“Yo, lah pantek subana pantek kawan Si Sarah ko, Mak!”
Baru kamahiruik kopi di kadai Wan Enggi sambia maoyak-oyak lutuik, tegalenjek Datuak Cubadak Kantang dek Jon Ladiang tibo mamantek-mantek. Diambiaknyo godok angek sagadang tinju nan tatonggok dalam talam, dirimbekannyo ka Jon Ladiang. Untuang lai Datuak Cubadak sajo duduak di situ. Kok ado nan lain, ndak ciek godok angek lakek ka kaniang Jon Ladiang.
“E… hanjiang kurok, hanjiang pamakan cirik, hanjiang batukak di karampang waang! Baru tibo lah bacaruik-caruik waang galidia! Lah tatunggang kopi den dek gara-gara waang,” rabo Mak Datuak.
“Ha? Baa dek berang lo Mak Datuak ka den? Wakden harusnyo nan berang,” jawek Jon Ladiang sambia manggusuak-gusuak kaniangnyo nan bajajak kanai karak godok angek.
“Yo, a bana masalah ang tu hanjiang, dek mamantek-mantek se kato babukak kutiko tibo?” salo Mak Datuak.
“Hanjiang den diambiaknyo dek Si Mira kawan Si Sarah,” jawek Jon Ladiang.
“Ba dek sampai pulo hanjiang ang dek Si Mira tu, apo hubungan ang dek inyo? Nan Si Sarah ko, tapi lah ditulaknyo ang dulu, ndak namuah nyo ka ang dek bakondo-kondo se ang jo hanjiang kesayangan ang tu tiok hari?” heran Mak Datuak.
Dek ndak nio urang lain tahu, baa bana masalah kok sampai hanjiang Jon Ladiang baralih tangan ka Si Mira kawan Si Sarah, mulailah Jon Ladiang duduak mandakek bacarito babisik-bisik ka subalah Datuak Cubadak Kantang. Sabalun mamulai carito, diambiknyo galeh, dituangnyo aia putih dari cerek, dikunyahnyo godok angek sambia mahambuih-hambuih muncuangnyo surang. Jon Ladiang mulai bacarito pangka-balanyo.
“Tapi ko yo rahasio Mak a? Lai ndak ka Mak Datuak kecek-kecek-an ka urang. Den nio manyalasaian masalah ko elok-elok. Antah kok ado saran dari Mak Datuak beko, tunjuakan lah den,” bisik Jon Ladiang ka pangka turik Mak Datuak.
“Waang kecek an pagunjiang den, hanjiang!” rabo Mak Datuak jo suaro tinggi.
“Jan kareh-kareh mangecek, yo lah datuak cimporong… tapi lah den kecek an, baa waang ko mak, pannnttt…,” satangah mambana jo suaro lunak lari ka dalam caruik Jon Ladiang.
“Nyo baa carito dek sampai pulo hanjiang ang tu dek Si Mira tu?” tanyo Mak Datuak sakali lai.
Dicaritoanlah dek Jon Ladiang ka Mak Datuak. Jadi sakiro anam baleh hari nan lalu, sambia mairik hanjiang bakaliang-kaliliang, basiroboklah Jon Ladiang jo Sarah di jalan parak karambia.
[Carito Mundur 16 Hari Nan Lalu]
“Halllooo, Dajon… where do you go…? Tambah hansem hanjiang Dajon mah, tambah tagak talingonyo nampak dek Sarah, tambah tajulua-julua mesra lidahnyo,” sapo Sarah mambuek Jon Ladiang merah muko.
“Hanjiang sajo nan ganteng Sarah?” sambuik Jon Ladiang.
“Eh, tantu indak. Dajon ateh sagetek hansemnyo dari hanjiang,” langsuang baleak aia ludah Jon Ladiang. “Basorobok Dajon di jalan ko jodoh rahasia ilahi mah, sakalian sajolah Sarah mintak tolong,” salo Sarah.
“Untuk Sarah apo nan indak. Mangariangan aia lauik Sarah suruah, Dajon karajoan juo kini sakali. Yo, itu nan Sarah mintak?” dek maraso dapek angin manjadi-jadi lagak Jon Ladiang.
“Indak itu doh, Dajon darling… Iko a, lai takana dek Da Jon Si Mira kawan samo sikola SMA Sarah nan manggaleh karuduang online tu? Sarah kamaminjam pitih ka inyo 5 juta, keceknyo ado tapi pitih kawannyo pulo, pitih donatur katonyo. Namuah kawannyo maminjaman, tapi babungo 2 juta salamo 15 hari, opit isilah dek inyo. Tu dimintaknyo pulo jaminan. Tentu Da Jon nan bisa manolong Sarah nyo,” kato Sarah sambia mancukia pusek Jon Ladiang nan tabudua sagadang jariang jo jari tunjuaknyo.
Langsuang tagalenjek Jon Ladiang, jo hanjiang-hanjiangnyo nan sadang mahajan cirik di ateh rumpuik, baru satangah cirik hanjiang ko kalua, langsuang lari ka dalam lambuang baliak cirik ko. Kalua paluah dingin Jon Ladiang mandanga carito pinjam-maminjam pitih babungo.
“Tapi bakawan lamo jo inyo, baa babungo pulo? Untuak apo pitih dek Sarah sabanyak itu?” tanyo Jon Ladiang batubi-tubi karano penasaran.
“Itulah Dajon, katonyo pitih urang, pitih donatur pulo istilahnyo moderennyo kini, ” jawek Sarah.
“Yo, lai pitih urang? Rentenir kalera nan mamparanak’an pitih tu alasannyo pitih urang pulo mah,” kato Jon Ladiang.
“Kalau rentenir ndak mode itu caronyo doh, Dajon hansem. Kecek Si Mira, beko dibueknyo grup WA batigo, isinyo grup tu: Sarah, Mira, donatur nan punyo pitih tu. Rentenir ma pulo pakai grup-grup WA,” jawek Sarah.
Karano mandanga pakai grup WA agak mulai picayo Jon Ladiang. Takana deknyo Etek Miar rentenir nan tigo rumah dari rumahnyo ndak ado pakai grup-grup WA maminjaman pitih, tapi pakai buku catatan sajo, hape Tek Miar sajo Nokia 3310 tahun 2000. Kok kamamintak pitih tagihan, atau bungo, dituruiknyo sajo urang langsuang urang ka rumahnyo.
“Tu untuak apo dek Sarah pitih sabanyak itu? Dajon namuah manyalangan indak babungo, tapi pitih tu bana nan indak ado kini, proyek-proyek uda alun ado nan kalua lai,” bia ndak maraso randah diri di muko Si Sarah mako dialehnyo proyeknyo alun kalua.
“Untuak pambayia julo-julo manurun, owner-nyo Si Lena, bini Si Anton nan manggaleh produk kecantikan online tuha… Sarah alah manarimo nomor partamo, gadang pulo potongannyo, kini masuk pembayaran nomor katigo ndak ado jo Sarah pambayianyo lai. Kapatang kutiko dapek babayian pulo ka utang ka Si Dina bini Si Ujang Sulah nan mangaleh kutang jo kolor online tuha…” jawek Sarah.
Langsuang manitik paluah dingin dari lihia jo kuduak Jon Ladiang dek ndak mangarati istilah julo-julo manurun. Tambah binguangnyo dek alah basangkuik-pauik pitih si anu ka si anu, alah basaluak-saluak, alah malilik bajelo-jelo pitih ko saroman tali baruak stres nan baputa-puta mamanjek batang karambia.
“Tu apo nan bisa Dajon tolong?” tanyo Jon Ladiang dek harok juo sayang Si Sarah kok lai juo katatuntuang.
“Hanjiang, Dajon…” jawek Si Sarah.
“Ha? Apo hubungan jo hanjiang?” tanyo Jon Ladiang heran.
“Bisa Sarah maminjam ka Si Mira, nan pitih donatur keceknyo tu, tapi harus pakai surek jaminan,” kato Sarah.
“Tu apo pulo hubungan jo hanjiang Dajon, adinda uda?” ambok Jon Ladiang dek mancaliak Sarah mangamek-ngamek bantuak tumbuang baruak katiko bulan tarang.
“Kecek Si Mira, kok maminjam harus ado jaminan. Bisa apo sajo, asa bisa dijua, jaleh haragonyo. Hanjiang nan sairiang-saparinduan jo Dajon kan lumayan haragonyo, lah tau pulo jo baun ikua ciliang. Indak kadipangaan bagai hanjiang Dajon doh, sekedar jaminan sajo,” kato Sarah.
“Itu senyo? Kan lai indak kadipauikan pulo hanjiang di rumah Si Mira salamo Sarah maminjam pitih? Beko inyo agiah pulo balsem dama-dama hanjiang ko,” luluah hati Jon Ladiang dek batambah kamek senyum Si Sarah nampak deknyo.
“Indak uda sayang hanjiaaaannnggg… Nan hanjiang tatap bisa uda irik-irik kaniak-kamari, tatap bisa uda paguik-paguik sambia lalok. Nyo sekedar batulihan sajo di surek jaminan tu, formatnyo alah ado dek Si Mira, kiro-kiro nan tatulih: SARAH MEMINJAM UANG SEBANYAK Rp.5.000.000 DENGAN BUNGA SEBANYAK RP.2.000.000/15 HARI DAN SEBAGAI JAMINAN ADALAH HANJIANG HANSEM MILIK JON LADIANG!” kato Sarah mayakinan.
Dek raso-raso ka aman, Jon Ladiang manuruik sajo, nan kok sayang ka Sarah yo alun hilang lai. Ndak dipikiaannyo apo nan tajadi di hari ka anambaleh, seandainyo utang dan bungo ndak tabayia dek Sarah. Ndak tapikian dek Jon Ladiang kejadian nan kamambuek inyo kanai rimbek godok angek sagadang tinju dek Datuak Cubadak Kantang.
Bersambung…
