Cubadak Kantang

Sadang Talamak

Katiko hari baru parak siang, urang-urang alah manokok-nokok pintu rumah Datuak Cubadak Kantang. Antah bara kali Jon Ladiang maimbau-imbau tapi Mak Datuak indak juo manjawek. Lah dicubo pulo dek Cimporong manokok belek bakali-kali di dakek jendela biliak Mak Datuak, tapi Mak Datuak indak juo tajago.

“Kito tinggaan selah lai?” Kecek Cimporong.

“Dicubo sakali lai manokok pintu rumah e ko baa, Da Cimp?” Jawek Jon Ladiang.

“Alah tigo hari baturuik-turuik kito ka siko tiok parak siang, indak juo jago-jago inyo doh. Tapi katiko sore hari nampak inyo sadang duduak-duduak di tangah balai, selalu se kecek e takalok, indak tadanga urang maimbau, bahkan dikecek an pulo dek inyo kalau awak-awak ko sabana e ndak pernah bagai manjagoan e, dan banyak alasan e lai.”

“Tu baa rancak e manuruik Da Cimp?” Tanyo Sijon habih aka.

“Barangkek selah wak lai. Memang ndak nio ikuik inyo tu mah. Kanai ota se wak mah dek paja kanciang ko.” Jawek Cimporong mulai ndak saba.

“Den setuju se nyo kalau ditinggaan se datuak kalera ko. Tapi, masalah e, Mak Datuak ko paralu diajak, sebab inyo nan bisa mangecek an soal Tanah Ulayat ko dalam pandangan adat.”

“Bukannyo wa ang kapatang bisa juo mangecek soal itu?” Solo Cimporong.

“Lai. Tapi den cuma maulang-ulang apo nan dikecek an Mak Datuak se nyo. Kalau ditanyo bana, ndak bisa pulo den manarangan do.”

“Eee bingkaruang yo. Samo se ang jo nan lain mah. Sabana lancar kalau pepatah-petitih, tapi kiro e cuma hafalan. Kalau sakadar bantuak itu se, kalempong anjiang bisa juo disuruah manghafal pepatah-petitih mah.” Kecek Cimporong mulai tabik rabo e dan ndak tantu apo nan ka dikarajoan lai.

“Yo ba a ka baa, Mak Datuak ko harus ikuik. Wak undur se sampai bisuak pai demo ko baa Da Cimp?” Pintak Sijon.

“Yolah. Tapi, kalau bisuak indak juo jago paja ko, den baka rumah e lai.” Jawek Cimporong langsuang bakirok dari laman rumah Mak Datuak. Ndak lamo sasudah Cimporong bakirok, Sijon bakirok pulo ka rumah e.

Baru saparoh jalan, Sijon babaliak ka tampek Mak Datuak. Di dalam ati e inyo masih penasaran, ba a dek Mak Datuak payah bana dijagoan. Sebab, ba a kecek Cimporong tadi tu, walaupun payah dijagoan katiko parak siang, Mak Datuak ko tetap mancogok di tangah nan rami katiko hari lah sore. Katiko ditanyo ba a dek ndak jago, memang banyak bana alasan Mak Datuak tu.

Sijon sabana yakin kalau Mak Datuak ko icak-icak lalok se. Katiko alah sampai di dakek rumah Mak Datuak, Sijon sangajo manyuruak sabanta di baliak batang pisang mancaliak situasi. Diambiak e batu bata tigo batang di balakang rumah Mak Datuak dan dilayok-an e kuek-kuek ka atok rumah Mak Datuak. “Praaaaangkaaaang, tumpraaaang, kraaaangkaaang…” kiro-kiro bantuak itu bunyi atok rumah Mak Datuak kanai daram dek tigo batang batu bata. Sijon langsuang babaliak ka batang pisang tadi manunggu Mak Datuak kalua.

Ndak lamo sudah tu, nampak dek inyo Mak Datuak tapere-pere kalua dari pintu rumah e sambia mambaok pedang sapanjang panggalan. “Woi pantek, pantek kalian sado e, sia nan ma ampok atok rumah den, kalua lah kalian pantek, pantek kalian sado e, den dabiah kalian kini ko juo!”

Mancaliak pedang Mak Datuak sabana mangkilek dan sapanjang tu, manggigia badan Jon Ladiang sakali. Badoa-doa inyo di dalam ati supayo indak nampak inyo dek Mak Datuak sadang manyuruak di baliak batang pisang tu. Katiko Mak Datuak alah masuak baliak ka rumah e dan suasana taraso alah mulai aman, Jon Ladiang langsuang balari takangkang-kangkang ka rumah e. “Kanciang datuak tu mah,” kecek Sijon katiko sampai di rumah e dan maminum ayia putiah banyak-banyak.

Ndak lamo sasudah tu, babunyi hape Sijon. Katiko dicaliak e, kiro e talepon dari Cimporong.

“Halo, Da Cimp?”

“Wa ang nan ma ampok atok rumah Mak Datuak tadi tuh?”

“Ha? Kok tau Da Cimp?”

“Awal e den lah tibo di rumah, tapi ndak lamo sudah tu, babaliak den ka rumah Mak Datuak baliak. Den manyuruak di baliak kandang ayam e. Ndak lamo sudah bunyi badangkang tu, nampak diden urang balari sajadi-jadi e. Kalau dicaliak dari gaya lari e, itu bantuak gaya lari ang katiko takuik nampak diden. Ndak lamo sudah tu, den bae pulo balari ka rumah.”

“Iyo. Aden tu mah.”

Akhirnyo Cimporong jo Jon Ladiang sepakat untuak babaliak ka rumah Mak Datuak saat itu juo. Setelah rencana disusun dengan matang, langsuang barangkek nyo ka rumah Mak Datuak. Katiko sampai di situ, langsuang didobraknyo pintu rumah Mak Datuak dan pareman baduo tu langsuang mamacik an Mak Datuak kuek-kuek.

“Woi kanciang, ado apo ko?” Sorak Mak Datuak takajuik gadang.

“Ang mangecek ka ikuik-sato manolak sertifikasi Tanah Ulayat, lah tigo hari kami ka siko, ang icak-icak pakak se taruih. Lai sabana nio ang manolongan ha!?” Hariak Cimporong ka Mak Datuak. “Jaleh-jaleh se lah lai, kanciang!”

“Lai. Nio bana den nyoh. Tapi, masalah e, setelah den pikia-pikia, kalau den dukuang sertifikasi, buruak pulo namo den beko. Kalau den tulak sertifikasi, indak lo ado untuang e secara personal ka den doh. Jadi, rancak diam se den lai sampai ado nampak dima untuang e ka den. Bakirok lah kalian dari rumah den kini ko juo! Den sadang talamak jadi urang nan ndak peduli, kalian malah manggaduah!”

“Bukannyo dulu katiko ado pulo persoalan di Minangkabau ko, Mak Datuak nan tagak paliang di muko sambia mangecek soal pentingnya kerja bersama. Bahkan batambah-tambah pulo jo pepatah-petitih, ‘barek samo dipikua, ringan samo dijinjiang’, ‘duduak basamo balapang-lapang, duduak surang basampik-sampik’, ‘lamak dek awak katuju dek urang’ dan sagalo macamnyo tu? Solo Jon Ladiang.

“Hehehe. Picayo lo ang tuh?” Jawek Mak Datuak tagalak-galak. (*)

 

Ilqusitrasi oleh: Graphirate

Related posts
Cubadak Kantang

Ma Tau Den, Den Anjiang!

Cubadak Kantang

Sijon Kanai Tolak dek Sarah

Cubadak Kantang

Pandai-pandai Pak Anjiang Sajalah Lagi

Cubadak Kantang

Pengumuman

Tinggalkan Balasan

Alamat email Anda tidak akan dipublikasikan. Ruas yang wajib ditandai *