Cubadak Kantang

Cepat Sembuh, Mak Datuk

Ma Tau Den, Den Anjiang!

Anjiang Jon Ladiang ka dikirim dek Kekaratan Adat Nagari (KAN) ka nagari subarang untuak mampalajari caro baruak mamanjek karambia. Manuruik rencana, inyo akan baraja di sinan salamo tigo bulan. Sasudah itu barulah paja anjiang tu diagiah tangguang jawab untuak maajaan keahlian baru nantun ka pemuda-pemuda nan menganggur di kampuang.

“Daripado jawi ka jawi se nan dipanjek dek anak mudo matah tu, rancak batang karambia se lai. Jaleh pulo untuangnyo,” kecek Jon Ladiang di dalam rapek basamo niniak ngangak jo cadiak pandia.

“Ndak bisa! Den ndak sapakaik do!” Solo Datuak Cubadak Kantang katiko Jon Ladiang sadang manjalehan alasan e.

“Astaga!!! Dek a Mak Datuak ko?!” Heran pulo Jon Ladiang dek nyo.

“Pokoknyo aden indak setuju!” Baleh Mak Datuak sambia malengah.

“Aden kan alun salasai mangecek lai!” Tabik pulo rabo Sijon deknyo.

“Sumbarang ang selah, nan jaleh den ndak setuju!” Mak Datuak basikareh sakali lai.

“Woi!!! Lai bisa ang diam?!” Hariak Sijon kanciang tu sambia  mahampok an tadah angek ka muko Mak Datuak.

Dek lah kanai ampok bantuak itu, barulah mulai basilunak Mak Datuak mangecek. “Jikok diam nan Jon Ladiang pintak, tantu indak masalah dek ambo, namun baitu dek kami lai baduo batigo di siko, iyo kami parundiangan daulu, manunggu Jon Ladiang sabanta yo…” Lanjuik Mak Datuak lah mulai bapaham baliak.

“Woi! Manunggu apo ko, datuak kalera? Manunggu kanai ampok sakali lai?! Kalau alun panek muncuang den dek mangecek, mako alun ka buliah Mak Datuak basuaro lai…” Sauik Sijon baliak.

“Jon, Jon, alah tu, Jon. Lanjuiklah baliak, jan Mak Datuak kanciang ko pulo nan wa ang urus lai…” solo Cimporong Batuah sambia ma agiah kode ka Mak Datuak supayo duduak se elok-elok bantuak nan lain.

Dek mancaliak Mak Datuak alah haniang se, barulah Jon Ladiang babaliak ka pakaro nan dibahas sabalumnyo. Setelah dijalehannyo ciek ciek alasan baa dek anjiang tu nan harus dikirim pai baraja, barulah dimintak pandapek niniak ngangak dan candiak pandia nan ado di sinan.

Sabagai janang, Cimporong pun mulai mangecek baliak. “Kok ado nan nio ma agiah pandapek, kini ambo persilakan. Sagalo pandapek harus disampaikan kini, bia bisa dibahas basamo-samo di siko malam ko juo. Jan bantuak niniak ngangak jo cadiak pandia kito nan sudah-sudah, tiok ado rapek selalu setuju sadonyo. Tapi saratuih tahun kemudian, lah tingga tulang di dalam kubua surang-surang, masih ado juo nan bagunjiang.”

Mak Datuak langsuang ma angkek tangan.

“Silakan Mak Datuak kalau ado nan paralu disampaikan,” kecek Cimporong ma agiah tampek.

“Aden ndak setuju saketek alahe nan disampaikan dek Jon ladiang tadi!” Sorak Mak Datuak sambia tagak di tangah urang nan rami.

“Oke. Oke,” jawek Cimporong, “tapi tolong duduak se elok-elok bantuak nan lain tu ha, sudah tu baru agiah alasan baa dek Mak Datuak ndak setuju.”

“Manuruik den,” Mak Datuak mulai manjalehan, “sarancaknyo anjiang Jon Ladiang tu dikirim ka nagari subarang. Suruahnyo baraja mamanjek karambia di sinan. Kalau lah salasai, kan bisa nyo jadi guru di siko. Banyak anak-anak mudo awak nan bisa baguru ka anjiang Jon Ladiang tu!”

“Oke. Kalau baitu bakirok ang kini ko juo!” Solo Jon Ladiang langsuang tagak dan malangkah ka arah Mak Datuak.

“Dan mulai kini ndak usah ang ikuik-ikuik rapek lai!” Hariak Sijon sambia manunjuak ka muko Mak Datuak. Sabana payah Sijon manahan saba deknyo.

“Ha? Paneh se sakali mah. Apo salah den?” Jawek Mak Datuak sambia ma angkek kaduo tangan tinggi-tinggi.

“WOI BINGKARUANG! BATANYO JUO ANG LAI!!!” Rabo Cimporong sabana ndak tahan pulo dek nyo.

“Sajaleh tu itu nan kito bahas sejak tadi. Kama se ang daritadi, tuak?!” Hariak Sijon sambia manggisa taligo Mak Datuak.

“Alah tuh!” sorak urang nan rami.

Untuang se lai capek dilarai. Kalau indak, mungkin lah bakuhampeh urang nan baduo tu. Akhirnyo, kasado urang nan hadir di rapek tu supakaik untuak manyuruah Datuak Cubadak Kantang bakirok malam tu juo. Mak Datuak pun ndak nio malawan bana dan untuak sakali tu inyo ikuik an se apo nan dikandak dek urang rami, walaupun sabananyo di dalam ati masih ndak bisa manarimo.

“Den raso talingo den alun pakak bana lai. Sajaleh tu sajak tadi Sijon mangecek an kalau urang nan harus pai baraja mamanjek karambia tu adolah wakden. Itu mangkonyo den mangecek an indak setuju. Manga lo harus den pulo nan mamanjek-mamanjek karambia tuh. Rancak nan lain nan den panjek lai,” kecek Mak Datuak sambia malangkah kalua ruangan.

“Woi tuak. Babaliak lah ang ka siko dulu. Ndak ado wa ang nan den suruah pai baraja ka situ do. Sajaleh tu nan diusulkan adolah anjiang den. Antah sia nan manyabuik-nyabuik namo ang,” baleh Jon Ladiang.

Dek mancaliak lagak Jon Ladiang bantuak nan ka iyo pulo, habih pulo saba Mak Datuak dek nyo. Untuang se Cimporong langsuang sigap. Ditahannyo Mak Datuak jo Jon Ladiang bia ndak bakuhampeh pulo baliak.

“Kini giko selah. Cubo kito uji bana basamo. Apokah Sijon nan salah sabuik atau talingo Mak Datuak nan pakak.” Cimporong mancari jalan tangah. “Jon, cubo ang sabuik kato anjiang, apokah lai itu pulo nan sampai ka talingo Mak Datuak.”

“Anjiang, tes, tes, anjiang…” Kecek Sijon manuruik.

“Ha, kan iyo tu ha, namo den nan ang sabuik, kalera!” Langsuang paneh Mak Datuak dek mandanga nyo.

“Apo nan tadanga dek Mak Datuak?” Tanyo Cimporong.

“Yo namo den nan disabuiknyo…” jawek Mak Datuak.

“Kini cubo sabuik namo Mak Datuak, Jon..” pintak Cimporong. Jon Ladiang pun manyabuik namo Mak Datuak.

“Nah, kalau itu baru anjiang nan dikecek an dek paja tuh,” semba Mak Datuak.

Akhirnyo rapek hari tu ndak jadi memutuskan soal rencana anjiang Sijon pai baraja mamanjek karambia. Hasil mufakat malam tu adolah Mak Datuak harus diantan ka rumah sakik samalam-malam hari. Sabalum talambek, mungkin masih bisa diubek.

“Kalau bantuak iko nan tajadi ka talingo Mak Datuak, den tahu bana penyebabnyo, soalnyo di kampuang sabalah alah tigo urang nan bantuak itu panyakiknyo,” bisiak Cimporong ka Jon Ladiang.

“Apo tu???” Sijon penasaran.

“Dek acok bana mandanga urang bacaruik di Musajik, mako rusak talingo dek nyo. Kok lai talingo se nan rusak, kan bisa pulo kito ubek. Iko indak, sampai ka utak konsletnyo,” lanjuik Cimporong.

“Astaga. Mangucaplah ang, Cimp… Sajak bilo ado urang bacaruik di Musajik? Kanai antuak an kapalo ang ka dindiang tu beko dek urang sakampuang,” Solo Sijon.

“Aden alun salasai manjalehan lai, bingkaruang. Lai ang paratian, dalam sahari tu antah bara kali Mak Datuak mangirim video-video urang bacaruik-caruik di Musajik ka grup WA. Mak Datuak sanang bana atinyo mandanga itu. Raso-raso ka masuak sarugo nyo dek mandanga urang bacaruik-caruik di mimbar tuh. Kalau den yo samak pangana den,” kecek Cimporong manjalehan ka talingo Jon Ladiang.

“Hehe. Iyo juo mah. Bialah dalam carito CBK KTG ko se urang bacaruik-caruik, di nan lain jan sampai bantuak itu pulo lai,” jawek Jon Ladiang.

“Anjiang wa ang nan paliang pacaruik di siko nyo. Den ndak ado do yo…” Jawek Cimporong mancimeeh.

“Kalau paja tu ndak baa do, nyo kan memang anjiang…” Baleh Sijon sambia galak sengeng.

“Eh, alah tu, tagak lah kito basamo-samo lai. Kito antaan Mak Datuak ka rumah sakik, ma tau kok lai bisa diubek…” Sorak urang nan rami. (*)

Ilustrasi @teawithami

Related posts
Cubadak Kantang

Penyair Anjiang!

Cubadak Kantang

Anjiang Jon Ladiang Ditahan Rentenir

Cubadak Kantang

MATI ANJIANG!

Cubadak Kantang

Ota Ndak Sampai

Tinggalkan Balasan

Alamat email Anda tidak akan dipublikasikan. Ruas yang wajib ditandai *