“Yo lah sabana pantek!” Rabo anjiang Jon Ladiang tadanga dari lua lapau Datuak Cubadak Kantang. Untuang se nan sadang duduak di lapau tu lai nan urang nan alah biaso mandanga paja anjiang tu bacaruik pungkang. Tapi, pagi tu Mak Datuak sadang samak se utaknyo. Mandanga anjiang tu bacaruik ndak bakajalehan, tabik pulo rabo Mak Datuak.
“Woi anjiang pantek, ang alah tu bacaruik-caruik di siko lai! Bakirok ang kini ko juo! Ndak barakaik lapau den kok ado juo ang di siko! Den sumbek muncuang ang tu jo dorom minyak tanah ko beko lai, kanciang!” Rarah Mak Datuak ma ampok anjiang tu jo tarompahnyo.
“Eee datuak pantek yo, dek apo lah ang ko ha?! Tapijak se indak tanah ang diden do, sajalah tu den di tapi jalan ko se tagak dari tadi nyo ha!” Baleh anjiang tu ndak namuah kalah, “tiok aden sadang maetong pitih, bingik se ang taruih!” Lanjuik paja anjiang tu sambia mangumpuan pitih saratuih ribu nan baserak kama-kama gara-gara mailak an tarompah Mak Datuak tadi.
“Eh, sadang maetong pitih sanak den kironyo. Den sangko kok manga pulo tadi. Mangeceklah sanak dari tadi saketek ka baa pulo tuh. Wak karek duo selah baa manuruik sanak tu?” Opok Mak Datuak.
Galak sarengeh se paja anjiang tu mandanga opok kanciang dari Mak Datuak tuh. “Kok lah pakaro pitih, nio ang badunsanak ka anjiang yo, pantek!” Kecek anjiang tu. Mak Datuak taruih maopok-opok, tapi ndak diacuahannyo bana. Taruih se nyo etong pitihnyo tuh baulang-baulang. Antah bara kali diulang-ulangnyo maetong. Tiok dietong tiok basalisiah se jumlahnyo.
“Tadi den etong, sajuta sadonyo. Tu den etong baliak, jadi sambilan ratuih se nyo lai. Kini den ulang baliak, sajuta saratuih se nyo lai. Yo lah sabana pantek!” Paja anjiang tu sabana heran.
“Bia den tolong maetongan ha. Sakali etong se diden tu nyoh,” kecek Mak Datuak malangkah ka paja anjiang tu.
“Indak den!” Jawek paja anjiang tu sakali. “Mandakek ang salangkah lai, den lipek kaki ang! Caliak selah ndak bagarah bagai den doh!” Gertak paja anjiang tu.
Antah pakak antah ndak bautak, Mak Datuak tetap basingajo bana malangkah sakali lai. “Datuak pantek, lai bisa ang den kecek an?” Rabo anjiang tuh.
“Ya Tuhan. Pamberang bana dunsanak den kini mah…” Baleh Mak Datuak sabana basilunak.
“Woi Datuak panteeeek!!! Manjarak ang kecek den!!!” Hariak anjiang tu.
“Woiiii apo tuuuh! Lai sihaik tuan-tuan tuh?! Pagi hari baru lah caruik se isi dunia ko mah!” Sorak Cimporong Batuah dari dalam lapau. Ndak lamo sudah tu, lah tibo pulo Cimporong di subarang lapau tuh, mancaliak Mak Datuak mamparatian paja anjiang tu masih maetong-etong pitih.
“Apo ko Mak Datuak?” Tanyo Cimporong.
“Caliak lah paja anjiang ko dima pulo diciloknyo pitih urang koh?” Jawek Mak Datuak dan langsuang disalo dek paja anjiang tu sakali.
“Apo kecek ang?” Sasak angok paja anjiang tuh deknyo sakali.
“Iyo mancilok karajo ang kini? Den kecek an parangai ang ko ka Jon Ladiang yo?! Caliak lah beko, kalau pulang nyo dari Makah den sabuik an sakali!” Kecek Cimporong agak mangareh ka paja anjiang tuh.
“Apo ko? Santai, Da Cimp. Pitih sia pulo nan ka den cilok.” Baleh paja anjiang tuh.
“Mangaku selah ang, pantek!” Sasak Mak Datuak. Katiko anjiang tu agak talengah, Mak Datuak langsuang mahambua bantuak harimau, dan dikapiknyo lihia anjiang tuh sakali.
“Pantek lapehan lah! Sasak angok den ha!” Pakiak anjiang tu dek takajuik.
“Kok iyo ang mancilok pitih, tolong baliak an pitih tu kini ko juo.” Cimporong maingek an. Lah mulai kareh suaronyo mangecek ka paja anjiang tu.
“Ya Tuhan! Tuan den si Jon Ladiang se sadang di Makah kini mandoakan supayo anjiang bisa masuak sarugo, tu ka basilanteh angan se den mancilok di kampuang ko. Lai ka mungkin dek Da Cimp tu?!” Agak mangareh paja anjiang tu mambela diri.
“Nan ka Makah kan Tuan ang, bukan wa ang. Jan sumbarang se ang. Wa ang kan anjiang, kalau tuan ang iyo lai manusia.” Sarengeh Mak Datuak. “Mangaku lah ang, pantek!” Lanjuik Mak Datuak samakin manjadi-jadi mangapik lihia paja anjiang tuh.
“Eh, pantek yo! Alah acok bana ang mampacaruik an den mah Datuak kalera!” Alun sudah paja anjiang tu mangecek lai, tibo Pak Haji bajalan manggadudu dari arah rumahnyo sambia basorak.
“Mak Datuak, ado nampak anjiang Jon Ladiang di situ?” Sorak Pak Haji.
“Ha tuah! Iko bana nyo nan Pak Haji cari! Lah pandai paja anjiang ko mancilok pitih urang kini?!” Jawek Mak Datuak sabana sanang.
“Eh Datuak pantek yo! Jan nan indak-indak se basampaikan ka Pak Haji tu!” Solo paja anjiang tu sakali.
“Astaga! Dek a anjiang si Jon ko?! Lapehanlah inyo Mak!” Kecek Pak Haji sambia maurak tangan Mak Datuak. Mak Datuak sabananyo ndak nio malapehan, tapi dek talingo Mak Datuak kanai jantiak tigo kali dek Pak Haji, nyo lapehan se lai.
“Untuang tibo Pak Haji,” kecek anjiang tu sasak angok.
“Tadi ambo suruah angku pai ma antan pitih ka urang, tu ambo suruah baliak ka rumah ambo, tapi ndak juo tibo-tibo. Kironyo di siko angku yo…” kecek Pak Haji ka paja anjiang tuh.
Mandanga itu, langsuang ndak lamak perasaan Mak Datuak. Lah tabayang dek nyo ka kanai berang pulo sakali lai dek Pak Haji. Cimporong nan dari tadi diam se, lah mulai bajalan lambek-lambek baliak ka lapau.
“Itulah, Pak Haji. Baru sampai di siko den baru, lah dituduah den mancilok pitih dek Mak Datuak. Padahal den cuma maetong pitih ko sambia bajalan. Bia ndak kurang sahalai pun,” kecek paja anjiang tu sambia galak sarengeh ndak saba manunggu Pak Haji mamberangan Mak Datuak.
“Iyo baitu caritonyo, Mak?” Pak Haji madok tajam ka Mak Datuak.
“I-i-i-yo Pak Haji. Nyo kan perepep-perepep-perepep-perepep…” Jawek Mak Datuak batele-tele ndak bakarunciangan bantuak baruak jadi pejabat.
“Minta maaf bana ambo Pak Haji,” jawek Mak Datuak sabana padek. Kalau mintak maaf jo maota urang sabalik jo carito kehebatan Minangkabau, Mak Datuak memang ndak pernah gagok saketek pun. Bapacu-pacu muncuangnyo jo ampu kaki handak ka mangecek dulu.
“E Datuak pantek yo. Aden hampia ka mati tadi, kini lamak se ang mintak maaf. Ang turunan gala datuak ang tu ka aden, baru buliah minta maaf ang.” Sorak paja anjiang tu sakik hati.
“Hoi! Apo nan basabuik tu!” berang Pak Haji ka paja anjiang tu sakali.
Dek mancaliak paja anjiang tu kanai hariak, tabik pulo mantagi Mak Datuak baliak.
“Daram paja pantek tu sakali Pak Haji!” Sorak Mak Datuak.
“Pantek dek ang!” Jawek paja anjiang tu samakin emosi.
“Jan bacaruik juo ang lai, pantek! Den dabiah ang beko lai!” Baleh Mak Datuak pun samakin emosi. Dan dibaleh pulo dek paja anjiang tu taruih.
Sampai malakik sanjo, ndak juo baranti Mak Datuak jo paja anjiang tu bakuhampeh baguliang-guliang di tangah jalan. Gigik-manggigik, cakar-mencakar, hantam-mahantam. Alah bara kali Pak Haji malarai, indak juo bisa. Akhirnyo, dek ndak ado caro lain, Pak Haji manyiram Mak Datuak dan paja anjiang jo ayia banda. Sasudah tu baru samo-samo baranti kaduonyo.
“Pulang lah kalian ka rumah surang-surang lai. Alah sakali ko kalian bacaruik bantuak iko dakek den. Lah samo se bantuak kalian baduo nampak diden kini.” Kecek Pak Haji.
“Paja pantek tu pacaruik bana Pak Haji. Muak den!” Solo Mak Datuak.
“Wa ang nan pacaruik, pantek!” Baleh paja anjiang tu.
“Hoi, alah tuh! Ndak ado beda kalian baduo do! Urang lain batagahan bacaruik, tapi nan managahan sambia bacaruik pulo. Samo pulo jo Cimporong: salah urang lain se nan nampak, nan diri inyo bantuak ndak pernah melakukan hal nan samo se. Maraso jadi korban se taruih, padahal antah bara urang pulo nan sansai dek parangai nyo!” Kecek Pak Haji ma agiah nasihat.
“Astaga! Ndak sato-sato den daritadi, tapi kanai juo,” sorak Cimporong dari dalam lapau.
“Hehe. Apo lo tuh. Daripado mancigok saketek se angku tadi dalam carito ko, setidaknyo lai tasabuik juo namo angku baliak di akhir carito ko.” Jawek Pak Haji mampagarahan Cimporong.
“Hehe. Iyo juo tuh Pak Haji. Nan penting kanai sabuik, penting ndak penting itu soal lain,” sorak Cimporong takikiah dek galak.
“Pak Hajiiiii!” tibo-tibo tadanga se sorak paja anjiang tu.
“Apo lai? Iko carito lah hampia habih ha, masih ado juo nan ka basampaikan?” Baleh Pak Haji.
“Den cuma nio mangecek an: jan Pak Haji agiah nasihat bantuak tadi pulo den lai! Cukuik Mak Datuak se nan dinasehati!” Sorak paja anjiang tu.
“Baa tu?” Sorak Pak Haji heran.
“Aden ko kan anjiang. Ndak butuh nasihat do! Kalau Pak Haji agiah se den nasihat taruih, ndak ka peduli bagai den do! Nan bisa barubah tu manusia. Kalau anjiang ka bantuak itu se nyo sampai kiamat! Cukuik Pak Haji jadikan se untuak ka disuruah-suruah, lah sanang ati den mah!” Kecek paja anjiang tu sambia balari kancang-kancang ka kandangnyo. (*)
Ilustrasi @teawithami
