Cubadak Kantang

Cadiak Pandia

Samanjak mandapek kiriman hape dari kamanakan e dari Jakarta, lah kamari manalepon se karajo Datuak Cubadak Kantang. Pangana Mak Datuak pun alah indak di badan dibuek e. Ado urang lain nan dari tadi mamasan kopi susu, ka Cimporong nan baru tibo diagiah an e. Jon Ladiang mamasan teh talua, remot tipi nan dihonyok an e. Antah anjiang sia nan maluluang di subarang jalan, malah disangko dek Mak Datuak ado urang nan maimbau namo e.

“Bara nomor hape ang Jon? Den cubo talepon kini ha.” Kecek Mak Datuak manakua sae, sibuk mancaliak ka hape, sambia talunjuak e baputa-puta mancari dima latak angko nol.

“Nan kaditelepon tu urang nan jauah, Mak. Wakden se duduak di siko ha. Babisiak dalam ati se Mak Datuak tadanga juo diden mah.” Jawek Jon Ladiang.

“Yo sabuik an selah nomor ang tu, karapai. Bia den miskol kini ko juo sakali.” Sasak Mak Datuak.

“Kan lah Mak Datuak simpan nomor den patang. Lah bamiskol bagai mah?” Jawek Sijon.

“Itu kan kapatang den miskol katiko ang lah pulang. Cubo kini den miskol baliak. Ba a pulo bunyi hape ang tuh.” Lanjuik Mak Datuak sambia bausaho maingek-ingek dan mancari-cari dima nomor Jon Ladiang tasimpan dek e.

“Ka ba a pulo lah bunyi hape den. Lai bantuak-bantuak itu se bunyi e nyo, Mak.” Jawek Jon Ladiang baulang-ulang.

Dek karano Mak Datuak ndak takana caro mancaliak nomor nan alah tasimpan, ditambah pulo Jon Ladiang sadang pantang diarok-an pulo, ka Cimporong pulo madok Mak Datuak kini lai.

“Cimp, kalau ndak salah diden patang tu wa-ang lai pulo mamacik-macik hape. Lai hape nan bisa dimiskol tu? Cubo den miskol kini dari hape den.”

“Sabuik an selah nomor Da Cimp ka gaek tu. Ndak ka baa bagai tu doh.” Bisiak Jon Ladiang ka Cimporong saparoh tagalak.

“Sabuik an nomor ang tuh, Cimp. Apo lo susahnyo tuh. Kok mancakau induak ayam den suruah ang iyo lah.” Sasak Mak Datuak sakali lai.

“Sakali se buliah miskol-miskol nyo lah, Mak. Den ndak nio bantuak nan lain doh, tiok sabanta se Mak miskol. Sajaleh tu awak basirobok tiok hari di siko, manga dimiskol-miskol bagai tiok sabanta. Kapatang kaba e Mak Datuak mamiskol Jon Ladiang ntah bara kali jam 3 malam. Lah tasirok darah Sijon kok ado apo-apo. Katiko ditelepon baliak dek Sijon, kiro e Mak Datuak cuma mananyo bilo ka kadai lai. Padahal Mak Datuak tau mah, kami nan hampia tiok hari di siko.”

“Yo capeklah ha, bara nomor hape ang.” Mak Datuak samakin manyasak.

“123456*89. Itu nomor den.” Jawek Cimporong agak dongkol. Ndak lamo sudah tu langsuang manggaretek jo marauang-rauang ndak bakajalehan bunyi hape Cimporong ko. Dicaliak e ka layar hape e, cuma nomor se, indak ado namo e do.

“Mak Datuak nan manalepon ko kan?” Tanyo Cimporong.

“Indak. Alun jadi den miskol lai.” Jawek Mak Datuak masih sambia manakua. Dek Mak Datuak manjawek bantuak tu, mako diangkek e sakali talepon tu dek Cimporong. “Halo, sia ko?” Hariak e langsuang. Bakali-kali Cimporong manyabuik halo tapi ndak ado nan manjawek.

“Talepon se kini baliak, raso-raso den piti masuak tu mah,” Jon Ladiang manyolo.
“Ndak usahlah, maleh den maurus nan ndak pasti ko.” Kecek Cimporong sambia tagak mamasuak an hape e ka dalam saku sarawa e dan langsuang bajalan kalua dari kadai Mak Datuak.

“Lah pai se ang? Den alun jadi mamiskol lai.” Kecek Mak Datuak.

“Den pai kajamban sabanta.” Jawek Cimporong.

Katiko Cimporong alah kalua, mandakeklah Jon Ladiang duduak ka dakek Mak Datuak. “Yo lai rancak hape mak Datuak mah. Tapi, rancak disuruak an hape tu dulu, Mak. Beko se di rumah manalepon-manalepon urang. Lah bara hari ko banyak urang mangeluh dek Mak Datuak manakua se sapanjang hari. Lah teleang latak pariuak, ndak tau Mak Datuak do.”

Katiko Jon Ladiang masih mangecek sambia mancaliak-caliak ka layar hape mak Datuak tu, lah manggaretek pulo hape Mak Datuak ko sakali. Indak kalah manyamak pulo bunyi e dari hape Cimporong tadi. Langsuang sanang ati Mak Datuak mancaliak ado urang mangontak e. Kamanakan den mungkin ko mah, sangko Mak Datuak sambia ma agiah kode supayo Jon Ladiang antok.

“Halo, halo, halo, sia ko?” Kecek Mak Datuak.

“Tapi nomor situ nan mangontak siko tadi.” Kecek urang di talepon tu.

“Ndak ado siko mangontak do. Sia namo situ, bia tau pulo siko.” Jawek Mak Datuak sabana sanang bisa mangecek di talepon.

“Den Cimporong. Situ sia?”

“Ondeh, wa ang, Cimp? Tapi ang pai kajamban tadi, tu manga aden lo nan ang talepon?” Mangka ati Mak Datuak dek e.

“E yayai yo. Bukannyo kecek Mak Datuak alun jadi bamiskol den tadi lai? Yolah bingkaruang mah!” Tabik suga Cimporong dek e. Disangkonyo kok iyo pulo piti masuak nan mamiskol tadi tu. Lah basingajo bana dek nyo pai manyuruak untuak manalepon baliak.

Dek mancaliak Mak Datuak manyumpah-nyumpah, langsuang takikiah galak Jon Ladiang dibueknyo. “Hampehanlah hape kanciang tu lai ha!” Hariak Jon Ladiang taruih tagalak-galak. “Lah sakik kito dek pamenan baru Mak Datuak tu mah. Alah tuh, mambana den.” Kecek Jon Ladiang ndak bisa manahan galak mancaliak apo nan baru tajadi tu.

Ndak lamo siap tu tibo Cimporong mandudu se masuak ka dalam kadai Mak Datuak sambia marabo-rabo, “Kok bisa apo nan babaok ka nagari ko, dicaliak-caliak banalah dulu. Nan dibuek dek manusia di dunia ko pasti bisa dipagunoan untuak urang banyak. Tapi, tolong pastian dulu kalau awak surang lai paham sabana paham jo hal-hal baru nan babaok tu. Kalau alun takao dek diri surang, jan dibaok sato urang lain dulu. Cadiak kok balabiah, pandia jan batambah.

“Woi sipasan, dek a ang marabo ndak bakajalehan se ko? Manyindia den ang yo?” Hariak Mak Datuak.

“Ndak ado den manyindia Mak Datuak doh. Itu ha, ado urang.” Jawek Cimporong.

“Apo masalah ang jo den? Den masuak an batu lado ka dalam paruik ang tuh beko!” Lanjuik Mak Datuak kurang sanang.

Dek mancaliak Datuak Cubadak Kantang bantuak tu, naiak pulo spaning Cimporong dek e sakali, “Antanlah kok iyo!” Kecek e sambia manenju meja.

“Alah tu, Mak. Alah tu, Da Cimp. Mambana den. Kok ado nan ndak salasai, bungkuih nasi ka rumah surang-surang, barangkek ka ateh gunuang tu kini ko juo, bakuhampeh bana di sinan baduo, bia ndak ado urang nan tau.” Pinteh Jon Ladiang. (*)

Related posts
Cubadak Kantang

Ma Tau Den, Den Anjiang!

Cubadak Kantang

Sijon Kanai Tolak dek Sarah

Cubadak Kantang

Pandai-pandai Pak Anjiang Sajalah Lagi

Cubadak Kantang

Pengumuman

Tinggalkan Balasan

Alamat email Anda tidak akan dipublikasikan. Ruas yang wajib ditandai *