Cubadak Kantang

Iko Nyo Mukjizat Urang Awak

Tangah siang hari paneh sadang badangkang, katiko urang kampuang sadang lalok-lalok anjiang di rumah surang-surang, tibo-tibo se tadanga suaro urang mamakiak sajadi-jadi e. Makin lamo pakiak tu makin parah, sampai tadanga ka subaliak kampuang. “TOLOOOOONG! Ya Allah, Ya Tuhan!”

“Sia nan mamakiak bantuak itu bana tu?” Sorak amak Jon Ladiang ka anak e.

“Ndak tau den do, Mak. Tapi suaro e bantuak suaro Mak Datuak…” jawek Jon Ladiang langsuang talonjak.

“Cubo ang caliak ka situ sabanta lah,” parintah amak Sijon.

Baru se Sijon maiyoan kecek amak e, di lua rumah lah basorak pulo Cimporong Batuah.

“Jon, jon, jon, lai tadanga dek ang urang nan mamakiak tu?” Sorak Cimporong.

“Baru bana den sabuik jo amak. Raso-raso suaro Mak Datuak. Tapi antah iyo antah indak.” Jawek Sijon mancogok dari jendela rumah e.

“Itu pulo nan taraso diden. Bantuak suaro Mak Datuak. Turunlah ang dari rumah, Jon. Kito caliak ka rumah Mak Datuak tu sabanta kini ko juo.”

Suaro pakiak itu ndak juo baranti-ranti, Cimporong Batuah jo Jon Ladiang langsuang balari ka rumah Mak Datuak. Kiro e ndak cuma pareman baduo tu se nan basicapek ka situ do, lah banyak urang nan balari ka arah rumah Mak Datuak.

Katiko sampai di laman rumah mak Datuak, kironyo memang Mak Datuak tu bana nan mamakiak.

“Mak, mak, mak! Bukak pintu, Mak! Dek a Mak. Ko aden mah. Bukak pintu, Mak!” sorak Cimporong manokok-nokok pintu rumah Mak Datuak. Tapi percuma se Cimporong basorak, pakiak Mak Datuak malah samakin manjadi-jadi. “TOLOOOOONG! Ya Allah…Ya Tuhan!”

“Dobrak selah pintu rumah e tu, Da Cimp! Ndak ka tadanga bagai kito dek Mak Datuak tu doh!” Sorak Jon Ladiang.

Lah bara kali dobrak, Cimporong indak juo berhasil mambukak pintu tu do. Sebagian urang barusaho mancari caro lain untuak masuak ka dalam rumah tapi ndak kunjuang dapek jalan. “Kito dobrak selah basamo-samo lai!” Sorak urang nan alah rami di laman rumah Mak Datuak.

“Praaaak!!!”

Tigo kali antak, langsuang tapalantiang pintu rumah Mak Datuak. Sijon langsuang malompek ka dalam biliak Mak Datuak. Sebagian urang lain manunggu sajo di laman rumah dek takuik kok ado hal-hal mengerikan terjadi di dalam tu.

“Dek a, Mak?” Kecek Sijon mancaliak Mak Datuak takangkang buruak di muko camin gadang di dalam biliak e.

“Jooon, tolong den, Jooon!” Pakiak Mak Datuak langsuang tagak maminta tolong ka Jon Ladiang. “Yo Mak, ado apo tu, dek a, Mak?” Lanjuik Jon Ladiang.

Cimporong nan manunggu jo masyarakaik di laman rumah mulai ndak saba apo nan tajadi sabana e. Mereka hanyo mandanga Mak Datuak masih mamakiak dan Jon Ladiang taruih batanyo dek apo. Dek bantuak itu se taruih, Cimporong mancubo pulo masuak ka dalam rumah Mak Datuak.

“Dek a, Mak? Kecek Cimporong basorak. “Tolong den, Cimp! Tolong bana den, Cimp!” Jawek Mak Datuak. “Yo apo nan ka den tolong?” Lanjuik Cimporong.

Setelah Mak Datuak minum ayia sagaleh dan angok e mulai tanang, barulah ditanyo baliak dek Sijon jo Da Cimp. “Dek apo, Mak? Itu urang sakampuang alah manunggu di lua rumah ha, lah panik kami sado e.” Kecek Jon Ladiang barusaho mamparatian bahwa ndak ado tando-tando bahayo di badan mak Datuak atau di dalam rumah e.

“Utak den, Jon. Utak den…” Jawek Mak Datuak.

“Dek a utak Mak?” Kecek Cimporong.

“Utak den, utak den. Ndak nampak dek kalian kapalo den manyusuik bantuak bola kempes? Utak den ilang. Ilang utak den!” Pakiak Mak Datuak sambia mambukak kopiah e.

“Ondeh…Ya Allah Ya Tuhan. Iyo mah, Da Cimp! Dek a kapalo Mak Datuak ko, bantuak bola kempes bana. Ngeri bana den mancaliak e!” Sorak Jon ladiang sabana takuik sambia taruih mancaliak bantuak kapalo Mak Datuak.

“Eee kanciang yo. Den sangko kok apo pulo nan tajadi tadi. Lah panik lo urang sakampuang dek e!” Rabo Cimporong sambia manyipak kuek-kuek kaleng roti di dalam biliak tu.

“Ha? Dek a, Da Cimp?” Heran pulo Sijon dek e.

“Dek apo ang, anjiang kurok? Sajaleh ko den kehilangan, bantuak itu pulo kecek ang! Bakirok ang dari rumah den kini ko juo!” Hariak Mak Datuak sambia manangih taibo-ibo hati e.

“Manga lo aden nan disalahkan!” Hariak Cimporong, “bukannyo Mak Datuak memang ndak bautak salamo ko?”

“Eh iyo juo ndak,” solo Sijon.

“Ba a mukasuik kalian ko?” Kecek Mak Datuak.

“Ang tarangan lah ka Mak Datuak tu Jon! Den pulang selah lai. Karajo den sadang tagantuang pulo tadi,” kecek Cimporong sambia kalua dari rumah Mak Datuak dan mamintak urang nan alah rami di rumah Mak Datuak tu babaliak ka rumah surang-surang. “Pulang lai, dunsanak sadonyo! Pulang lai, ndak ado apo-apo lai, jan bakumpua juo lai, sadang korona bagai ko ha!” Sorak Cimporong manyuruah urang bakirok.

“Ba a dek bitu kecek Cimporong tu, Jon?” Kecek Mak Datuak.

“Batua juo Da Cimp tadi mah, Mak. Salamo ko kan memang urang sakampuang tahu kalau Mak Datuak ndak ba utak. Justru Da Cimp jo den nan heran, kok malah Mak Datuak baru tahu?”

“Demi Tuhan! Baru tahu bana den kalau tanyato den ndak bautak. Memang jarang den pakai sejak dulu, makonyo salamo ko ndak taparatian lo diden doh kapalo den koh. Den sangko lai masih taungguak juo utak dalam kapalo den.” Jawek Mak Datuak.

“Bersyukur juo lah, Mak. Alah tahu Mak kini walau talambek.”

“Tapi, takana lo diden, kalau emang den ndak bautak, kok masih bisa den bapikia yo? Jan-jan utak den ado sabana e, tapi latak e bukan di kapalo?” Kecek Mak Datuak penasaran.

“Bisa-bisa se nyo tu Mak,” kecek Sijon. “Bapikia ko kan ndak cuma jo utak se. Kalau khusus urang awak alah diagiah mukjizat dek Tuhan. Urang awak ko diagiah kemampuan bapikia jo banyak hal selain jo utak. Jo ampu kaki pun bisa bapikia. Jo ikua baruak se bisa juo urang awak bapikia. Jo talapak kaki bisa juo bapikia. Bahkan jo kalempong se bisa juo bapikia.”

“Iyo juo kecek ang mah Jon. Itu sebab e urang awak ko cadiak se sado alah e ndak? Serba ahli dalam banyak hal. Apopun nan dibahas urang-urang hebat di dunia ko, selalu urang awak ko langsuang ahli dalam bidang tu. Baiak di kampuang ataupun di rantau. Baru sadar pulo den!” Sorak Mak Datuak sanang.

“Nah! Tu mako e jan cameh pulo Mak Datuak ndak ado utak di kapalo lai. Utak ko kan cuma ciek dari sekian banyak pakakeh untuak bapikia.”

“Berarti jo apo den bapikia, Jon?”

“Kalau itu yo ndak tau den. Mak Datuak surang nan tahu tu nyo. Eh, betewe, den pulang lai yo Mak. Rang gaek den manunggu di rumah ha!” Kecek Jon Ladiang.

“Jadih, Jon. Mokasih banyak yo! Eh, Jon, ba a dek ang baok se kopiah den?” Sorak Mak Datuak katiko Sijon ka manutuik pintu biliak.

“Astaga! Maafkan den Mak. Ndak sangajo tasemba se dek tangan den tadi. Raso-raso aden se nan punyo. Tapi, kalau den pikia-pikia, untuak apo lo kopiah ko dek Mak Datuak lai?” Kecek Jon Ladiang.

“Jan ang baok pulo. Ciek itu pulo kopiah den lai. Paralu diden kopiah tu mah kok nantik jadi tokoh Minangkabau pulo den. Kini kan mudah se jadi tokoh. Ma tau kan!”

“Dari ma pulo Mak Datuak dapek kaba tu?”

“Tu mako e ang caliak-caliak juo lah berita terbaru. Banyak se muncul tokoh-tokoh Minang kini, salamo ko antah dima. Lah mamakai kopiah jo mamakai saluak kama-kama. Jan-jan kempes pulo barang tu. Ha ha ha!” Sorak mak Datuak barusaho malawak surang dan tagalak surang.

“He-he-he. Siaaap, Mak!” Kecek Jon Ladiang mahambuangan kopiah tu dari pintu biliak dan hinggok tapek di kapalo Mak Datuak. (*)

Ilusitrasi oleh: Talia Bara

Related posts
Cubadak Kantang

Ma Tau Den, Den Anjiang!

Cubadak Kantang

Sijon Kanai Tolak dek Sarah

Cubadak Kantang

Pandai-pandai Pak Anjiang Sajalah Lagi

Cubadak Kantang

Pengumuman

Tinggalkan Balasan

Alamat email Anda tidak akan dipublikasikan. Ruas yang wajib ditandai *