Cubadak Kantang

Ampek Alasan Ba a Dek Urang Awak Harus Berang

[Korona alun juo salasai. Masarakaik samakin payah. Syukurlah Pemerintah Provinsi lai ma agiah bantuan bareh saketek surang. Saindak-indak e ado juo nan bisa tatolong. Tapi, walaupun baitu, bukan berarti masalah alah salasai dek pakaro bareh saketek surang tu. Kalau basyukur tantulah iyo basyukur. Namun, nan jadi pertanyaan di kapalo Dtk Kantang, ba a dek samanjak den ketek anyia sampai kini lah gaek lapuak, masyarakat Sumatra Barat ko banyak juo nan bansaik, padahal kekayaan alam di sapanjang alam Minangkabau ko ndak taetong banyak e].

“Mak, itu selah tema diskusi kito minggu muko, baa?” Kecek Jon Ladiang manalepon Mak Datuak.

“Diskusi nan ma ko? Sadang banyak den maisi diskusi onlen kini. Workshop baburu kandiak ado ciek di Zoom. Tu ado lo tigo lai tadi urang ma ajak. Jadi, nan ma nan ang mukasuik?” Jawek Mak Datuak.

“Kito buek pulo nan baru. Sabanta ko den mambaco status pesbuk Mak. Kalau ndak salah tentang kekayaan alam. Sekitar itulah pokoknyo. Ba a? Lai suai tu?”

“Den cek jadwal den dulu. Sibuk bana den kini mamikian sagalo hal. Nagari, negeri, jo negara; sakali tigo den pikian. Ngeri lo den dek nyo. Utak ko dek lah lamo ndak bapakai, capek angek nyo kini. Kalau alah agak barek bapikia, bakunang-kunang se mato den sakali. Tapi, kalau bisa, ndak usahlah dulu kito bahas itu, bia den salasaian ciek-ciek dulu, baru wak bahas rencana ang tuh.” Kecek Mak Datuak ndak basemangat.

“Ondeh. Ba a caro e lai ko. Kama ka den agiah an lai.” Jon Ladiang ngecek ka dirinyo surang tapi masih bisa tadanga dek Mak Datuak.

“A tu?”

“Kalau Mak tulak rencana ko, paniang lo den dek nyo. Tiok narasumber ado lah saketek untuak pambali kopi, sumbangan urang dari rantau. Dek lah takecek an lo diden kalau Mak Datuak pasti setuju jo topik nan den sabuik tadi.”

“Bilo den tulak? Ndak ado den tulak doh. Den alun salasai mangecek lai. Den ulang kini baliak ha, supayo ndak salah tangkok ang. Kalau alah agak barek den bapikia, bakunang-kunang se mato den sakali. Tapi, kalau itu topik nan katuju dek ang, jadih juo. Malam kini kito bahas sakali. Ba a?” Jawek Mak Datuak basumangaik.

Siap sumbayang Isya, Jon Ladiang lah mulai mambukak Instagram, langsuang live, manunggu Mak Datuak sato masuak. Katiko lah masuak Mak Datuak, Sijon langsuang mambukak acara:

“Dari sintuak ka saniang baka, urang mamukek pagi hari, dari ujuang taruih ka pangka, dari tangah sampai ka tapi, bukan bahinggo jo babateh, ketek indak basabuik namo, gadang indak bahimbau gala…. Salamaik malam warga Minangkabau nan alah bagabuang jo diskusi onlen kito malam ko basamo Datuak Cubadak Kantang Nan Baju Kariang Di Badan. Sambah kapado niniak mamak kito nan surang ko, nan gadang basa batuah, nan ba aka baurek tunggang, babatang badahan rampak, badaun baujuang rantiang, baputiak babungo kambang, babuah kato nan bana, buliah baselo di ureknyo, buliah basanda di batangnyo, gantungan cupak nan duo, partamo cupak usali nan kaduo cupak buatan. Sambah kapado niniak mamak kito nan sabana ganteng ko, nan gadang basa batuah, nan bapucuak sabana bulek, nan baurek sabana tunggang, nan tinggi tampak jauah, nan gadang jolong basuo, ka pai tampek batanyo, ka pulang tampek babarito. Sambah kapado niniak mamak kito nan sabana elok ko, nan bak kayu gadang di tangah koto, ureknyo tampek baselo, batang gadang tampek basanda, dahannyo tampek bagantuang, daunnyo tampek balinduang, jiko paneh tampekk bataduah, jikok hujan…”

“Stop! Alah tu, Jon. Jan lamo bana lai. Basijadi lo sambah-manyambah ang nampak diden. Salut lo den dek nyo. Den mangecek kini lai.” Solo Mak Datuak ndak saba ka mamulai kaji e malam tu.

“Sampai, Mak!” Jawek Sijon sakali.

Jadi, kaji dari Mak Datuak malam tu mambahas “Ampek Alasan Ba a Dek Urang Awak Harus Berang”. Iko nyo:

“Partamo. Sumatra Barat ko punyo saindak-indak e ciek tambang semen dan duo tambang ameh. Kalau semen tantu lah tau urang sadonyo. Nan ameh ko masih banyak nan alun tau. Sabana e wajar kalau urang ndak tau karena memang tambang tu tasuruak. Ndak cuma tampek nyo se nan tasuruak, tapi informasi e pun basuruak an, dek karano itu tambang ilegal. Ndak ado nan talok mangaca. Apolai mambahasnyo. Indak tantu dek kito sia nan di balakang tambang-tambang ilegal tu. Namo tampeknyo ndak usah disabuik dulu bia ndak ado nan berang. Nan jaleh tambang-tambang tu yo bana ado di Sumatra Barat ko. Pejabat provinsi pun pura-pura indak tahu. Kalau ditanyo soal itu, acok mailak se pejabat-pejabat kito.

Dek karano itulah urang awak harus berang! Masyarakaik harus manuntuik! Semen dan ameh tu barado di tanah nan kito punyo tapi urang awak di kampuang ko samakin banyak nan bansaik. Sadangkan dek tigo tambang tu, lah banyak urang nan kayo tujuah katurunan dek nyo.

Kok dipikia-pikia bana, kalau seandainyo keuntungan tambang-tambang tu dipagunoan untuak kepentingan urang awak, lah balabiah-labiah mah. Ndak ka ado urang nan bansaik, ndak ka ado sakolah nan bantuak kandang jawi, ndak ka ado rumah penduduk nan bantuak kandang ayam, ndak ka ado bagai urang awak nan maratok karano ndak bisa mambayia uang sekolah, dan sebagainyo. Sajak abad lalu tambang tu dibukak lai, masa iyo nan tajadi malah samakin banyak urang awak nan miskin? Caliak lah katiko maso Korona kini, taraso bana ketimpangan sosial, urang nan kayo bisa santai-santai di rumah, sadangkan banyak urang awak bapasoan badan tetap bakarajo, kalau ndak karajo ndak bisa makan. Seharusnyo ketimpangan bantuak tu ndak katajadi kalau sagalo hasil alam di Minangkabau ko digunoan untuak kebutuhan urang awak.

Caliaklah kini, ado daerah di Sumbar ko nan sejahtera dan ado nan bansaik bana. Ado daerah nan maju pendidikannyo dan ado nan tabalakang bana. Ado nan masuak kuliah jo caro manjua barang bekas dan ado nan masuak kuliah dek dijanjian kadibalian oto dek rang gaek e. Awak samo-samo Minangkabau, tapi ado nan citra e urang kampuang nan ndak tau apo-apo dan ado citra e nan sabana maju. Nan bansaik dari tahun ka tahun mamikian apo ka dimakan sedangkan nan kayo lah mamikian ka mambuek ini itu dan ka mambali ini itu. Ado katiko hari rayo bisa galak-galak, mamamerkan kesuksesan, dan ado nan katiko rayo baibo-ibo ati, manahan ayia mato supayo ndak kalua, karano dek ndak ado apo-apo.

Dulu urang barabab untuak hiburan basamo. Kini urang barabab untuak bisa dapek makan surang-surang. Apo guno membahas kejayaan Minangkabau, kalau kini ko kito kanai kicuah tagak? Co pikia. Lah, itu nan partamo.”

“Apo tigo lai Mak?” Tanyo Jon Ladiang.

“Tigo lai den jalehan di kesempatan lain. Ciek iko se cubo inok-manuangan dulu. Tolong iko se dipahami dalam-dalam dulu. Sabalum kito sudahi, tolong pikian pertanyaan den ko: Pemasukan terbesar di APBD Sumatra Barat adalah dari retribusi parkir. Bayangkan, pemasukan terbesar kito HANYO dari PARKIR! Arti e, kama pai nyo keuntungan semen dan ameh tu?! Kok ndak ka APBD kito masuak nyo?!” (*)

Ilustrasi oleh: Talia Bara

Related posts
Cubadak Kantang

Ma Tau Den, Den Anjiang!

Cubadak Kantang

Sijon Kanai Tolak dek Sarah

Cubadak Kantang

Pandai-pandai Pak Anjiang Sajalah Lagi

Cubadak Kantang

Pengumuman

Tinggalkan Balasan

Alamat email Anda tidak akan dipublikasikan. Ruas yang wajib ditandai *