Cubadak Kantang

Rusak Dek Talatak

Biasonyo jam 10 malam kadai Datuak Cubadak Kantang lah ditutuik. Tapi sakali tu dibukak labiah lamo.

“Ado nan ka tibo.” Kecek Mak Datuak ma agiah kaba ka urang-urang nan sadang minum di tampeknyo.

“Sia tu?” Bangkik pulo tanyo Jon Ladiang.

“Ado lah ciek.” Jawek Mak Datuak.

“Lai piti masuak?” Solo Cimporong Batuah.

“Kalau wa ang nan batanyo, den jawek indak.” Baleh Mak Datuak. “Kok tibo nyo beko, kalian hanok-haniang selah yo. Padian se den baurusan jo inyo.”

“Ko yo gadang piti masuak e mah.” Kecek Cimporong sakali lai.

Ndak lamo siap Cimporong mangecek, mancogok lah kapalo paja nan ditunggu tu.

“Masuaklah, Nakan.” Sapo Mak Datuak.

Paja nan tibo tu yo sabana sopan. Bataratik bana. Basalam ka kasado urang di sinan, baiak nan di dalam kadai ataupun di lua kadai. Anjiang Jon Ladiang nan dikabek di sabalah kadai pun disalami nyo.

Dek mancaliak urang rami di kadai, agak tahambek muncuang paja tu ka mangecek. Tapi setelah dikecek an dek mak Datuak kalau urang di kadai tu lai awak-awak se, barulah talok mangecek dek nyo.

“Jadi musakuik ambo ka siko, yo mintak pituah ka Mak Datuak. Mungkin uwan-uwan ambo di siko alah tau kalau ambo sadang ado masalah.” Kecek paja nan tibo tu.

“Masalah apo tu? Ndak tau den do.” Solo Cimporong.

“Ang hanok selah dulu, Cimp. Padia lah paja anyia ko mangecek sabanta.” Pinteh Mak Datuak.

“Mohon maaf sabalik pinggang. Ambo lanjuik an mukasuik ambo datang ka siko. Jadi ambo sadang dipasamoan dek urang. Ambo ko sabana nyo ndak bisa apo-apo. Piti lai banyak, tapi aka ndak ado.”

“Tu apo masalah e?” Kecek mak Datuak.

“Ambo patang tu dapek pangana untuak manjebak PSK di Padang, supayo urang manyangko ambo peduli jo ABS-SBK. Ambo kan anggota dewan, jadi ambo paralu bana mancari muko ka urang-urang di Sumbar ko. Namun, dek pakaro mancari muko ko, kironyo muko baruak nan ta-ambiak dek ambo, Mak. Kanai galak an ambo dek urang kini. Ketahuan kalau ambo nan mambaok PSK tu dan ambo pulo nan manangkok.”

“Oh bitu pakaro e. Sabalun kito lanjuik, sia namo kamanakan ambo ko?”

“Namo ambo Gacik, Mak.” Jawek paja tu.

“Itu kan namo sebagai politisi, tau ambo nyoh. Namo asli e nan ambo tanyo.”

“Namo asli ambo Buyuang Karampang, Mak.” Jawek paja tu sambia manunduak.

“Jan manakua bantuak itu,” kecek mak Datuak, “angkeklah kapalo Buyuang tu dulu bia nak nampak dek kami muko baruak tu.”

Sasudah tagak kapalo paja tu, barulah Mak Datuak mulai mangecek. “Sabananyo ambo lah tau juo saketek kaba nan kamanakan sampaikan tadi. Jadi, daripado barumik-rumik dan bapanjang-panjang, langsuang selah kito ka pangka kaji.”

“Jadi ka maota-ota kosong se ko? Kok ka bantuak iko, den pulang lai. Bakasiak talingo den kalau hanyo mandanga ota ndak bakarunciangan ko. Ndak ado bagai teh talua anggota dewan tu do?” Solo Cimporong kanciang tu sakali lai.

Karano Si Buyuang karampang tu ndak juo manangkok sindia Cimporong, Jon Ladiang tapaso turun tangan.

“Sabalum Mak Datuak ma agiah pituah, kok dapek kami nan mandanga ko sambia mangulek-ulek handak e, Da.” Kecek Jon Ladiang ka pangka talingo Buyuang Karampang tu. “Jadih, Da. Pasanlah Da. Bia ambo bayia,” kecek paja tu langsuang mangaluan piti dalam dompet.

Sasudah urang di kadai tu mandapek jatah samo banyak, lah mahilia se surang-surang. Kini tingga Mak Datuak se nan mangecek baduo jo Buyuang Karampang tu.

“Kalau manuruik ambo, apo nan nakan lakukan tu yo bana ndak bautak. Kalau buliah ambo tau, lai ndak cirik anjiang isi kapalo nakan, kan?” Tanyo Mak Datuak. “Indak, Mak. Kalau ambo ndak salah, lai utak isi e, Mak, walau memang lah agak rusak. Rusak dek talatak.” Jawek Sibuyuang.

“Cubo kini pikia jo utak nan tasiso tu. Cuma untuak ma ambiak muko ka urang rami, lalu bajadikan PSK sabagai umpan. Ba a ka ba a, PSK itu lai urang juo mah. Harus dicarian caro e. PSK ko persoalan e rumik. Harus dari sagalo suduik dicaliak. Ndak cukuik dicaliak jo kacomato baiak-buruak se do. Di satu sisi, PSK ko adolah korban dari kondisi sosial-ekonomi. Sudahlah inyo korban ketimpangan, bakorbankan pulo sakali lai. Duo kali kanai bana nyo.”

“Sabanta, Mak. Ndak paham ambo do, Mak.” Pinteh Buyuang Karampang.

“Singkek kato, kok nak tau jo gadang ombak, caliaklah ka pasia nyo. Kok nak tau jo gadangnyo batang, caliaklah ka pangkanyo.”

“Apo musakuik e tu Mak?”

“Alun manangkok juo ang lai tampuruang?” Mulai tabik rabo Mak Datuak dek nyo.

“Alun, Mak.”

“Yo sabana payah kalau dahan tinggi, tapi panggalan sayuik.”

“Bisa dijalehan Mak?” (*)

Related posts
Cubadak Kantang

Ma Tau Den, Den Anjiang!

Cubadak Kantang

Sijon Kanai Tolak dek Sarah

Cubadak Kantang

Pandai-pandai Pak Anjiang Sajalah Lagi

Cubadak Kantang

Pengumuman

Tinggalkan Balasan

Alamat email Anda tidak akan dipublikasikan. Ruas yang wajib ditandai *