Malakik Rirayo Qurban, urang-urang di kampuang siliah-baganti datang ka rumah Jon Ladiang. Dari wakatu ayam bakukuak sampai wakatu jawi masuak ka kandang, ado-ado se nan manokok-nokok pintu rumah e. Paja tu alah tahu urusan apo nan dibaok urang ka rumah e, yaitu mintak tolong ma-asah-an pisau sarato ladiang nan ka dipakai untuak mandabiah hewan kurban bisuak. Tapi, kebetulan hari tu kaki Sijon bangkak dek dipantak sipasan, itu mako e Sijon ndak bisa bajalan ka pintu rumah mancaliak sia nan tibo. Mako baitu, sambia mauruik-uruik kaki jo minyak cap ikua baruak, nyo jawek se dari dalam biliak.
“Yooo, latak an se di ateh kayu dakek pot bungo di lua tu dulu. Japuik se bisuak ka siko yo.” Sorak Jon Ladiang dari dalam rumah e saparoh manahan sakik.
“Dima ang, Jon? Suaro e tadanga tapi urang e ndak nampak.” Baleh urang nan tibo tu.
“Aden di dalam biliak. Latak an selah di situ dulu, beko den kakok pakakeh ang tu.” Sorak Sijon.
“Eh, baa lo tu? Bialah den baok pakakeh den baliak.”
“E kanciang yo. Ndak ado masalah apo-apo bagai do. Aden sadang di dalam biliak. Latak an selah di situ kecek den.”
“Dek a ang, tamburin? Ba a dek payah bana kaki ang malangkah ka pintu rumah tu? Sadang manga ang di dalam biliak? Sadang taujuang bana pulo ndak?”
“Woi kapuyuak. Kalau ndak dek dipantak sipasan kaki den, jo muncuang ang den garinda kini ko juo mah. Ang latak selah disitu kecek den, kanciang.”
“Yo mangecek lah ang daritadi kalau kaki ang kanai pantak sipasan.”
“Tiok disabuik tiok naiak biso e, kanciang!”
“Ha-ha-ha. Saketek se baru lah bantuak itu lo pakiak ang,” Jawek paja tu tagalak-galak mandanga Sijon maondeh-ondeh dek manahan sakik.
Sasudah paja tadi tu bakirok, ndak lamo tibo Datuak Cubadak Kantang maoncong-oncong dan langsuang basorak dari laman rumah maimbau Sijon. Alah bara kali Mak Datuak maimbau-imbau, ndak dijawek dek Sijon sakali pun. Mak Datuak taruih mancubo maimbau-imbau sampai akhirnyo dijawek dek Sijon.
“Yo latak an se di situ Mak. Beko den asah sakali. Japuik se bisuak pagi…” Sorak Sijon dari dalam biliak e.
“Jadih, Jon. Eh, tapi, dima ang? Ba a dek ndak mancogok ang?”
“Aden sadang ado nan dikakok pulo di dalam. Latak an se lah di sinan. Itu lah banyak ladiang urang di sinan mah. Tandoi se nan ma ladiang Mak Datuak.”
Katiko Mak Datuak ma latak an ladiang e nan alah bakarek, dipatuik-patuik e ladiang-ladiang nan alah antri di sinan. Diangkek e ladiang-ladiang tu ciek-ciek dan dibolak-baliak an se. Banyak ladiang nan sabana rancak ukia e dan katuju pulo ladiang tu dek Mak Datuak. Dicubo e ma-ayun-ayunkan ladiang tu dan taraso cocok bana lo di tangan e. “Dima lo dapek e ladiang ko dek urang yo…” kecek Mak Datuak dalam ati e. Sambia mancaliak suok-kida, langsuang disalek an dek mak Datuak sabilah ladiang ka balakang pungguang e, dan inyo langsuang bakirok dari tampek Sijon.
“Den japuik bisuak pagi yo Jon!” Sorak Mak Datuak bajalan takaja-kaja.
“Woi, datuak anjiang. Ang laluan juo ciek yo.”
Mak Datuak tajakuik gadang mandanga suaro tu. Dicaliak suok kida ndak ado nampak sia nan mangecek.
“Eh, kanciang, sia nan ma anjiang-anjiangan den tuh?” Jawek Mak Datuak taruih mancaliak sakaliliang e. Nan jaleh itu bukan suaro Sijon.
“Ang laluan juo punyo urang lain ciek yo. Ang latak an lah baliak di sinan.”
“Sia tu, kanciang? Apo nan den laluan? Biaso-biaso selah…” Baleh Mak Datuak.
“Jan baduto juo ang lai.”
Mak Datuak sabana heran jo nan mangecek tu. Tapi ndak nampak dima urang e.
“Woi, kama ang mancaliak tu? Den di siko ha!” Tadanga baliak suaro tu.
“Sia tu? Jan macam-macam jo den!” Bentak Mak Datuak sambia mancari-cari tau sia nan sabana kurang aja tu.
“Plok!” Malayang ciek buah jambu tapek kanai ka kapalo Mak Datuak. Mak Datuak sabana paneh dan mancaliak ka batang jambu di balakang e. Kiro e di situ ado baruak Sijon nan sadang lamak mangulek-gulek buah jambu. Sabalum Mak Datuak mangecek, diimpok an dek baruak tu jambu ka kapalo Mak Datuak sakali lai. Baruak tu tagalak gadang-gadang mancaliak Mak Datuak tangango indak picayo.
“Baruak sia ang? Ba a dek pandai ang mangecek? Lai ndak konspirasi baruak sedunia untuak menghancurkan Minangkabau ko?!” Sorak Mak Datuak sambia ma acuang-acuangan ladiang tu.
“Lah bantuak Yulfi*n Azr*al ang mah, datuak anjiang. Ndak tau ang kalau den ko baruak e Jon Ladiang. Lah lupo se lai…”
“Ndak mungkin baruak Jon Ladiang bisa mangecek. Ngaku lah ang, pado den kaja ang ka ateh batang jambu tuh!” Ancam Mak Datuak ka baruak tu.
“Hahahaha!” Jawek baruak tu sambia ma ampok an buah jambu sakali lai dan tapek kanai ka muko Mak Datuak.
“Den kaja ang ka teh tu beko!” Paneh Mak Datuak dibuek e.
“Hahahaha!” Jawek baruak tu sambia taruih ma ampok muko Mak Datuak jo buah jambu.
“Aden ang pagarahan? Den dabiah ang di ateh tu beko!” Sorak Mak Datuak samakin paneh.
“Cubo lah kaja den ka ateh ko!” Jawek baruak tu barayun-rayun mahoyak batang jambu dan taruih ma ampok an buah jambu tu ka Mak Datuak.
“Sakali lai ang ampok, yo bana den kaja ang lai!” Ancam Mak Datuak dan baruak tu malah samakin bertubi-tubi ma ampok an dan basorak-sorak manggalak an Mak Datuak.
“Aden ang pagarahan? Den kaja ang ka ateh tu beko lai!” Itu se kecek Mak Datuak taruih ndak baubah-ubah tapi ndak pernah subana dipanjek e batang jambu tu.
“Alah alah alah. Ndak talok diden lai. Apo nio ang baruak anjiang?” Sorak Mak Datuak sambia manahan sasak angok dek mailak an jambu nan diampok an baruak tu.
“Den ndak ado nio apo-apo do. Tolong ang latak an ladiang tu baliak ka tampek e baliak!” Jawek si baruak.
“Mambana den ha. Jan ang kecek an pulo ka urang. Katuju bana diden ladiang nan ciek ko ha.” Jawek Mak Datuak.
“Ndak bisa. Asah se ladiang surang-surang.”
“Mambana den ha. Ndak bisa den ma asah surang do. Ladiang ko nan salah mungkin. Itu mako e den minta tolong ka Sijon taruih.”
“Bukan salah dek ladiang, tapi wa ang nan ndak nio baraja ma asah surang. Baribu kali bana ang mintak tolong ka Jon Ladiang, itu ndak ka bisa dipakai lamo. Tetap se ang harus pandai ma asah surang, kanciang!”
“Ndak bisa do! Lah den cubo sakali, ndak tajam e doh!”
“Ha? Sakali se ang cubo nyo?!”
“Alah tu, sakali se, daripado ndak mancubo samo sakali!”
“E kanciang yo. Sakali se lah manyarah ang. Kalah ang dek baruak mah. Baruak se kok diaja taruih bisa mangecek! Ang lah pandai mangecek, tapi ndak ado isi e do. Kawan sia ang ko? Lai ndak kawan urang-urang nan saketek-saketek konspirasi tu ang?” Jawek baruak tu. (*)
Ilustrasi oleh: Talia Bara
