Cubadak Kantang

Lah Buliah Baruak Mandaftar Jadi Gubernur?

Matoari baru mulai ka mancogok, Jon Ladiang lah lewat baduo jo baruaknyo di laman rumah Datuak Cubadak Kantang. “Baruak se lah segeh, Tuan e apo lai,” sapo Mak Datuak. “Batua! Gagah den bana nan turun ka baruak den ko,” jawek Jon Ladiang bangga.

“Ka pai kama Sijon ko, basijadi bana teleng kopiah nampak diden. Lah bakameja bagai baruak Sijon kini,” kecek Mak Datuak. Langsuang dijawek dek Sijon, “Ka Padang. Ado urusan penting bana. Barangkek pagi den dek manunggu ANS lewat ko. Mudah-mudahan se lai dapek bangku di muko, bia tabukak pemandangan baruak den.”

“Urusan apo tu, dek jo Baruak bana pai. Ka baralek baruak Sijon lai? Lah bajodohnyo jo Baruak Padang?” Basijadi pulo tanyo Mak Datuak dek nyo.

“Yolah sansai Mak Datuak mah. Lah tigo bini baruak den ha, ndak talok den manambah e lai do.” Solo Jon Ladiang.

“Kok lai buliah den tau, apo padok Sijon di Padang kini?”

“Mandaftar jadi Calon Gubernur!” Jawek Sijon serius.

Dek mandanga jawek bantuak tu, raso saparo tingga jantuang Mak Datuak dek e. “Sia nan ka jadi Gubernur? Wa ang? Nan lai subana karajo selah ang karajoan, Jon. Mambana den,” kecek Mak Datuak ndak picayo.

“Indak wakden do Mak. Sadar bana den mah kalau utak den sayuik.”

“Tu sia nan ka wa ang daftaran? Baruak mantah ko?”

“Sia lo lai. Baruak den ko nan paliang cadiak di antaro baruak-baruak lain di nagari ko nyo.”

Dek ota pagi tu taraso agak barek dan lah mulai ndak masuak aka, Datuak Cubadak Kantang pun ma ajak Jon Ladiang minum kopi agak sakarek dulu. Datuak Cubadak Kantang agak curiga, jan-jan Jon Ladiang ko lah tamakan kajai dan lah tasandek se pangana e gara-gara itu.

“Ang talampau pagi manunggu oto mah. Masih galok sansai se hari ko baru. Minum lah wak agak saketek dulu. Alun barisi bagai paruik ang nampak diden lai. Lah pucek se roman ang dek urusan Pilgub ko mah. Kabek an lah baruak tu sabanta dulu.” Pintak Mak Datuak dan langsuang di-iyo-kan dek Jon Ladiang.

“Jadi sia lo nan mambisiak an ka ang?” Mak Datuak mulai mambukak ota baliak katiko Sijon lah minum kopi.

“Indak ado do Mak. Nan ciek ko memang pangana den surang.”

“Yakin ang kalau baruak tu lah bisa mandaftar?”

“Kalau soal itu, yakin bana den. Di bawah saketek dari keyakinan ka Tuhan.”

“Ba a tu dek lai yakin bana ang?”

“Setelah den caliak-caliak bara bulan ko, lah banyak urang dari rantau jo nan di Minangkabau ko tagak baliho e. Ado nan memang lah pasai dek jadi pejabat jo politikus. Ado pulo urang bisnis nan mancubo mancari pasaran baru di politik. Ado lo artis ibukota nan gaek e urang Minang. Ado nan garetak se nan gadang. Ado lo nan apak e atau laki e pejabat, tu anak e atau bini e lah raso ka lai pulo. Ado nan piti e banyak, partai gadang se dibayia e dek e. Banyak lah kiro-kiro, Mak.”

“Iyo tau den. Tapi itu kan lai anak urang sado e. Ndak anak baruak do.”

“Jan anggap remeh, Mak. Buliah kito adu debat jo calon nan lain tu. Pasti baruak den labiah paham jo Sumatra Barat ko. Sagalo jenis batang karambia di Sumbar ko pernah dipanjek dek baruak den. Ma daerah nan tingga tampuruang, ma daerah nan cuma masak di kulik tapi busuak di isi, ma daerah nan bacakak dek pakaro karambia anyuik, ma daerah nan kulik e buruak tapi santan e banyak. Tau bana baruak den. Ndak bisa den sabuik ka sadonyo. Pokoknyo jan anggap sepele baruak den ko.” Jawek Jon Ladiang sabana serius dan saketek pun indak bagarah.

Dek mancaliak Jon Ladiang serius, ma-angguak pulo Mak Datuak dek e.
“Kalau itu alasan ang, yo alun ado anak urang nan bisa saroman itu lai. Lah patuik pulo dicubo anak baruak mandaftar jadi Gubernur mah. Tapi…”

“Ba a dek pakai tapi pulo?” Solo Jon Ladiang.

“Baruak ang ndak ado gala datuak e do. Gubernur ko harus ado gala datuak e.”

“Kan bisa dibali nantik tuh Mak. Mak Datuak sangko sagalo gala datuak di namo pejabat tu memang co itu asli e?”

“Lai tau den nyo.”

“Tu apo lai nan Mak Datuak camehan?”

“Ndak murah harago e do Jon. Saungguak gadang pitih e tu mah. Saindak e ang bisa manjanjian proyek, baiak tapiliah ataupun ndak tapiliah. Lai talok dek ang? Utang ang se di kadai den masih banyak.”

“Serius tu, Mak?! Kalau itu yo ndak talok do. Tagadai sarawa kotok den dek nyo beko. Ndak bisa kalau jadi Gubernur ko sesuai kemampuan se. Kalau sesuai kemampuan se, manang baruak den mah.”

“Ma lo bisa!”

“Kalau bitu, den pinjam lah gala Mak Datuak dulu. Awak kan lai samo-samo kenal nyo. Lagian gala Mak Datuak itu ndak pulo ado guno e nampak diden do. Bautang di kadai se lai buliah, tantu maminjam gala Mak Datuak buliah pulo. Untuak mandaftar se nyo. Beko den baliak an sakali.”

“Ndak den! Ciek iko se pamenan iduik den tingga lai!”

“Jan bantuak urang baru kenal jo den, Mak. Den yo banyak utang, tapi den ndak pernah baduto.”

“Tau den nyo.”

“Tu apo masalah e?”

“Gala den ko sabana e lah dipinjam dek calon Gubernur nan lain. Ado urang dari rantau nio mandaftar pulo, nenek moyang bini e kaba e dari Sumatra Barat. Ang talambek salangkah. He-he.” Jawek Mak Datuak agak malu-malu.

“E kalemp*ng anji*ng yo. Patuik lah baoto baru Mak Datuak kini.” Manyumpah Jon Ladiang dek e sambia bakirok dari rumah Datuak Cubadak Kantang. (*)

 

Related posts
Cubadak Kantang

Ma Tau Den, Den Anjiang!

Cubadak Kantang

Sijon Kanai Tolak dek Sarah

Cubadak Kantang

Pandai-pandai Pak Anjiang Sajalah Lagi

Cubadak Kantang

Pengumuman

Tinggalkan Balasan

Alamat email Anda tidak akan dipublikasikan. Ruas yang wajib ditandai *