Cubadak Kantang

Cadiak Baruak

“Mak Datuak,” kecek Jon Ladiang ka Datuak Cubadak Kantang, “pakai piti limo puluah dulu lah. Bisuak malam den ganti. Paralu bana ha.”

“Untuak a dek ang? Lai ndak untuak ba ampok ko?”

“Ndeh, ndak ado den ba ampok lai. Ko paralu untuak ka pai beko sore ha.”

“Kama, Jon?”

“Pai wisuda baruak den. Ndak bisa pulo diwakilkan doh.”

“Ha, lah wisuda se baruak ang? Bukannyo patang ko baru masuak sakolah.”

“Ma lo patang ko dek Mak. Lah tigo lo tahun e mah.”

“Apo tu jurusan e?”

“Masih jurusan nan lamo. Ndak ado batuka-tuka doh. Ilmu Panjek”

“Lupo den. Apo keahlian e tu?”

“Baruak den keahlian khusus e ma ambiak karambia mudo.”

Agak lamo Mak Datuak bapikia-pikia sasudah mandanga jawek Jon Ladiang.

“Eh, tunggu sabanta, keahlian baruak ang yaitu ambiak karambia mudo?” Tanyo Mak Datuak taheran-heran.

“Iyo, Mak,” jawek Jon Ladiang, “gelar e M.Km, Master Karambia Mudo. Ba a tu?”

“Eh, kok Master? S2 baruak ang?” Samakin heran lo Mak Datuak.

“Tantulah iyo dek Mak. Tapi beberapa tahun lalu lah salasai S1 Jurusan Filsafat Karambia dan langsuang nyambuang nyo S2.”

“Eh yo cadiak lo utak e mah. Lah S2 se nyo. Tu maha lo kini minta tolong ma ambiak karambia ka baruak ang tuh?”

“Alun ka ma ambiak karambia lai, Mak. Rencana tahun muko ka lanjuik S3. Rancak langsuang se lai. Bia jadi Dotor sakali.” Jawek Jon Ladiang.

“Yo babayo lo baruak ang yo,” kecek Mak Datuak terkagum-kagum.

Dek lamak maota, lah lupo pulo Sijon tadi jo rencana e maminjam piti ka Mak Datuak. Agak lamo mangecek, Sijon langsuang permisi baliak ka rumah e.

“Bukannyo ang tadi maminjam piti ka den?” Solo Mak Datuak katiko Sijon alah lumayan jauah malangkah.

“Astaga. Batua. Itu pulo nan lupo den.” Jawek Sijon tagalak-galak sambia manapuak kaniang e dan babaliak ka rumah Mak Datuak.

“Tunggu dulu, masih ado nan jadi pertanyaan diden,” pinteh Mak Datuak, “kalau hanyo untuak manjadi ahli ma ambiak karambia mudo, ba a dek harus kuliah lo baruak ang? Bukannyo kasado baruak memang lah kepandaian asli e nan bantuak itu. Manga dek harus sikolah bana?”

“Kini ko memang baruak nan harus disakolahan lai. Manusia ko ndak paralu bana sakolah do.”

“Ha! Ba a dek bitu lo kecek ang?”

“Parangai dan kemampuan baruak lah diambiak dek manusia sado e. Ndak ado tasiso untuak baruak lai. Sehingga, baruak harus disekolahkan agar inyo kembali jadi baruak. Itu makonyo dek den piliah keahlian khusus baruak den adalah karambia mudo!”

“Tu cadiak lo baruak pado manusia lai tuh?” Kecek Mak Datuak agak cameh.

“Indak, Mak. Tanang selah. Manusia tetap cadiak. Baruak pun tetap cadiak. Cuma, latak nyo se nan batuka. Cadiak pandai untuak baruak. Cadiak baruak untuak manusia.”

“Ndak tarimo den doh!” Agak kareh suaro Mak Datuak.

“Tarimo atau indak, nan jaleh itu kenyataan hari ini.”

“Mustahil!”

“Tarimo selah, Mak.”

“Indak!”

“Kini giko selah. Babaliak ka urusan samulo. Den pinjam piti Mak 50 siap tu den ganti bisuak 200. Baa?”

“Jadih. Mantap lah nyo!” Sorak Mak Datuak.

“Tapi ado syarat e: Cadiak pandai untuak baruak dan cadiak baruak untuak manusia. Lai bisa Mak Datuak tarimo?” Tanyo Jon Ladiang.

“Lai!” Jawek Mak Datuak basilonjak. (*)

 

Ilusitrasi oleh: Amalia Putri

Related posts
Cubadak Kantang

Penyair Anjiang!

Cubadak Kantang

Anjiang Jon Ladiang Ditahan Rentenir

Cubadak Kantang

MATI ANJIANG!

Cubadak Kantang

Ota Ndak Sampai

Tinggalkan Balasan

Alamat email Anda tidak akan dipublikasikan. Ruas yang wajib ditandai *