Mulailah Baruak baceramah ndak bakajalehan soal bahayo anjiang di tangah laman lapau. Nyo sabuik sagalo parangai buruak anjiang. Mulai dari angok busuak e, parangai nan suko makan cirik, mambaok rabies, sampai soal anjiang nan najis kapia sirah tu. Pokok e anjiang tu pangka dari sagalo bala di ateh dunia ko. Itulah intinyo.
Ndak sampai di situ. Manuruiknyo kalau poster Nike Ardilla yang mengandung huruf A tu masih tapampang di situ, urang nan duduak di dakeknyo bisa tertular parangai anjiang, bahkan dikuasainyo pikirannyo dek anjiang. Apo lai ‘A’ nyo duo buah.
“Makonyo den kecean dari kini, kalian ndak juo sadar jo bahayo anjiang tu,” kecek Baruak sambia bajalan baputa-puta di halaman lapau. Dadonyo lah naik turun dek manahan emosi.
“Ndak hanyo kalian nan ka jadi korban, urang sakampuang kanai pulo. Jan sampai manyasa anak cucu kalian bisuak,” tambah e makin ndak bakatantuan.
Nan urang salapau masih diam. Mamatuik-matuik Baruak Jon ladiang dari dalam.
“Atau kalian tu pro-anjiang sabanyo yo”
“Iyo Kan!? Iyo kan!? Mangaku selah kalian!” Sasak Baruak.
Mak Datuak takajuiknyo alah ilang sajak tau kalau nan mandongkak pintu lapaunyo Baruak Jon Ladiang. Kaniang nyo agak bakaruik mancaliak Baruak nan taruih marabo-rabo, ciek duo kacang tujin tabang ka dalam muncuangnyo sambia mampalekoan latak kupiah e tiok sabanta. Cimporong Angek mancaliak-caliak jauh sambia manggawik-gawik paruik.
Dek karano ndak ado nan manjawek, makin heboh lah Baruak. Sakali 44 datiak inyo maariak-ariak mangecek an urang sabalik pro-anjiang, urang sanagari alah terperdaya tipu muslihat anjiang. Tapi cuma talok baturo-turo mode itu di halaman lapau sajo.
“Yolah cilako kalian sadonyo, yolah ancua nagari ko,” kecek Baruak saparo marauang.
“Gasak, Ruak”
“Ebat ang, Ruak”
Basorak Cigak jo Siamang sakali lai. Makin kareh tapuk tangan e. Kini nan duo ikua tu alah tibo di ateh batang jariang nan jaraknyo makin jauah dari lapau.
Ati Baruak makin padek, keyakinannyo makin kareh, cuma inyo dan kawanannyo makhluk nan sadar jo bahayo anjiang di nagari tu. Urang sabalik ndak peduli, sebagian lainnyo malah pro-anjiang.
Dibukaknyo rebennyo dek Baruak tu–reben nan sajak tadi nyo pasang taruih. Dipatuiknyo ciek-ciek urang lapau tu.
“Pantek kalian sadonyo mah.” Ndak tatahan kato nan ciek tu akhirnyo kalua.
Dibukaknyo pulo bajunyo dek baruak tu. Sambia baputa-puta di halaman lapau, sambia batilanjang dado, makin nyo patuik urang lapau lakek-lakek. Mode ka ma ajak urang bacakak sabalik. Di dadonyo nampak tato dari spidol huruf A bacoret. Nyo pakai lo kabek kapalo nan ado logo A dilisangi. Lah bantuak Rambo.
Mak Datuak dari tadi tetap haniang. Tapi kini kapalonyo alah mancogok santai di jendela lapau. Baitu pun Cimporong Angek, kapalonyo alah pulo manjulua lameh ka lua jendela.
“Kini giko selah,” kecek Baruak dengan dado masih sasak sambia bajalan ka arah pintu lapau. Ndak main-main Baruak nampaknyo. Nyo baok bagai batang ubi panjang.
“Taruih Ruak, taruih,” Sorak Cigak jo Siamang dari jauah, antah dari ma. Suaro se tingga, nan badannyo tak tampak lai.
Urang lapau masih haniang sajo.
Makin dakek Baruak ka pintu lapau, makin barek bunyi angoknyo. Pas lah dakek pintu, pas ka malangkah bana kaki Baruak ka dalam lapau…
“Pantek!”
Jon Ladiang bacaruik pungkang. Antah dari ma nyo tibo.
“Pulang ang, pantek! Aden lapehan kabek ang, manggilo ang!”
Si Jon yobana emosi, marabo-rabo sambia mancampak an tali ka tangah halaman.
Baruak cuma bisa tatunduak. Nyo pasangnyo bajunyo. Nyo masuak an rebennyo ka dalam saku sarawa. Nyo bukak kabek kapalonyo. Tu nyo kaluang an surang tali baruak yang dibaok si Jon.
“Pulang ang kini juo. Kabek diri ang surang di tampek biaso!” Parentah Jon Ladiang sambia bakacak pinggang.
Malucuik se Baruak dalam haniang. Luruih jalan e ka rumah Jon Ladiang. Ndak madok-madok lai ka suok ka kida.
***
“La den kecek an, jan lapeh an juo baruak ang tu, Jon. Ang mada juo.” Kecek Mak Datuak.
“Patangko ka induak-induak di sawah nyo marabo-rabo, dek ado nan mamakai baju hadiah pupuak PhonskA.”
“Sabalun tu, bajadi-jadinyo bakatubah di simpang tigo. Anak-anak sadang latihan talempong. Untuang ado Ni Mar nan ma usia nyo.” Kato Mak Datuak agak prihatin ka Si Jon.
“Ndeh itulah, Mak. Tadi pagi bangkik se ibo den, nyo lah tigo hari bakabek sajo. Tu den lapeh an. Nyo la basumpah bagai maso indak ka mangamuak-ngamuak kalau dilapeh an.”
“Takana dek den, baa awal e tu sampai bantuak itu baruak ang?” Tanyo Mak Datuak.
“Kiro-kiro duo bulan nan lalu, inyo diputuihan pacarnyo, baruak banamo Aca.”
“Yo bana tarumuak barang ko, patah sapatah-patah e ati nyo,”
“Tu tibo-tibo timbua sajo panganyo untuak mancibo-cibo jadi intelektual, mancibo-cibo jadi akticis,” Tarang Jon Ladiang nan alah duduak di dalam lapau.
Mak Datuak cuma malongo mandanganyo. “O… Patuiklah.”
“Tapi bukannyo dulu inyo ang orbitkan jadi kapalo daerah?” Cimporong sato pulo batanyo.
“Iyo, tapi den dek tau utak nyo sayuik, dek den ibo pulo mancaliak inyo tamanuang buruak tiok hari, makonyo den pabian masuak kelompok belajar jo Siamang jo Cigak, samacam sakolah,”
“Den pikia lai ka batambah pangana e, lai ka ilang galau e, kironyo malah tabaliak kaji,” Jaleh si Jon nan kini mulai karah karongkongannyo. “Baelah kopi tu sakarek, Mak”
“Sabanta. Babahayo juo kaji e berarti tu, Jon?” Penasaran pulo Mak Datuak jadinyo. “Dima sakolah e tu?”
“Nyo carito baruak den tu, kaji di situ tu lai padek. Kecek den kok iyo pulo, ruponyo makin lamo makin ndak tantu ujuang pangka kecek-kecek e. Lah bantuak urang tasapo antu aia,”
Manggeleng si Jon saparo ndak picayo. Di lubuak hatinyo nan paliang dalam, si Jon tu sabana sayang ka baruaknyo, sa sayang inyo ka anjiangnyo.
“Tau, Mak kan, batang baringin di Lurah Bodi, dakek pincuran lamo, ado tampek e situ, Mak,”
“Den antaan bana nyo dulu ka situ pai mandaftar. Kok ka lai jadi akticis gadang lo inyo, kok ka lai cerah lo masa depan nyo.” Sambuang si Jon.
“Eh, takana dek den, memangnyo akticis ko a kini ko?” Tanyo Cimporong Angek serius.
“Yo mode baruak den tu.” (*)
