Sasudah Mugarik, Cimporong Batuah manalepon Datuak Cubadak Kantang bakali-kali dan Mak Datuak sangajo ndak ma angkek talepon tu. Sebab, kalau lah Cimporong nan manalepon, lah ka pasti se bukan persoalan piti masuak. “Kama lah Datuak bingkaruang ko ha,” rutok Cimporong. Setelah ditalepon pakai nomor nan babeda, langsuang diangkek e dek Mak Datuak.
“Halo?” Jawek Mak Datuak sabana basumangaik.
“Daritadi den talepon lai, ndak ba angkek-angkek.” Solo Cimporong.
“Ndeh, wa ang pulo kiro e.” Jawek Mak Datuak langsuang ndak basumangek. Lah tabayang dek Mak Datuak hal-hal nan ka manambah sakik kapalo.
Sasuai nan diduga dek Mak Datuak: “Tolongan den ciek ha. Tugas sakolah anak den. Ndak tantu jawaban e diden do.” Kecek Cimporong mambana.
“Lah sagalo e ka den batanyoan mah, Cimp. Ndak ado urang lain nan lai cadiak di nagari ko do?”
“Manga lo harus den cari urang lain, kalau Mak Datuak ado. Mangecek an Minangkabau ko alah Islam samanjak zaman Nabi Adam se bisa Mak Datuak, maso iyo manolongan tugas anak den se ndak bisa.” Baleh Cimporong.
“Ma lo bisa bantuak itu dibandiangan.”
“Baa lo dek ndak bisa?”
“Tugas sakolah tu urusan e jo ilmu-pengetahuan, kalau soal sejarah Minangkabau ko cuma pakaro baa anjiang ka manyalak se tu nyo.” Jaleh Mak Datuak. “Ang talepon selah Jon Ladiang yo.” Kecek Mak Datuak mamatian talepon.
“Yolah pantek Datuak mah.” Rabo Cimporong dek karano baru mulai mangecek tapi kiro e talepon alah mati.
Dek Mak Datuak pantang diarok, akhir e Cimporong manalepon Jon Ladiang.
“Halo, Da Cimp. Apo kaba tu?” Jawek Sijon langsuang ma angkek talepon.
“Tolongan ciek. Tugas sakola anak den ha, tentang Budaya Alam Minangkabau.”
“Ondeh, Da Cimp. Sajak bilo lo den paham jo Minangkabau ko. Ka Mak Datuak rancak e minta tolong lai.” Jawek Sijon. Cimporong langsung manjalehan kalau Mak Datuak sadang pantang diarok an. Cimporong pun ndak tau ka sia pulo ka minta tolong lai.
“Baru takana diden,” jawek Jon Ladiang, “anjiang den paham Minangkabau ko mah. Minggu kapatang anjiang den diundang jadi narasumber tentang Minangkabau ko basamo akademisi, ahli adat, pemerintah, dan lain-lain.”
“Ndeh, kalau sampai turun tangan pulo anjiang ang, jan pulo lai. Terlalu canggih jawaban e untuak anak sakolah. Tau pulo guru e beko.” Pintak Cimporong.
“Aman se tu nyo, Da Cimp. Bia den kecek an beko ka inyo. Tapi, masalah e, lai ndak takaja-kaja kan?”
“Iyo. Untuak bisuak pagi bana ha. Lah manangih-nangih anak den ha.” Cimporong sabana baharok ka Jon Ladiang.
“Anjiang den tu sadang pai turuik-kawan kini. Lah tigo hari ndak pulang. Biaso e saminggu lamo e baru mancogok e baliak di laman rumah. Walaupun ahli Minangkabau, tapi baa ka baa inyo kan anjiang juo. Kok sadang musim mangawan, yo ndak bisa lo kito gaduah do. Kapatang se ado calon Gubernur nan mamintak anjiang den untuak rapek tim sukses, tapaso den jawek jo jawaban nan den sampaikan ka Da Cimp sabanta ko.” Jaleh Jon Ladiang.
Cimporong sabana binguang ka mintak tolong ka sia lai. Jon Ladiang pun indak bisa manolongan labiah jauah.
“Den ado caro ciek. Tapi tolong jan kecek an ka urang lain ndak.” Kecek Jon Ladiang.
“Jadih. Apo tu?” Jawek Cimporong.
“Apopun pertanyaan e, jawek se: Adat Basandi Syara, Syara Basandi Kitabullah (ABS-SBK). Baa?”
“Apopun pertanyaan e, itu se jawek?” Baleh Cimporong
“Batua. Itu bana nan den dapek. Tapi jan kecek-kecek an ka urang lain ndak. Iko baru ka Da Cimp bana den bukak mah. Mambana den. Inti e, kalau ndak tantu apo nan ka dijawek tentang Minangkabau ko, mako jawek se jo: ABS-SBK.”
“Lai ndak ang ota se den ko?” Sasak Cimporong.
“Kalau ndak picayo, sama-samo wak tunggu se anjiang den tu pulang mangawan. Tanyo bana lah dek Da Cimp ka inyo nantik.” (*)
Ilustrasi oleh: @teawithami
