Cubadak Kantang

Limo Syarat Jadi Gubernur Versi Dt Cubadak Kantang

Lah heboh urang sakampuang dek mandanga kalau Datuak Cubadak Kantang ka diwawancara dek tipi. Wawancara ekslusif tentang Calon Gubernur Sumbar. Sabagai niniak-ngangak nan alah berpengalaman jadi anjiang panjago pejabat-pejabat tinggi, pandapek Mak Datuak sangaik paralu dek urang banyak.

Tigo hari sabalun wartawan tu tibo, Cimporong mambaok camin sagadang pintu Masajik ka kadai Mak Datuak, supayo Mak Datuak tu bisa latihan mangecek di muko camin nantun. Dan, sasuai jo nan disarankan Jon Ladiang, Mak Datuak pun alah mambuek catatan singkek di karateh ketek untuak dicigok-cigok salayang kalau agak lupo jo nan ka disampaikannyo. Iko nyo isi karateh tu:

  1. Gubernur Sumbar ko harus punyo kemampuan basipakak. Iko memang sipaik kebanyakan urang, apolai kalau lah jadi tokoh. Dek mangko baitu, sebagai pejabat tinggi di tingkat provinsi, seorang Gubernur paralu mamaliharo sipaik nan ciek ko. Sipaik nan ciek ko akan sangaik baguno di duo kondisi. Partamo, katiko masyarakat mulai manuntuik janji-janji kampanye nan alun juo dilakukan. Kaduo, katiko masyarakat mamprotes kebijakan nan marugikan atau kabijakan nan ndak masuak di aka. Hanyo jo caro basipakak ko Gubernur tetap bisa mangarajoan apo nan sasuai jo kepentingan pribadi jo kepentingan partai pendukung dan hanyo jo caro basipakak ko Gubernur bisa makan lamak jo lalok lamak walaupun di saat nan samo masyarakaiknyo samakin payah iduik dari hari ka hari.

 

  1. Barek Sabalah. Gubernur Sumbar ko harus barek sabalah. Kalau ado urusan-urusan kebudayaan ateh namo Sumatra Barat, mako harus selalu diartikan sebagai kebudayaan Minangkabau. Kalau ado misalnyo acara ateh namo Dinas Kebudayaan Sumbar, mako kebudayaan nan diurus hanyolah kebudayaan Minangkabau, sedangkan kebudayaan lokal lain di Sumbar ko dijadikan sajo antimun bungkuak atau dianggap ndak ado sajo. Bahkan sadapeknyo seluruh kebudayaan lokal di Sumbar ko harus disesuaikan jo kebudayaan Minangkabau. Sebagai mayoritas, pokoknyo kebudayaan Minang ko harus diposisikan sebagai standar untuak kebudayaan lain nan minoritas. Logika mayoritas harus ditagak an sajadi-jadinyo, yaitu logika sia nan rami berarti inyo nan bana, sia nan saketek ndak buliah ikuik sato; kabanaran adolah hak mayoritas dan bukan hasil mufakat basamo—kalau berdasarkan mufakat basamo tantu harus maikuik an sagalo kelompok, tapi kalau berdasarkan suaro mayoritas tantu hanyo berdasarkan apo nan sasuai dek nan paliang banyak se.

 

  1. Panduto gadang. Gubernur Sumbar ko harus panduto gadang. Kemampuan baduto ko yo bana paralu bana dipunyoi dek seorang Gubernur Sumbar. Apolai katiko ado kunjungan urang lua nagari atau pejabat pusat ka daerah, seorang Gubernur harus mangecek an soal kelebihan Sumatra Barat. Tiok bakunjuang ka tampek lain, seorang Gubernur tiok sabanta mangecek an alam Sumatra Barat ko indah permai dan masyarakaik e sejahtera, padahal di saat nan samo Gubernur tu tahu kalau di alam nan rancak tu banyak tajadi ilegal lojing, penambangan liar, perampasan lahan masyarakaik, dan lain sabagainyo. Baduto ko harus jadi kebiasaan sehari-hari seorang Gubernur. Kalau ado investor nan bakunjuang ka Sumbar, mako Gubernur harus memastikan bahwa tamu bakepeang tersebut alah mandapek sagalo pelayanan terbaik, tapi kalau ado masalah gadang nan paralu ditangani capek di dalam masyarakat bansaik, Gubernur ndak paralu capek-capek mamikian penyelesaian persoalan tersebut, dan Gubernur tu hanyo paralu mangecek an kalau pemerintah sudah bekerja semaksimal mungkin dan masyarakaik harus manarimo dengan ikhlas sagalo nan tajadi.

 

  1. Ambiak muko. Gubernur Sumbar harus suko ma-ambiak muko dalam kondisi apopun. Kok bisa, katiko mangecek soal Sumbar, nan langsuang tabayang dek urang adolah muko Gubernur. Bahkan kok bisa pulo, dek hanyo tau jo muko Gubernur, urang-urang di lua Sumbar ndak tau apo nan sabana e tajadi di Sumbar ko. Salain itu, nan paliang utamo, ambiak muko ko bisa manaiak-an karir seorang Gubernur. Mako baitu  Gubernur harus sigap mancaliak setiap peristiwa nan bisa dijadikan momen untuak ma-ambiak muko. Misalnyo, katiko ado prestasi di tingkaik skolah, Gubernur nan pa-ambiak muko harus mamposisikan prestasi nan saketek tu sabagai contoh umum seakan-akan kasado skolah-skolah di Sumbar bantuak itu pulo, padahal kenyataannyo banyak skolah di nagari-nagari di Sumbar ko nan ndak layak, tabangkalai, tertinggal, ndak dapek akses nan samo jo skolah lain, dan seterusnyo. Gubernur harus capek-capek mendatangi urang berprestasi tu dan bafoto basalam bagai sambia malagak seakan-akan sagalo prestasi tu adolah berkat inyo jadi Gubernur. Prestasi apopun memang harus kito syukuri tapi seorang Gubernur nan pa-ambiak muko harus manjadikan nan saketek tu sebagai tampek tagak supayo dirinyo nampak dek urang rami, dan ndak usah peduli jo kondisi skolah lain nan paralu juo diparatian.

 

  1. Seorang Gubernur Sumbar harus pandai mailak. Kalau ado urang nan mangecek an pendidikan di Sumbar ndak maju-maju, mako seorang Gubernur harus manuduah bahwa kecek urang tu ndak bana karano sajak dulu pendiri negara ko adalah urang cadiak-pandai dari Minang. Kalau ado urang nan mangecek an banyak panyakik-masyarakat di Sumbar ko, Gubernur harus pandai mailak dengan caro mangecek an semua itu bohong karano dulu banyak ulama terkenal dari Sumbar ko. Kalau ado urang nan mangecek an banyak anak-anak baranti sekolah dek ndak ado biaya, mako Gubernur harus pandai mangecek bahwa itu semua mustahil karena setiap anak di Minangkabau punyo mamak nan maurusnyo. Kalau ado nan mangecek an Sumbar ko semakin tinggi angka kemiskinan, maka Gubernur harus pandai mailak dengan caro mangecek an itu semua ndak bana karena Sumbar ko filosofinyo ABS-SBK. Kalau ado urang mangkritik karajo Gubernur, mako Gubernur harus mangecek an bahwa itu semua hanyo karano urang-urang nan mangkritik tu ingin manjatuahkan namonyo.

 

Jadi, itulah limo sifaik umum nan harus dipunyoi seorang Calon/Gubernur di Sumbar versi Datuak Cubadak Kantang.

“Kalau kalian ingin Sumbar ko ka bantuak-bantuak iko se, ndak ka barubah secara signifikan, mako cukuik ndak mau tau se kalian kalau basirobok jo Gubernur nan basifaik kalimo tuh”. Kecek Mak Datuak.

“Dari mano Mak Datuak tahu soal limo syaraik ko?” Tanyo Jon Ladiang. “Alah bara kali ganti Gubernur salamo den iduik, sifaik nan limo tu selalu mereka tunjuak an.” Lanjuik Mak Datuak.

“Tu ba a dek haniang se Mak Datuak salamo iduik ko?”

“Salagi pambagian lai rato, manga lo den ka sato-sato mamprotes. Mati anjiang selah lai urang lain.”

“Jadi urusan protes atau indak hanyo soal pambagian rato atau indak se nyo?”

“Demi meneruskan generasi Minangkabau oportunis, selayak e memang bantuak itu, Yuang.” (*)

 

Related posts
Cubadak Kantang

Ma Tau Den, Den Anjiang!

Cubadak Kantang

Sijon Kanai Tolak dek Sarah

Cubadak Kantang

Pandai-pandai Pak Anjiang Sajalah Lagi

Cubadak Kantang

Pengumuman

Tinggalkan Balasan

Alamat email Anda tidak akan dipublikasikan. Ruas yang wajib ditandai *