Assalamualaikum Wr. Wb
.
Tarimokasih surek nan alah Uda sampaikan ka bakeh diri ambo. Nan tasurek alah dibaco, nan tasirek alah taraso. Daripado jauh bana jalan mamuta, mako langsuang sajo kito malangkah ka tampek nan dituju, yaitu pakaro Uda Jon Ladiang nan mamintak ambo mambukak hati ka bakeh Datuak Cubadak Kantang.
Justru di situlah persoalan nan sadang manjadi tando tanyo dek ambo kini. Tigo hari sasudah Uda Jon Ladiang manitipan surek lewat Cinta anak Pak Haji, kironyo Datuak Cubadak Kantang manitipan pulo surek lewaik Cinta.
Ambo sabana binguang. Di dalam surek nan Uda Jon Ladiang kirimkan, Uda mangecek kalau Mak Datuak lah lamo sanang hatinyo mancaliak ambo. Dan di dalam surek Mak Datuak, inyo mangecek an kalau Uda Jon Ladiang lah lamo pulo sanang hati ka ambo. Uda Jon Ladiang manyorongan Mak Datuak dan Mak Datuak manyorongan Uda Jon Ladiang.
Jadi, kalau buliah ambo bakandak. Tolong pastian bana sia nan ka disorongkan labiah dahulu. Siapo nan ka ambo pacik keceknyo labiah dahulu. Apokah Mak Datuak nan Uda sorongkan atau Uda nan disorongkan dek Mak Datuak.
Ambo paralu tahu soal itu karano ambo butuh kepastian ka sia surek penolakan ka ambo kirim partamo dan ka sia surek nan samo ka ambo kirimkan sasudah tu. Daripado sakali rabah kaduonyo, rancak ciek-ciek se ambo patahan dulu.
N/B: Untuak pertanyaan soal kesediaan menjadi relawan pendukung Provinsi Minangkabau, ambo tetap jo keputusan nan lamo: Ambo manolak perubahan provinsi Sumatra Barat menjadi provinsi Minangkabau.
Salam,
Nabila.
Ilustrasi oleh @teawithami
