Samanjak hantu balawu mausulkan parubahan namo Provinsi Sumatera Barat, banyak pro dan kontra nan tajadi. Tantu sajo, sabaleh dari sapuluah urang nan pro-kontra itu hanyo berdasarkan pertimbangan baa cirik lai ka anyuik se. Kalau raso-raso lai ka laku kain buruak dek nyo, mako inyo akan mandukuang. Tapi kok raso-raso ka tagaduah pulo tagak bendera e, tantu sajo inyo tulak sajadi-jadi e. Bahkan urang nan diam ndak nio sato pun, tantu bukan karena ndak peduli, tapi karena apopun nan tajadi inyo tetap bisa ma ambiak untuang di ateh kaduo e.
Namun baitu, Datuak Cubadak Kantang barusaho mancari jalan kalua nan lain. Sabana e Mak Datuak dan urang sakampuang e tamasuak kategori urang nan ndak nio sato. Namo provinsi ndak baa barubah, asalkan niniak ngangak jo cadiak pandia jan digaduah-gaduah. Baitu prinsip mereka awal e.
Tapi, kapatang malam, ado tokoh nasional nan maraso paliang minang dari sagalo kabau di dunia ko, datang ka kampuang tu. Inyo mamintak ka Mak Datuak untuak mangumpuan kecendrungan pilihan urang kampuang. “Pokoknyo pandai-pandai Mak Datuak saja. Saya mau semua orang di kampuang ini mendukung perubahan namo!” Baitu kecek paja bingkaruang tu sambia manyalek an piti saratuih ribu ka saku sarawa Mak Datuak.
“E pantek. Kok ka manyalek an pitih, salek an selah elok-elok. Jan cinonot den lo nan ang awai-awai lai!” Sorak Mak Datuak takajuik sambia manyipak paja tu kuek-kuek.
“Maaf, Mak Datuak. Indak musakuik ambo ma awai do. Saku sarawa Mak Datuak nan cabiak kiro e. Lah talongsong se tangan ambo dek nyo.” Jawek paja tu.
Sasudah bakaruik-arang sabanta, Mak Datuak bajanji ka paja tokoh nasional tu akan manyampaikan hasil pengamatan e dalam saminggu.
Kiro e, hanyo dalam tigo hari, urang kampuang Mak Datuak nan awal e ndak nio sato-sato, kini lah mulai mandukuang parubahan namo tu. Hanyo sajo, urang kampuang Mak Datuak ndak setuju kalau ganti namo Provinsi Sumatera Barat tu “Provinsi Minangkabau”.
“Minangkabau tu kejayaan maso lalu. Ndak sasuai lai. Harus dicarian namo nan labiah tapek jo kejayaan maso kini.” Baitu hasil rapek urang-urang di kampuang.
Ikonyo namo-namo nan diusulkan dek urang-urang tu beserta alasan-alasan soal kejayaan maso kini:
1. Provinsi MinangKACAU
Namo ko awal e diusulkan dek cinonot Jon Ladiang. Sijon awal e ndak nio sato-sato. Tapi cinonot e nio mangecek juo taruih, akhir e dipalapeh se paja kanciang tu dek Sijon lai. Dan usulan dari cinonot Sijon ko disetujui dek saparoh urang beserta kasado baruak, biawak, jo ulek bulu nan ado di kampuang tu. Alasan e, kejayaan Minang kini bukan dek carito kabau tu lai, namun dari carito kacau. Samakin kacau Minang ko, mako samakin laku nasi dingin.
Bialah bareh taserak, asa muncuang lai bagincu. Itu semboyan nan mereka buek untuak manggantian semboyan Tuah Sakato di logo Prov Sumatra Barat nan kini.
2. Provinsi MinangKABUA
Dek mancaliak cinonot Sijon sato mangecek, paneh pulo Cimporong Batuah dibuek e. Dijagoan e cinonot nan sadang lamak lalok tu dan disuruah e ma agiah saran. Dek cinonot tu baru jago bana sasudah bagadang tigo hari tigo malam, alun tapek bana pangana e lai. Tapi setelah dicuci muko e sabanta dek Cimporong, baru bisa mangecek e.
“Minangkacau tu masih kurang pas. Kalau soal kacau, justru dari dulu alah kacau. Arti e, namo itu ndak mencerminkan kejayaan masa kini. Mako baitu, den mausulkan Minangkabua.” Sorak cinonot Cimporong. “Samakin kabua Minang ko, mako semakin tinggi tagak bendera e.”
Sambia mancimeeh semboyan kelompok sabalumnyo, pendukung Cimporong langsuang manyabuik an semboyan nan mereka usulkan: Tagak di nan kabua, mamanciang di nan karuah, tacirik tangah dapua.
3. Provinsi Minang + [Namo Binatang Lain]
Walaupun Sijon sepakat jo usulan cinonot e, anjiang Sijon justru manolak usulan nantun. Inyo maraso ndak terwakili dek usulan nan alah ado. Dek karano itu, inyo agiah pulo usulan nan lain.
“Minangkacau jo Minangkabua sangat diskriminatif ka binatang. Salamo ko manusia dan binatang alah terwakili dek namo Minang+kabau. Percampuran parangai kaduonyo, alah menjadi keunikan kito. Dan untuak kejayaan maso kini, binatang tetap harus dibaok sato. Mako baitu den mausulan namo Minang dan ditambah namo binatang. Tasarah binatang apopun. Kok baruak, kok anjiang, kok bingkaruang. Asalkan jan kabau se taruih. Tanpa kolaborasi bantuak tu, Minang ko akan karam sabanta lai!” Baitu usulan anjiang Jon Ladiang, disambuik jo tapuak tangan dek pendukung e.
Soal semboyan, mereka mengusulkan: Bialah ndak lamak dek urang, asa lai katuju dek binatang. Mereka mengklaim kalau semboyan ko mencerminkan inti dari kebudayaan Minangkabau masa kini.
Rapek salasai.
Sasudah salasai manarimo sagalo usulan, Datuak Cubadak Kantang lah tangango-ngango surang se. Niat awal nyo mangumpuan urang-urang tu supayo mereka mendukung perubahan namo provinsi. Kiro e urang-urang tu malah manyorongan galeh surang-surang pulo. Ba a ka aka lai ko.
“Tarimokasih dunsanak sadonyo. Usulan dari kito di kampuang ko akan ambo sampaikan ka tokoh nasional di pusat. Mako baitu ambo minta permisi dulu, ka maurus karajo nan lain pulo, mudah-mudahan dunsanak sekalian tetap sihaik sadonyo! Jan lupo tetap manjago Adat Basandi Syara, Syara Basandi Kitabullah!” Kecek Mak Datuak langsuang bakirok.
“Eh eh, bingkaruang, tunggu dulu! Bantuak itu se nyo?!” Protes Jon Ladiang.
“Tu apo lai dek ang?” Jawek Mak Datuak sambia babaliak madok ka Sijon.
“Datuak pantek yo. Apo juo kecek ang lai. Ndak ado bagai uang transport e ko do?” Solo Cimporong.
“Transport pantek apo lah kecek ang ko?!”
“Woi Cubadak anjiang. Untuak biaya kampanye hitam dan penyebaran hoax di Pilgub Sumbar se banyak turun dana dari pusat. Untuak parubahan namo provinsi ndak ado saketek alahe juo?! Nan ka iyo-iyo selah, Datuak pantek!” Sasak Jon Ladiang.
“E pantek kalian sado mah. Basaba bagai lah dulu baa nyo. Iko kan baru permulaan. Nantik kalau ado pasti den bagi-bagi mah. Sabana pantek bana kalian nampak diden! Bantuak ka den makan surang se mah!” Tabik lo rabo Mak Datuak dibueknyo.
Dek mandanga Mak Datuak mangecek bantuak itu, lah taparangah se urang-urang nan sato rapek tu dibueknyo. Padahal, samanjak awal rapek alah tabayang ka pulang mambaok amplop. Katiko Mak Datuak lah sabana bakirok, urang-urang tu masih ndak picayo jo apo nan tajadi. Sabana barek kaki malangkah pulang. Ado nan tasandek di karongkongan.
“Sia tadi nan mambisiak-bisiak an ado uang transport e tu?” sorak anjiang Jon Ladiang batanyo.
Ndak ado nan manjawek. Hanok se sado e.
“Yolah sabana pantek. Gadang cirik pado banda namo e ko mah! Bubar! Bubar! Bubar selah lai! Lah udi kito sado e mah!” Kecek anjiang Jon Ladiang sambia malangkah pulang. (*)
Ilustrasi oleh @teawithami
