Datuak Cubadak Kantang tibo-tibo se mangumpuan sagalo jenis urang di kampuang e. Mulai dari jenis urang nan selalu manalepon kareh-kareh mambahas piti masuak di tangah urang rami sampai ka jenis urang nan selalu tasingguang kalau namonyo ndak disabuik di acara-acara penting. Ditalepon e urang tu ciek-ciek dan dengan penjelasan nan sabana panjang dijalehan e kondisi-kondisi terkini di Minangkabau.
“Tunggu sabanta, jan marepet juo muncuang Mak Datuak tu dulu, den mangecek sabanta dulu. Inti e apo sabana e kini koh? Lah satangah jam Mak Datuak mangecek, yo ndak manangkok den ciek alahe do.” Solo Jon Ladiang katiko Mak Datuak manalepon e.
“E pantek yo. Baru ka mulai carito Cubadak Kantang ko baru, lah bacaruik den dek ang sakali.” Jawek Mak Datuak agak naiak spaning e.
“Yo apo inti e nan Mak Datuak sabuik an tadi…”
“Kito harus bakumpua!” Hariak Mak Datuak.
“Nah, kan jaleh tuh. Itu se nan paralu tau diden nyoh.”
Mak Datuak mangumpuan urang-urang tu di sebuah tampek nan cukuik jauah dari kampuang tu, sabuah lapau nan isi e cuma Mak Datuak dan urang-urang nan alah diundang tuh. Paralu wakatu ampek jam naiak oto ka tampek tu dan bajalan kaki sekitar 30 minik. Kecek Mak Datuak, tampek itu dibuek khusus untuak rapek-rapek penting. Rapek niniak-ngangak jo cadiak-pandia mambahas asoi tabang pun pernah dilakukan di tampek rahasia tu. Baitu itu juo rapek para Calon Gubernur Sumbar katiko mambahas kehebatan mereka masing-masing dalam hal ma aja ikan baranang, lah bakali-kali pulo diadoan di sinan.
Jon Ladiang tibo di tampek tu paliang terakhir sambia manyumpah-nyumpah dek tasasek bakali-kali. “Acara pantek apo ko dek harus di siko bana tampek e. Anjiang den se pai mangawan ndak sajauah ko bana do lah,” Sijon marutok surang sambia manyapo urang nan alah dulu tibo.
Setelah muncuang Sijon tu baranti mangecek dan inyo alah duduak mamasan extra joss susu, barulah Mak Datuak mambukak carito. Mak Datuak mamulai pembicaraan jo muko kalam. Padahal, beberapa saat sebelum e muko Mak Datuak ceria bana, bantuak ka manyampaikan kaba baiak.
“Dunsanak ambo kasadonyo,” kecek Mak Datuak agak tasandek-sandek, “binga nan indak basabuik namo, engak nan indak basabuik gala. Tak tontong kalamai jaguang. Tagundang-gundang kacambuang basi. Cukup sekian dan terimakasih.”
Siap mangecek tu, Mak Datuak langsuang batuak-batuak dan tibo-tibo diam-tagang se sakali. Bantuak vespa mogok.
Urang manunggu sampai sapuluah minik dan inyo tetap diam.
“Ha? Itu se nyo?” Solo Cimporong Batuah mulai mangecek. “Alun bakacau bagai kopi den lai, lah sudah se acara ko sakali!”
Mak Datuak tetap diam se. Pandangan e kosong.
“Nan ka iyo-iyo selah Mak.” Kecek nan lain agak cameh.
5 minik berlalu. Mak Datuak masih diam.
“Lai ndak maningga-ningga an parangai Mak Datuak goh?” Nan lain manyolo pulo.
Mak Datuak tetap diam. 10 minik berlalu.
Akhir e, Cinta anak Pak Haji nan awal e mancaliak sajo apo nan tajadi, kini ikuik pulo mangecek. “Mak Datuk, kenapa Mak Datuk nih? Cinta sangka sudah lurus pengana Mak Datuk, ternyata belum juga lagi. Sudah dikecatkan oleh Cinta kan, jangan tonton terus video umang-umang memanjat pohon kelapa tuh, tapi Mak Datuk madar juga dikecatkan.
Kalaupun Mak Datuk nia benar menontonnya, tentu itu hak Mak Datuk, tapi tolong jangan diceritakan pula ke Cinta tiap hari, jangan sampai ikut terbalik pula isi kepala Cinta dibuatnya. Ada sadar Mak Datuk tuh? Sudah lah, Cinta ndak mau lagi sata-sata apapun yang Mak Datuk sorongkan. Semak pengana Cinta dibuatnya.” Sasudah baturo-turo ka Mak Datuak, Cinta langsuang bakirok dari tampek tu.
Mandanga kecek Cinta tuh, Mak Datuak ndak sakadar diam, tapi langsuang galak-galak surang. Urang nan maimbau-imbau indak dijawek e dek inyo. Mak Datuak sibuk jo pikiran e surang dan mato e manarawang kama-kama.
“Halo? Mak Datuak? Lai tadanga ambo maimbau?” Kecek Cimporong sambia mandakek an talapak tangan e ka muko Mak Datuak. Dek mancaliak keadaan Mak Datuak semakin parah, cameh pulo Jon Ladiang dibueknyo.
Mak Datuak memang acok tabaliak se utak e tibo-tibo. Tapi, itu biasonyo sakijok lalu sae, bantuak listrik nan padam salayang dan sudah tu lah iduik baliak. Namun kini ko memang babeda bana. Agak gadang konslet nan tajadi di kapalo Mak Datuak agak e sahinggo lumayan lamo padam e.
Sijon mancubo-cubo mangguncang-guncang badan Mak Datuak dan saketek alahe indak juo gaek tu sadar. Tetap se inyo galak-galak surang sambia manarawang antah kama-kama. Kadang lai tadanga suaro Mak Datuak mangecek tapi antah apo nan dikecek an e. “Eberebeb-eberebeb-eberebeb…” Cuma itu se nan tadanga dari muncuang e.
“Dek apo lah Mak Datuak ko yo?” Tanyo Cimporong sabana cameh ka urang-urang lain nan ikuik cameh. “Jon, anjiang ang lai bisa maubek Datuak ko?” Tanyo Cimporong sambia manyuruah Jon Ladiang baliak ka kampuang manjapuik anjiang e.
“Lai. Tantu se bisa. Anjiang den kan memang spesialis maubek datuak-datuak nan ilang aka bantuak iko. Tapi manga lo harus den japuik? Rancak Mak Datuak ko bana nan wak baok pulang lai.” Jawek Sijon.
Setelah badebat cukuik lamo, akhirnya Sijon mangalah. Langsuang nyo japuik anjiang e ka kampuang dan babaliaknyo ka tampek samulo. Mak Datuak samakin manjadi-jadi dan urang-urang lah manunggu jo perasaan panik.
Katiko Jon Ladiang tibo, anjiang e langsuang maidu-idu badan Mak Datuak. Biaso e sakali idu se lah tantu apo panyakik e sakali, tapi sakali ko agak lamo pulo anjiang Jon Ladiang tu maidu-idu.
“Ndak ado masalah apo-apo do.” Kecek anjiang tu.
“Ang idu bana lah dulu, anjiang. Lai subana ang idu tadi tuh?” Kecek Cimporong.
“Alah den idu, Cimporong kanciang. Lah sasak lo angok den dek maidu, ndak ado tabaun panyakik diden doh!” Jawek anjiang tu baliak.
“Kalau ndak ado apo-apo, tu ba a dek tibo-tibo ele se paja ko dek ang?” Sasak Cimporong.
“Yo ma tau den!” Kecek anjiang tu agak mang-gas.
Dek karano indak juo ado dapek solusi, akhirnyo Mak Datuak dibaok baliak ka kampuang. Tibo di kampuang, langsuang dibaok basamo-samo ka rumah e. Sasudah tu, Sijon jo Cimporong babaliak ka rumah e surang-surang.
“Den sabana e tau apo nan tajadi ka Mak Datuak,” kecek anjiang tu katiko sadang bajalan pulang baduo jo Sijon.
“Ha? Ba a ndak ang kecek an daritadi?” Sorak Sijon.
“Sagan den. Malu nyo beko.”
“Memang e ado apo tu?” Sijon sabana penasaran.
“Sabana e inyo tu tadi nio ka ma agiah surprise ka Cinta. Inyo ka manyampaikan perasaan e ka Cinta di hadapan urang rami dan di tampek nan spesial. Lah lamo bana inyo suko ka Cinta anak Pak Haji tuh. Kalau dari apo nan tabaun diden, bantuak e tadi katiko Cinta sadang pai kajamban, tabaco dek Mak Datuak tu WA di hape Cinta. Di chat tu Cinta mangecek an ka kawan e kalau nyo ndak katuju jo cowok nan suko manonton video umang-umang mamanjek karambia.”
CINTA: Eh kamu tau ga sih, aku tuh ilfil banget loh sama cowok ganteng tapi sukanya menonton umang2 mamanjek pohon kelapa.
NABILA: Wkwkw. Emang ada ya cowok kayak gitu?
CINTA: Ihh, ada loh. Di kampung aku.
NABILA: Trus, kamu suka sama dia?
CINTA: LOL. Ya gak lah, bebs. Yg bener aja :v
“Serius itu isi chat e nan tabaco dek Mak Datuak?”
“Berdasarkan nan tabaun diden tadi, iyo bantuak itu kiro-kiro.” Kecek anjiang tuh.
“E yayai yo. Patuiklah konslet Mak Datuak dek e sakali!”
“Ndak konslet doh, tapi langsuang maledak gardu tu sakali”
“Haha. Baa ka aka lai?” Sijon malah tagalak.
“Padia selah dulu. Ganti se kabel e bisuak lai.” Jawek anjiang tuh. (*)
Ilustrasi oleh: Hidayatul Azmi // @teawithami
