Urang di kampuang Datuak Cubadak Kantang heboh dek mancaliak video nan beredar di dunia maya. Seorang anggota dewan marabo-rabo ka Pol PP nan sadang barusaho ma ajak masyarakaik untuak ndak barami-rami katiko korona ko. “Saya catat nama Anda!” Keceknyo ka Pol PP. “Mengapa Anda takut-takuti masyarakat?” Basijadi lo hariak e ka petugas keamanan tu.
“Lah iyo nan dikarajoan anggota dewan tu mah. Manga harus dianggap salah pulo baliau tu,” kecek mak Datuak ma agiah pandapek di ota lapau online via Zoom.
“Yo beda pandapek den jo Mak Datuak. Kalau den yo galigaman jo paja anggota dewan tu,” kecek Cimporong. “Pandapek ang baa, Jon?”
“Sabalun den manjawek setuju atau indak jo sikap anggota dewan tu, den ingin mangecek an kalau den suko bana jo kalimat ‘saya catat nama Anda’ tu. He-he-he.” Jawek Jon Ladiang sambia tagalak.
“Ba a dek harus ang galak an Jon? Apo nan lucu? Manuruik den lah batua nan dikecek an anggota dewan tu mah.” Solo Mak Datuak.
“Ba a kalau agiah den wakatu agak saketek. Bia bisa den jalehan baa den ndak katuju jo sikap paja tu.” Pintak Cimporong dan disetujui dek Sijon jo Mak Datuak.
“Jadi giko ha,” Cimporong mamulai, “katiko Pol PP berusaha membubarkan keramaian itu, paja anggota dewan tu langsuang marabo-rabo lalu mangecek an bahwa inyo sato mambuek undang-undang PSBB tu. Nah, masalah e, walaupun inyo sato mambuek e, itu kan bukan berarti inyo buliah melanggar. Justru urang nan sato mambuek nan harus melaksanakannya talabiah dulu. Sato mambuek suatu aturan bukan berarti bebas dari aturan tersebut.”
“Oke. Taruihlah ang mangecek, den danga se dulu,” jawek Mak Datuak.
“Dan ciek lai,” lanjuik Cimporong, “Pak Gacik tu manyabuik kalau inyo alah limo baleh tahun jadi anggota dewan. Manuruik den, tigo baleh ribu limo ratuih tahun bagai nyo jadi anggota dewan, maka itu bukan alasan kalau inyo buliah malanggar aturan. Alah, itu se dulu pandapek den.”
“Eh, tunggu sabanta dulu, Pak Gacik ko sia ko, Da Cimp?” Tanyo Jon Ladiang.
“E yayai yo. Itu kan namo anggota dewan tu.” Jawek Cimporong.
“Oh itu namo e. Sia nan ma agiah tahu Da Cimp?”
“Ndak ado nan ma agiah tahu ka den doh. Ang caliak lah video tu baliak, ado tulisan ‘Gacik’ di kaniang e mah. Apo lai kalau ndak itu namo e.” Kecek Cimporong.
“Kalau tulisan di kaniang e, lai ado nampak diden. Tapi ndak ‘Gacik’ tulisan e do. Nan tabaco diden ‘Bingkaruang’, kok bisa beda?”
“Ndeh, itu pulo nan kalian perdebatkan. Gacik atau pun Bingkaruang, ndak usah dipersoalkan. Samo-samo cocok dipanggia ka inyo. Lanjuik an se diskusi tadi.” Solo Mak Datuak. “Jadi baa pandapek ang, Jon?” Kecek Mak Datuak ka Sijon.
“Kalau diden yo bantuak nan den sampaikan tadi. Lawak se diden mandanga kalimat ‘saya catat nama Anda’ tuh. Banampak an bana inyo punyo kuaso. Kalau pun memang inyo punyo kuaso, banampak an bana dek nyo kalau kuaso nan sadang inyo punyoi tu digunoan untuak babuek sakalamak ati. Katiko nyo mangecek bantuak tu seakan-akan nyo manyampaikan ka urang bahwa jan cubo-cubo macam-macam jo inyo. Bahkan, nyo ngecek, kalau nyo jadi Bupati, urang-urang bantuak Pol PP tu ndak akan ado lai. Kalau diden tu yo lah talongsong bana paja tu mangecek an. Katiko sadang tapacik di ulu ladiang tu, dibae e bana mancatuak kama-kama. Tapi, kito caliak se nantik, kalau lah turun bendera e, lai ka talok juo bantuak itu dek e?” Kecek Sijon. “Jadi ba a, manuruik pandapek Mak Datuak? Apo juo nan ka Mak Datuak bantah lai?”
“Taruihlah. Den mandanga se dulu.” Jawek Mak Datuak singkek.
“Oke, den tambahkan saketek lai,” kecek Jon Ladiang, “katiko anggota dewan tu mangecek an Pol PP manakuik-nakuik an masyarakaik, justru inyo tu bana nan sadang manakuik-nakuik an masyarakaik! Dengan mangecek an ‘saya catat nama Anda’, mako katiko tu nyo sadang maraso manunjuak an kuaso e, supayo Pol PP tu takuik ka inyo!”
“Mantap, Jon! Arti e kito samo-samo ndak katuju jo gaya kagadang-gadangan paja tu. Dan den sabana penasaran, ba a dek Mak Datuak kito ko mati-matian mambela anggota dewan nan sabana terhormat tu.”
“Nah! Batua bana, Da Cimp. Kok misal e ado den di situ, mungkin den sipak an kuduak paja dari balakang mah sampai nyo tasungkua di tanah. Siap tu den tenju-tenju muncuang e. Walaupun inyo mintak ampun bakali-kali, tetap se den pijak-pijak an muncuang e jo kaki den bakali-kali.” Kecek Sijon basumangaik.
“Kalau diden ndak itu nan tabayang do,” kecek Cimporong ndak kalah samangaik, “den suruah bana nyo mancatat namo den. Kok bisa den fotokopi KTP, Akte Kelahiran, jo KK den sakali, tu den agiah an ka inyo lengkap jo alamat rumah, nomor talepon, bahkan den agiah an sakali data-data baruak nan acok bagayuik di balakang rumah den. Disangko takuik lo kito dicatat-catat namo bantuak tu. Sia bana nyo? Oh mantang-mantang anggota dewan, tu bagak se sakali? Mantang-mantang anggota dewan, tu bisa se sakalamak ati ma ancam-ancam urang?!”
“Alah? Alah salasai kalian? Atau masih ado nan ka disampaikan? Kok masih ado, den tunggu bana sampai kalian yo bana salasai mangecek. Sampai tibo lo bulan puaso ciek lai pasti ka den tungguan.” Pinteh Mak Datuak ndak saba ka mangecek daritadi.
Dek Mak Datuak lah bantuak tu, Sijon dan Cimporong langsuang baranti mangecek baduo.
“Lanjut, Mak.” Kecek Sijon.
“Lah kali, giliran Mak Datuak lai.” Sambuang Cimporong.
“Kalian baduo batua tapi salah!” kecek Mak Datuak langsuang. “Bantuak nan den kecek an dari samulo tadi, apo nan dikarajoan dek anggota dewan, Si Gacik alias Bingkaruang tu, lah sasuai jo karajo e.”
“Ha? Serius Mak ngecek tu?” Solo Cimporong.
“Serius! Tugas anggota dewan tu memang bantuak tu! Sajak zaman anjiang takanciang ma angkek kaki suok sampai zaman anjiang takanciang ma angkek kaki kida, prestasi terhebat anggota dewan adolah melanggar peraturan nan alah inyo buek. Oleh sebab itu, untuak apo kalian protes-protes? Ndak ado gunonyo!” Kecek Mak Datuak basumangaik.
“Dan ciek lai untuak kalian ketahui,” lanjuik Mak Datuak, “kalau ado anggota dewan kito nan sadang di siko, memang kewajiban e untuak manggertak urang sabalik. Kok bisa tunjuak an kalau urang di daerah bukanlah apo-apo. Tunjuak bana kalau inyo sebagai anggota dewan ko bagak, banyak kenalan urang penting di Jakarta, punyo kuaso untuak mainjak-injak urang! Inti e tunjuak an kalau salah satu syarat katiko lah tapiliah jadi anggota dewan adalah kagadang-gadangan! Selain itu, harus sok-sok pahlawan, seakan-akan persoalan nagari ko akan salasai dek inyo surang se. Lai takana dek kalian kasus anggota dewan nan manjebak PSK?”
“Iyo juo kecek Mak Datuak mah, Da Cimp.” Bisiak Sijon.
“Dan iko nan terakhir, untuak kalian ketahui se. Kewajiban anggota dewan tu adalah melakukan sesuatu nan babeda jo apo nan dikecek an e. Jadi, kalian harus bisa memahami tindakan anggota dewan. Kalau contoh Pak Gacik tadi tu, inyo manuduah Pol PP menakut-nakuti masyarakat, mako itu arti e justru inyo nan sangajo menakuti-nakuti masyarakat. Katiko anggota dewan mangecek an berantas korupsi dan maksiat, mako itu arti e sabana e inyo nan korupsi dan maksiat tuh. Katiko anggota dewan mangecek an dirinyo jujur, bersih, peduli, berpikiran maju, mako itu arti e inyo nan sabana e panduto gadang, parangai e mantiko cirik, ndak pernah peduli jo apo nan tajadi di masyarakaik, dan tentu saja ndak bautak! Ba a, lai paham kalian kini? Paralu de ulang?”
“Indak, Mak.” Jawek Sijon jo Cimporong sarentak. (*)
Ilusitrasi oleh: Talia Bara
