“Jon?” Kecek Mak Datuak manalepon Jon Ladiang tangah malam.
“Yo?” Jawek Jon Ladiang masih mangantuak barek.
“Lah jago ang? Ko ado hal penting bana ha. Tolongan den ciek, Jon. Mambana den.”
“Apo tu?” Jawek e takajuik dan langsuang taduduak.
“Subskraib akun yutub den ciek. Jan sampai lupo ndak. Ang cari se di gugel tuh, ketik se namo den. Tolong sampaikan ka sado dunsanak ang yo. Bako ang bagai, ipa ang bagai, kasado e lah pokok e.”
“E yayai yo. Den sangko kok apo lo tadi. Lah bayutub lo Mak Datuak kini?” Jawek Jon Ladiang agak maleh sambia babaliak ka dalam salimuik.
“Iyo. Bisuak den wawancara ang yo. Kolaborasi wak.”
“Apo pulo nan ka den kecek an.”
“Sumbarang se lah Jon.”
“Jadi sabana e akun yutub Mak Datuak tu fokus e kama ko? Jan lah sumbarang bantuak itu.”
“Nan jaleh den isi se dulu.”
“Janlah bitu. Kok bisa ado fokus e agak ciek.”
“Apo contoh e tu?” Tanyo Mak Datuak penasaran.
“Yo misal e akun yutub Mak Datuak tu fokus menayangkan serba-serbi asoi tabang di Minangkabau. Tiok Mak Datuak pai bajalan kalua, kok nampak asoi tabang, langsuang kaluan kamera Mak tu capek dan rekam sakali. Turuik an kama asoi tu tabang sampai inyo manampiak baliak.”
Mak Datuak indak manjawek saketek pun. Inyo hanyo ma angguak-angguak sajo sambia mamikian saran dari Jon Ladiang.
“Ciek den rekam bantuak itu se nyo?” Kecek mak Datuak masih saparoh ragu.
“Tantulah indak, Mak,” baleh Sijon, “kalau lah banyak Mak rekam berbagai asoi tabang di Minangkabau, siap tu kan bisa Mak agiah siaran lanjutannyo.”
“Ba a mukasuik e tu?”
“Yo misalnyo siap tu Mak buek ceramah adat tentang Pengaruh Asoi Tabang Terhadap Penerapan Adat Basandi Syara’, Syara’ Basandi Kitabullah.”
“NAH! Itu yo mantap mah. Katuju bana diden ide ang mah, Jon!” Jawek Mak Datuak basilonjak. “Apo nan lain Jon, agiah lah den ide banyak-banyak.”
“Bisuak lah lai yo, Mak. Ngantuak bana den ha. Baru ka talayang den baru, lah Mak talepon den.” Jawek Sijon yo bana lah mangantuak barek.
“Bisuak lupo lo ang.”
“Indak, Mak. Yo bana bisuak den kirim judul-judul e ka WA.”
“Kini selah. Ang sasakali se cadiak nampak diden nyo. Alun tantu bisuak ka cadiak bantuak iko lai. Katiko sadang mangantuak ko biaso e lai tabukak pangana ang. Capeklah ang sabuik an tema-teman lain nan bisa den buek.” Mak Datuak mulai mamaso.
“Ndeh, lapa bana paruik den tangah malam ko ha.” Jawek Jon Ladiang.
“Ang yo bana banyak gaya. Yolah, nio apo ang, ka den balian pulo sate? Martabak mesir? Nasi goreng narako?”
“Pitih e selah diden.”
“Ang yo lah banyak kandak. Yolah, den kiriman ka rekening ang kini. 50ribu cukuik?” Tanyo Mak Datuak.
“Alah jadi tuh. Pado indak se,” kecek Sijon sabana galak mandapek.
Sasudah Mak Datuak mangirim ka rekening Jon Ladiang, barulah Sijon ko mulai malanjuik an saran ka Mak Datuak.
“Jadi, selain ceramah nan tadi, Mak Datuak bisa juo mambuek ceramah lain, nan judul e, kiro-kiro bantuak iko: Asoi Tabang Salingka Nagari”
“Mantap! A nan lain lai?”
“Bisa juo iko: Asoi Tabang sebagai Pertunjukan Posmodern Non-Konvesional Demokratis Non-Linear Multilevel Dekonstruksi Minangkabau.”
“Eh, apo pulo tu? Baru pulo den danga…”
“Tanang selah Mak. Lakek an se istilah tu. Nan penting tadanga ngeri. Soal paham atau indak, balagak paham se. Doktor-doktor budaya di Limau Manih se banyak makai istilah itu, indak pulo ado nan yo bana paham doh, apo lai awak-awak koh.”
“NAH! Katuju bana diden tuh! Cubo ang buek judul lain nan bantuak itu”
“Ndeh, lapa paruik den ha…” Kecek Jon Ladiang tibo-tibo.
“Jan lah bantuak itu bana Jon. Kan lah den kiriman tadi mah. Mambana pulo den ha.”
“Serius Mak. Lapa bana paruik den ha. Tibo-tibo taragak minum teh talua den. Tu antah baa pulo taragak punyo sapatu baru den malam ko. Sabanta ko taragak pulo punyo sarawa lepis. Ndeh, ba a dek lah banyak sakik den ko ha…” Kecek Sijon mangaluah.
“Ndeh, yolah kanciang paja ko mah. Yolah kok baitu, 300 ribu den kiriman kini ka rekening ang.”
“Ma cukuik…”
“350?”
“Samo se tu nyo…”
“400?”
“Ndak usah selah lai. Den lalok lai…”
“Yolah. 700 ribu.”
“Nah, tu nyo…” Jawek Sijon galak mandapek.
“Jadi, apo lai?” Kecek Mak Datuak sasudah mangirimkan pitih ka rekening Jon Ladiang.
“Buek selah nan tadi tu dulu, Mak. Kalau lah Mak buek baru den tambahkan. Beko banyak-banyak, ndak ado nan jadi ciek pun.” Jawek Sijon santai.
“Ma lo bisa gitu dek ang. Lah den kiriman mah sabanta ko.”
“Iyo. Batua. Lah den tarimo. Tapi jan rusuah lo Mak. Buek selah nan tadi tu dulu. Siap tu baru den agiah ide lain. Alah yo, den lalok lai, lah ngantuak bana mato den.” Kecek Jon Ladiang sambia mamatian hape. (*)
Ilusitrasi Oleh: Talia Bara
