Cubadak Kantang

Heboh Dek Pakaro Asoi Tabang

Assalamualaikum Wr. Wb.

Dunsanak sekalian, baiak nan cubadak ataupun nan kantang, baiak nan anyuik di ayia tanang atau nan tabanam di ayia dangka.

Ijinkan ambo, Datuak Cubadak Kantang, sato sakaki pakaro asoi tabang nan dihebohkan urang Minang akhir-akhir ko. Kok banyak, ragu nan tibo. Kok lamo, lupo nan datang. Mako baitu kito sampaikan sajo sagalo nan pokok. Kok singkek bukannyo ndak nio balabiah, kok saketek bukannyo ndak nio batambah.

Kito sadang mahebohan banyak hal dan ambo nio bakomentar soal bahaso Minang dan Islam. Mari kito bukak kaji nan saketek tu.

Kutiko Al-Quran babaso Arab apokah itu mambuek bahaso Arab jadi istimewa? Iyo, tapi itu ndak berarti baso Arab tibo-tibo jadi suci saroman Al-Quran. Kutiko Al-Quran babaso Arab, mako itu ndak sakatiko mambuek bahaso Arab jadi bahaso umaik Islam sajo. Kutiko Al-Quran babaso Arab mako itu ndak mambuek seluruh ucapan atau tulisan bahaso Arab berarti ayat suci. Kalaupun ado urang non-Muslim nan babaso Arab, mako itu pun ndak akan mambuek bahaso Arab tibo-tibo jadi kain buruak jatuah ka banda.

Kutiko kitab suci agamo lain diterjemahkan ka baso Arab, apokah itu mambuek umaik Islam nan mangecek jo baso Arab tibo-tibo jadi karak narako? Indak. Kutiko ado kitab suci agamo lain nan babaso Arab apokah itu tibo-tibo mambuek Al-Quran jadi ndak bamutu? Indak.

Kalau kasado urang Minang menganut Islam, apokah itu mambuek baso Minang jadi bagian dari baso Arab? Iyo, kalau kecek buayo mabuak. Kalau kasado urang Minang menganut Islam, apokah itu mambuek bahaso Minang tibo-tibo jadi samo sakralnyo jo bahaso Al-Quran? Iyo, kalau kecek koncek gilo. Apokah kalimat “Adat Basandi Syara, Syara Basandi Kitabullah” samo sakralnyo jo satiok ayat Al-Quran? Iyo, kalau kecek pisang nan masak diparam.

Demikian pandapek dari ambo. Nan tinggi kok kurang anjuang, nan gadang kok kurang sambah, sabab dek sasak jo sampik, nan patuik di ateh kok taelo ka bawah, nan patuik di tangah kok tabaok ka tapi, maaf dimintak banyak-banyak, izin jo rela dari dunsanak kasadonyo.

Tertanda

Dt Cubadak Kantang

 

Ilusitrasi oleh: Talia Bara

Related posts
Cubadak Kantang

Ma Tau Den, Den Anjiang!

Cubadak Kantang

Sijon Kanai Tolak dek Sarah

Cubadak Kantang

Pandai-pandai Pak Anjiang Sajalah Lagi

Cubadak Kantang

Pengumuman

Tinggalkan Balasan

Alamat email Anda tidak akan dipublikasikan. Ruas yang wajib ditandai *