“Jon, kamarilah sabanta,” sapo Mak Datuak dari jendela katiko Jon Ladiang lewat di muko rumah e.
“Apo tu?” Jawek Sijon.
“Yo ka siko selah ang. Ado nan ka den kecek an ciek.”
“Den takaja-kaja ha.” Kecek Sijon manaruih an langkah.
“Nio atau indak?!” Sorak Mak Datuak. Dek raso-raso ka mandapek, Sijon langsuang baranti malangkah.
“Apo tu? Hariak an selah dari situ. Ko masih situasi korona juo baru. Ndak buliah dakek-dakek do.” Jawek Sijon agak maleh tapi tetap babaliak ka laman rumah Mak Datuak.
“Ko dek ang pitih 50 ribu ha,” kecek Mak Datuak sambia mahonyok an ka tangan Sijon, “tapi tolong ang baka baju nan ang pakai kini tu. Den agiah ang pitih untuak pambali ganti e. Lai jaleh dek ang?” Kecek Mak Datuak agak kareh.
Pitih nan diagiah Mak Datuak tu alah dimasuak an dek Sijon dengan sigap ka saku balakang sarawa e, tapi inyo masih ndak bisa memahami mukasuik Mak Datuak. Apolai Mak Datuak hanyo galak sengeang se mancaliak kaniang Jon Ladiang lah bakaruik dek bapikia.
“Yo bana ndak paham den. Apo nan salah di baju den kini ko?”
“Cubo ang baco tulisan di baju ang tuh.”
“Tulisan nan ma? Banyak tulisan di baju den ko mah.”
“E yayai yo. Itu ha nan sagadang ikua baruak tu ha.” Jawek Mak Datuak agak emosi sambia manunjuak.
“Lamak dek awak, katuju dek anjiang,” kecek Jon Ladiang mambaco. “Apo nan salah jo tulisan di baju den ko?”
“Salah atau indak manuruik ang, tolong ang campak an baju kanciang tu. Labiah rancak kain buruak nan ang pakai lai!”
“Eh kajamban anjiang yo. Jan den pulo ang gituan lai. Ndak gara-gara pitih 50 ribu ko bagai den ka ang atur-atur doh. Manurunan gala datuak ang tu bisa den kini ko juo mah.” Jon Ladiang mulai paneh.
“Tu baa dek ang!”
“Aden lo ang kandak an!”
Singkek kato, Mak Datuak malompek dari jendela rumah e dan langsuang bakatuntang baduo jo Jon Ladiang. Cukuik lamo pareman baduo ko baguluang-guluang, hampeh-mahampehan, sampai akhirnyo lewat Cinta anak Pak Haji mamakiak-makiak sambia bausaho malarai urang baduo tu nan sadang paneh.
“Ya Allah, Ya Tuhan! Dek apa ini? Mengapa Mak Datuk dan Bang Jon Leding bertengkar tak berkeruncingan saja ni?” Kecek Cinta tu manahan badan Mak Datuak jo tangan suok dan Jon Ladiang jo tangan kida.
“Paja kanciang tu nan mamulai dulu!” Kecek Jon Ladiang manunjuak ka muko Mak Datuak.
“Eh eh eh. Baro saja isi perut Bang Leding mah. Bersitenang sajalah dulu. Jangan meraba juga dulu ya,” kecek Cinta manahan Sijon. “Jadi di mana mulai kusut benangnya nih. Kalau kusut di tengah, ke pangkalnya kita berbalik ya,” lanjuik e sambia manyuruah kaduo urang tu duduak mananangan diri agak sabanta.
“Ada boleh Mamak mengecat dulu, Cinta?” Kecek Mak Datuak katiko lah suasana lah mulai dingin.
“Ya boleh, coba Mamak yang mengecat dulu, sudah tu baru Bang Leding ya,” kecek Cinta dan kaduo urang tu pun ma angguak. “Pakai bahasa Minang sajalah Mak Datuk menjelaskannya, biar ndak terbalik-balik lidah Mak Datuk tu berbahasa Indonesia,” kecek Cinta malanjuik an.
Dek kaduo urang tu samo-samo mangecek saliang sindia dan indak pernah basijaleh ka pokok persoalan, mako Cinta samakin ndak paham apo nan tajadi. “Jadi apa sebenarnya yang dikerut-erangkan oleh Mak Datuk dan Bang Jon Leding ni? Semak pula pengana Cinta dek inya!”
“Intinyo rusaknyo moral Minangkabau ko dek nan mudo-mudo!” Kecek Mak Datuak. “Urang saisuak alah jaleh-jaleh mangecek an ‘lamak dek awak katuju dek urang’, dek anak-anak mudo kini malah dipatele-telean, babuek bana di baju ‘lamak dek awak katuju dek anjiang’! Ba a kok bagadang-gadang ati maolok-olok budaya surang. Yo sabana heran den. Kalau ndak bisa manjago, mako jan marusak!” Kecek Mak Datuak akhirnyo mampajaleh persoalan.
“Sia nan maolok-olok?” Baleh Sijon. “Lai paham ang kalau…”
“Eh, Bang Jon Leding, tolong muncungnya dipelokkan dulu ya,” langsuang disolo dek Cinta, “jangan pakai ang juga sama Mak Datuk tuh, nia abang kalau Cinta marah sama abang?” Ancam Cinta.
“Oke, Adek. Abang ulang lagi ya,” jawek Sijon langsuang manuruik. “Jadi, giko, den ndak ado maolok-olok do. Baju nan den pakai ko baju pambagian pulo. Ma mungkin ka den buang.”
“Tasarah! Diagiah urang atau dapek di jalan, tolong campak an baju setan tuh!” Sasak Mak Datuak.
“Baju setan baa ko?! Tulisan di baju den ko adalah semboyan urang baburu. Kalau pai baburu, jan hati awak se nan dipikian, tapi kana juo perasaan anjiang nan kito baok! Konteks e pai baburu!” Jawek Jon Ladiang.
“Ndak bisa! Apapun konteks e, den ndak peduli!” Hariak Mak Datuak
“Aduuuh, pening pala Cintak dek inya. Ndak bisa damai-damai saja nih?” Lah mulai mambana Cintak dek nyo.
“Kini giko selah. Den baliak an pitih Mak Datuak nan 50 tadi. Anggap se den tadi ndak lewat di muko laman rumah Mak Datuak. Dan anggap se ndak nampak dek Mak Datuak den makai baju iko. Lah, aman, kan? Ndak ado masalah jadi e do kan?” Kecek Sijon mancari solusi.
“Ndak bisa! Pokoknyo diden nio juo baju bantuak tu salai!” Kecek Mak Datuak.
“Ha?” Sijon tangango.
“Pokoknyo diden nio juo baju bantuak tu salai!” ulang Mak Datuak.
“E yayai ya! Jadi intinya Mak Datuk nia pula baju bentuk yang dipakai Bang Jon Leding ni?” Kecek Cinta tagalak-galak.
“Iya…” Jawek Mak Datuak basilunak.
“Kalau bitu daritadi kan jaleh. Manga lo harus babalik-balik bana, sampai ka persoalan moralitas Minangkabau pulo dibahas. He-he-he.” Kecek Jon Ladiang.
“Tantu lah iyo dek ang. Kalau dek kami nan tuo-tuo ko, atau dek urang nan sangajo batuo-tuoan badan e, yo cuma isu moralitas se galeh kami lai nyo. Apo lo lai. Kalau ado raso e nan ndak dapek, tantu se kalua jurus satu-satunya ko lai… ” Jawek Mak Datuak sambia manyarengeh bantuak baruak.
“Kalau bitu, nan lain se tulisan di baju Mak Datuak tu den carian.”
“Apo tu?”
“Lamak dek anjiang, katuju dek awak.” Jawek Jon Ladiang.
“Apo lo beda e jo tulisan di baju ang? Cuma dibaliak-baliak an se!”
“He-he. Co pikia dek Mak apo beda e. Kalau lah tau beda e, den agiah bonus tarompa rayo…” Jawek Sijon sambia tagak dan bakirok dari tampek tu. (*)
Ilusitrasi oleh: Talia Bara
