Cubadak Kantang

Ota Ndak Sampai

Ma Tau Den, Den Anjiang!

“Kama ang kapatang Njiang? Kaba e ang dapek nominasi.” tanyo Mak Datuak ka Anjiang Jon Ladiang nan sedang menggawik karampang di sampiang kadai Cimporong.

“Iyo, Mak. Saminggu ka lakang ko den dapek surek dari dewan Hak Asasi Anjiang (HANG). Dimasuakan pulo namo den salah satu nominasi ‘Anjiang terpintar manggawik isu’. Lai lah Mak, pado ndak goyang, dapek dek den nominasi tu Mak,” jawek anjiang sambia ma angkek dagu.

“Yo santiang ang yo Njiang. Sakatek lai, banyak lo job ang pado den ko. Banyak lo urang maundang ang maisi seminar daripado den. Eeee kanciang, muak lo den caliak ang Njiang,” solo Mak Datuak ka Anjiang.

Lah masam muko Mak Datuak mancaliak anjiang Jon Ladiang kini sadang di ateh. Bisa taimpik Mak Datuak dek Anjiang tu.  Kini nyo jadi pakar HANG, bisuak-bisuak bisa pulo jadi pakara sagalo pakar, tamasuak pakar budaya—pariuak bareh Mak Datuak bana.

“Anjiang pantek mah, lah jatah ka jadi pengutang handal pulo den di lapau si Cimporong ko,”
Mak Datuak baturo-turo dalam ati.

Ancak den takuik-takuik an paja anjiang ko lai. Bia ndak ditarimo e job seminar tu, tibo pangana baruak Mak Datuak.

“Oi Njiang, kan ang lai tau mah, kalau aden ko lah dulu makan garam pado ang. Lah jauah jalan tantu banyak nan den calik, lah lamo iduik, tantu banyak den rasoi. Ampia duo puluah tahun ko den bakuliliang maagiah seminar ka urang. Apo yang nan ndak den tau. Tapi anjiang nan mode ang ko saambuah den lah basuo mah,” Mak Datuak mulai mancameh-camehan Anjiang Jon Ladiang.

“Kalau buliah dek Tuhan manyombong, yo ndak ado nan paliang tau tentang Minang ko daripado den do Njiang. Salamo duo puluah tahun tu, banyak den basuo jo urang, lain-lain pulo parangai jo aka nyo. Sampai den muak bana jo seminar-seminar tu. Kok ka den sabuik ka ang, eeeeee jan lai. Beko takuik lo ang ko,” Mak Datuak manggantuang carito e bia Anjiang Jon Ladiang makin Cameh.

Anjiang Jon Ladiang langsuang baranti manggawik karampang e, dan bapindah agak mandakek ka Mak Datuak.

“Apo tu Mak. Jan malu-malu lo lai. Sabuik se lah. Den kan anjiang nyo mah,” dasak Anjiang Jon Ladiang mulai agak cameh. Trauma lo Anjiang tu, jan tajadi lo baliak kejadian wakatu nyo maagiah sambutan di pelantikan gubernur batahun-tahun nan  lewaik.

“Jan takajuik lo ang. Jan pulo ang suuzon ka den. Beko ang sangko den manakuik-nakuik an ang. Den dek ibo ka ang mah. Dek wak lah lamo bakawan, tu den kecek an ka ang. Jan ang sangko den mahalang-halangi niaik elok ang Njiang. Sumpah den aaa. Ndak ado den niaik den mode itu…”

“Eee jawek jo lah capek, pantek. Lah tau den Mak Datuak pangepo. Jan batele-tele jo kanciang,” rabo Anjiang ka Mak Datuak.

Mandanga Anjiang Jon Lading mulai cameh, Mak Datuak sanang ati e, masuak umpan e.

“Saba lah, pantek. Aden mawanti-wanti supayo ang ijan takuik. Sabana e den lah muak manjadi pemateri seminar tu. Pitih e lamo turunnyo. kadang duo minggu sudah seminar, baru dikiriman e pitih e. tambah pajak e gadang lo dek ang Njiang,”

“Ado sakali den maagiah seminar, lah kariang karongkongan den, lah den kode jo batuak dek ang, indak jo diagiah minum dek panitia pantek tu do. Tu Mako e, kalau buliah den agiah saran, ancak jan ang jadi pemateri lai. Jadi Anjiang Jon Ladiang se lah syukur ang tu,” kato Mak Datuak manambah-nambah carito

Haha, kanai ang pantek, pangana Mak Datuak dalam hati e.

Pucek roman anjiang tu sakali. Lah tabayang dek e pitih nan lamo cair e, jo a lo kabali rokok, jo a ka dibayia utang, jo a ka dibalian kado untuak kuciang Persia Pak Haji. Lah banyak pangana buruak basilang pentang dalam utak si Anjiang.

Indak tahirauan bagai Mak Datuak nan lah senyum-senyum kanciang di suduik lapau tu lai. “Ndak mode itu de Mak. Paniang lo den dek e, tapi den paralu pitih. Gala nominasi lah ado lo di den. Ndak ka payah bana manyampaian materi tu do. Kan lah babarapo kali den maagiah seminar tu. Tapi, takana lo dek den kecek Mak tadi, gagok lo den ka malangkah dek e Mak. Yo lai sabana e nan bakecekan ka den tuMak?” tanyo Anjiang baharok Mak Datuak bagarah-garah sajo.

“Bagarah den Nampak dek ang, pantek? Kalau ndak cayo ang, indak anti lah. Kao lah diang bisuak” rabo icak-icak Mak Datuak samakin mambuek anjiang Jon Ladiang tambah paniang. Lah mode urang tasapo antu aia Anjiang dibeuk e: manggigia.

“Yolah Mak. Iyo lo nampak e kecek Mak santa ko mah. Den ndak ka jadi pemateri seminar lai. Ancak lalok-lalok lamak jo di kandang tu lai. Siang malam makan den dijamin e dek si Jon,”

Daripado jadi pemateri tapi pitih e ndak jaleh, ancak maatur strategi ntuak maolah kuciang Persia Pak Haji den lai, ado juo manfaat e, gumam randah anjiang sambia taduyun-duyun baliak ka kandang. Nyo tinggaan se Mak Datuak tanpa mengecek tarimokasih.

Haaaa, tapi duo hari sudah tu, tadanga kaba dek Mak Datuak kalau anjiang lah barangkek ka Jakarta pagi tadi, ntuak maisi seminar di blok M Square, Seminar Kebudayaan dalam Tinjauan Anjiang namo e.

“Yolah sabana Anjiang paja tu mah,” rabo Mak Datuak ndak bakatantuan. (*)

Ilustrasi @theawithami

About author

Mahasiswa Ilmu Hadis di UIN Sunan Kalijaga. Kesehariannya hanya menulis apa yang dipikirkan, merefleksi kampung halaman, dan berkecimpung dalam dunia sastra dan teater Sanggar Nuun Yogyakarta. Biasa dipanggil dengan Koh Lie Hyong.
Related posts
Cubadak Kantang

Penyair Anjiang!

Cubadak Kantang

Anjiang Jon Ladiang Ditahan Rentenir

Cubadak Kantang

MATI ANJIANG!

Cubadak Kantang

Jan Bacaruik Juo, Pantek!

Tinggalkan Balasan

Alamat email Anda tidak akan dipublikasikan. Ruas yang wajib ditandai *